އަޒުހާންގެ ފަހު ވަގުތުތައް: ލޯބިވެރިޔާއާ އެކު ބޮޑު ކޯޅުމެއް

ފަތިހުގެ ހަމަހިމޭން ވަގުތެވެ؛ ހުޅުމާލޭ އެންމެ ކާރޫބާރޫ ބޮޑު އެއް މަގު، މާލެއަށް ދާ ހައިވޭއަށް އަރަން އޮންނަ ނިރޮޅުމަގު ނިމޭ ކޮޅާ ދިމާލުން ވޯޓާ ތީމް ޕާކްގެ އަނެއް ފަޅީގައި އޮންނަ ބޯ ގަސްތަކުގެ ތެރެއަށް އަޒުހާން 'ގެއްލުނީ' އެވެ. އޭގެ 14 ދުވަސް ފަހުން، އާއިލާ އާއި ރަހުމަތްތެރިން އޭނާ ހެޔޮ ހާލުގައި ފެންނާނެ ކަމުގެ އުންމީދުގައި ތިއްބާ، ފުލުހުން އެ ސަރަހައްދުން ހޯދީ އޭނާގެ ހަށިގަނޑު ކަމަށް ބެލެވޭ ފުރާނަ ނެތް މަސްގަނޑެވެ. ގިނަ ދުވަސް ވެގެން އޮތީ ވަރަށް ބޮޑަށް ކުނިވެފަ އެވެ.

ހ. ބޮނޑިކަނދޮޅުގޭ އުމުރުން 27 އަހަރުގެ މުހައްމަދު އަޒުހާން ގެއްލުމާ އެކު، ނުފެނި ދުވަސްތަކެއް ވާން ފެށުމުން އޭރު އެކި ގޮތްތަކަށް ވާހަކަތައް ދައްކަން ފެށި އެވެ؛ ބަޔަކު އޭނާ ރަހީނުކުރީ އެވެ. މަސްތުވާތަކެތީގެ މުއާމަލާތެއްގައި ފައިސާގެ މައްސަލައެއް ޖެހިގެން ފިލީ އެވެ. މިހެން ގޮސް، ހަގީގަތް ނޭނގޭ އެތައް ވާހަކައެއް ފެތުރުނެވެ.

ބައެއް މީޑިއާތަކުން އެގޮތަށް ރިޕޯޓު ވެސް ކުރި އެވެ.

'ދައުރު'ގެ ޓީމުން މިދިޔަ ދުވަސްތަކުގައި އެ އަޑުތަކާއި ޝައްކުތަކާއި ވަހުމް އިތުރަށް ބެލި އެވެ. އޭރު އުފެދުނު ސުވާލުތަކަކީ، އަޒުހާނަށް އަސްލު ވީ ކިހިނެއް ހެއްޔެވެ؟ އެ ގަސްތަކުގެ ތެރެއަށް އޭނާ 'ގެއްލުމު'ގެ ކުރިން ވީ ކިހިނެއް ހެއްޔެވެ؟ އޭނާގެ ފަހު ވަގުތުތަކުގެ ހަރަކާތްތައް ހުރީ ކިހިނެއް ހެއްޔެވެ؟ އޭނާ އެންމެ ފަހުން ހުރި ގެސްޓްހައުސް އާއި ހިޔާ ފްލެޓްގެ 13 ވަނަ ޓަވަރުގެ އެޕާޓްމަންޓްގައި ކަމެއް ހިނގި ހެއްޔެވެ؟

އަޒުހާން އާއި އޭނާގެ ލޯބިވެރިޔާ ހުޅުމާލޭ ފޭސް އެކެއްގެ ބީޗް ސައިޑް ގެސްޓްހައުސަށް ޗެކިންވާން ދިޔަ ގަޑިއަކީ މި އެވެ. އެ ގެސްޓްހައުސްގެ ދެވަނަ ބުރީގައި ހުރި ކޮޓަރިއަށް، އެއް ދުވަހުގެ މުއްދަތަށް ފައިސާ ދެއްކީ އޭނާގެ ލޯބިވެރިޔާ އެވެ. އޭރު ވެސް ދެ މީހުންގެ ފަރާތުން މާ ބޮޑު ނުރުހުމެއް، ކަންބޮޑުވާ ކަމެއް އަދި ނުތަނަވަސް ކަމެއް ވެސް ނެތް ކަމަށް، 'ދައުރު'އާ ވާހަކަ ދެއްކި ބައެއް މީހުން ބުނެފައިވެ އެވެ.

ދެ މީހުން ވެސް ތިބީ ވަރަށް ހަމަޖެހިލައިގެންނެވެ. 

ނަމަވެސް ޗެކިންވެ، އިރުއޮއްސުނު ފަހުން ދެ މީހުން ތިބި 203 ނަންބަރު ކޮޓަރިން ޒުވާބުގެ އަޑު އިވުނެވެ. އެހެން ކޮޓަރިތަކުގައި ތިބި ގެސްޓުންނަށް ވެސް އުނދަގޫވި އެވެ. ބައެއް މީހުންނަށް އެ އަޑު ސިފަވީ ކޮންމެވެސް ކަމަކާ ހިތްހަމަނުޖެހިގެން ޒުވާބު ކުރަނީ ކަމަށެވެ. ނަމަވެސް ދެ ލޯބިވެރިން އަޑުގަދަކޮށް ދެއްކީ ކޮން ވާހަކައެއް ކަމެއް ސާފެއްނުވެ އެވެ.

އަޒުހާން އާއި އޭނާގެ ލޯބިވެރިޔާ ގެސްޓްހައުސް އިން ނުކުމެ ކުރިމަތީގައި އޮންނަ ބީޗަށް ދިޔަ އެވެ. ނަމަވެސް މާ ގިނަ އިރެއް ނުވެ އަނެއްކާވެސް ގެސްޓްހައުސްއަށް ވަނެވެ. ނުކުތީ ކީއްކުރަން ކަމެއް ނޭނގެ އެވެ. ދެތިން ފަހަރަކު އެގޮތަށް އެ މީހުން ގެސްޓްހައުސް އިން ނުކުމެ އަނެއްކާވެސް ވަން ކަމަށްވެ އެވެ. 

އަނެއްކާވެސް ދެ މީހުން އެކުގައި ގެސްޓްހައުސް އިން ނުކުތެވެ. އޭރު ނުކުތުމުން ގެސްޓްހައުސްގެ ސެކިއުރިޓީ ގާޑު ޗެކްއައުޓް ވަނީތޯ އަޒުހާންއާ ސުވާލުކުރި އެވެ. ޗެކްއައުޓްވާ ނަމަ، ކޮޓަރީގެ ކީ ކާޑު ދީފައި ދާން އެދުނެވެ. ނަމަވެސް ޖަވާބުގައި އަޒުހާން ބުނި ކަމަށް ވަނީ ޗެކްއައުޓް ވާނީ "ހެނދުނު 11 ޖަހާއިރު ނޫން ހެއްޔޭ" އެވެ. އަދި ޗެކްއައުޓް ވާން ޖެހޭ ވަގުތުގެ ކުރިން އެނބުރި އަންނާނަމޭ ބުނި ކަމަށް 'ދައުރު'އަށް އެނގިފައިވެ އެވެ. 

އޭގެ ގާތްގަނޑަކަށް ފަސް މިނެޓް ފަހުން އަނެއްކާވެސް ދެ މީހުން އެކުގައި ގެސްޓްހައުސްއަށް ވަނެވެ. ފުރަތަމަ ލިފްޓަށް އެރީ ލޯބިވެރިޔާ އެވެ. އަޒުހާން ލިފްޓަށް އަރަން އުޅުމުން ލޯބިވެރިޔާ އަޒުހާން ކޮއްޕާލި ކަމަށް މަންޒަރު ދުށް މީހަކު ކިޔައިދިނެވެ. އެއީ ރުޅި އައިސްގެން ކަމެއް ނުވަތަ މަޖަލަކަށް ކަމަށް ނޭނގެ އެވެ. ބޮޑަށް ބުރަވެވެނީ، ލޯބިވެރިޔާ އަޒުހާން ލިފްޓަށް ނާރުވާން ކުރި ކަމެއްގެ ގޮތުގަ އެވެ. ނަމަވެސް ދެ މީހުން އެކުގައި ލިފްޓުން ގޮސް އަނެއްކާވެސް ކޮޓަރިއަށް ވަނެވެ.

މިފަހަރު ގެސްޓްހައުސް އިން ނުކުންނަނީ ލޯބިވެރިޔާ އެކަންޏެވެ. އަޒުހާން އޮތީ ކޮޓަރީގަ އެވެ. ލޯބިވެރިޔާ އޭރު ގެސްޓްހައުސް އިން ނުކުމެގެން ދިޔަ ގޮތަށް އަނބުރާ ނާދެ އެވެ. އޭނާ ދިޔައީ މީހަކު/ބަޔަކާ އެކު ނުވަތަ އެކަނި ކަމެއް ސާފެއް ނުވި އެވެ. މިއީ ލިފްޓަށް އަރަނިކޮށް އަޒުހާން ކޮއްޕާލި ކަމަށް ބުނާ ވަގުތުގެ ދެ ގަޑިއިރެއްހާ ފަހެވެ.

ލޯބިވެރިޔާ ނުކުމެގެން ދިޔަތާ ފަސް މިނެޓެއް ހާއިރު ފަހުން، އަޒުހާން ނުކުމެ އެވެ. އޭރު ގަޑިން ވާނީ ދަންވަރު 3:06 އެވެ. ހުދު ކުލައިގެ ޓެކްސީއަކަށް އަރައިގެން އަޒުހާން ދިޔައީ ހިޔާ ފްލެޓްގެ 13 ވަނަ ޓަވަރުގައި ހުރި އެޕާޓްމަންޓަކަށެވެ. އެ އެޕާޓްމަންޓްގައި މިހާރު ދިރުއުޅެމުން އަންނަނީ އަޒުހާންގެ ރައްޓެއްސެއް ކަމަށްވާ އަހްމަދު ހާނީ ބަދީއު އެވެ.

ގެސްޓްހައުސްގެ ކޮޓަރިން ދެ ލޯބިވެރިން ނުކުމެގެން ދިޔައިރު ފާހަގަވި ބައެއް ކަންކަން:

ގެސްޓްހައުސްގެ ކޮޓަރި ތެރޭގައި ދެ މީހުންގެ ދެމެދުގައި ކޯޅުމެއް ހިނގާފައިވާ ކަމަށް އިތުރަށް ބާރު ލިބެނީ އަޒުހާންގެ އެކުވެރި ހާނީ 'ދައުރު'އާ ހިއްސާ ކުރި މައުލޫމާތުތަކުންނެވެ.

ލޯބިވެރިޔާ 3 ޖެހި އިރު ގެސްޓްހައުސް އިން ނުކުމުގެން ދިޔުމާ އެކު އަޒުހާން މެސެޖްކުރީ ހާނީ އަށެވެ.

"އަޒުހާން މެސެޖްކޮށްފައި ބުނަނީ ބްރޯ ވަރަށް ކަޑައެއްޗެއް ވެއްޖެއޭ،" އެރޭ ކަން ހިނގި ގޮތް ހާނީ ކިޔައިދެމުން ބުންޏެވެ.

ޖަވާބުގައި ކިހިނެއްވީތޯ ހާނީ މެސެޖުން އެހި އެވެ.

އެ މެސަޖަށް ފަހު، އަޒުހާން ގެސްޓްހައުސްގައި ހުރެ ހާނީއާ ފޯނުން ވާހަކަ ދެއްކި އެވެ.

"އަޒުހާން ބުނީ [ލޯބިވެރިޔާގެ ނަން އުނިކޮށްފައި] އޭނާ ދޫކޮށްލާފައި ހިނގައްޖޭ ވަރަށް ބޮޑު ފައިޓެއް ކޮށްލާފައި. ވަރަށް ހާޑޭ،" ހާސްވެ، ވަރަށް ކަންބޮޑުވެފައި ހުރެ އަޒުހާން ވާހަކަ ދެއްކިކަން ފާހަގަކޮށް ހާނީ ބުންޏެވެ.

އޭނާ ބުނި ގޮތުގައި، ގެސްޓްހައުސް ތެރޭ ދެ މީހުން ދެ މީހުންނަށް 'ތަޅައިގަތީ' އެވެ.

"ދެ މީހުންގެ މެދުގައި ޖެހުނީ ކޮން މައްސަލައެއް ކަމެއް އަޒުހާން ނުބުނޭ. އެކަމަކު ދެ މީހުން މައްސަލައެއް ޖެހިގެން ބޮޑު ފައިޓެއް ކުރިކަން އޭނގޭ،" ހާނީ ބުންޏެވެ.

ފޯނުން ދެއްކި ވާހަކަތަކުން ދޭހަވަނީ، އަޒުހާން ހުރީ ލޯބިވެރިޔާއާ އެކު މި ޖެހުނު މައްސަލަގަނޑަށް ފަހު، "ބައެއްގެ ހަމަލާއެއް އަތުވެދާނެކަމުގެ ބިރުގައި" ކަމަށް ހާނީއަށް ގަބޫލުކުރެވުނެވެ. ނަމަވެސް އެއީ ކޮން ބައެއް ކަމެއް ނޭނގޭ ކަމަށް ހާނީ ބުންޏެވެ.

"އަޒުހާން ބުނީ ތިމަންނައަށް ހީވެޔޭ ބަޔަކު އޭނާ ދުއްވާލަން އައިސްދާނޭ،" ފޯނުން އަޒުހާން ދެއްކި ވާހަކަތައް އިތުރަށް ކިޔައިދެމުން ހާނީ ބުންޏެވެ.

އަޒުހާންގެ އެ ވާހަކަ އެވަގުތު އެހާ ސީރިއަސްކޮށެއް ހާނީ ނުނަގަ އެވެ. އެއީ އަޒުހާންއަކީ، މިފަދަ ކަންކަމުގައި ވަރަށް ހާސްވެ، ކަންބޮޑުވެގެން ފުން ހިޔާލުތަކަށް ގޮސް، ބައެއް ކަންކަމުގައި "ވަރަށް ނެގެޓިވްކޮށް ވިސްނާ މީހެއް" ކަމަށް ވާތީ ކަމަށް ވެސް ހާނީ ބުންޏެވެ.

"އަހަރެން ބުނިން އެހެންވިއްޔާ އަންނާށޭ އަހަރެންގެ އެޕާޓާމަންޓަށް [ހިޔާގެ 13 ވަނަ ޓަވަރު]،" ހާނީ ބުންޏެވެ.

 ހާނީއާ ދެ މީހުންގެ މި ކޯލަށް ފަހު 3:06 ހާއިރު ގެސްޓްހައުސް އިން ހިޔާ ފްލެޓަށް އަޒުހާން ދިޔައީ އެވެ.

އެ އެޕާޓްމަންޓްގައި ދެ ގަޑިއިރު އަޒުހާން ހޭދަކުރި އެވެ. އެ ތަނުގައި ހުއްޓާ ވެސް ލޯބިވެރިޔާ އަޒުހާނަށް ގުޅި އެވެ. ނަމަވެސް އަޒުހާން ފޯނު ނުނަގާ ކަމަށްވެ އެވެ.

"އަހަރެން ބުނިން އޭރު ވެސް ގެއަށް ދައްޗޭ. އޭރު ނޭނގެ ގެސްޓްހައުސްއަށް ކަމެއް މި ތަނުން ދިޔައީ،" ހިޔާގެ ހަތަރު ވަނަ ޓަވަރުގެ ފްލެޓެއްގައި އާއިލާއާ އެކު ދިރިއުޅެމުން ދިޔަ އަޒުހާންއާ އެކު ހިނގި އެންމެ ފަހުގެ މުއާމަލާތުގެ ތަފްސީލުތައް ކިޔައިދެމުން ހާނީ ބުންޏެވެ.

އެ ރެއަކީ ހާނީގެ އުފަން ދުވަހެވެ. އެ އެޕާޓްމަންޓްގައި ދެން ތިބީ ހާނީ އާއި އޭނާގެ އެހެން ރަހުމަތްތެރިއެކެވެ. އެރޭ ކަންވީ ގޮތް އެއްވެސް ދޮގެއް ނެތި ހުރިހާ ވާހަކައެއް މީގެ ހަފްތާއެއްހާ ދުވަސް ކުރިން ފުލުހުންނަށް ވެސް ކިޔައިދީފައިވާނެ ކަމަށް ހާނީ ބުންޏެވެ.

ފުލުހުން ނެރުނު ބަޔާނުން އެނގޭ ގޮތުގައި 4:53ގައި ހުދު ކުލައިގެ ޓެކްސީއަކަށް އަރައިގެން ހިޔާގެ 13 ވަނަ ޓަވަރުން އަނެއްކާވެސް އަޒުހާން ދިޔައީ ގެސްޓްހައުސްއަށެވެ.

އެ ހުދު ކުލައިގެ ކާރު މަޑުކުރަނީ އަޒުހާން ހުރި ގެސްޓްހައުސްއަށް ވުރެ ތަންކޮޅެއް ދުރު ހިސާބަކަށެވެ. ސީދާ އަޒުހާން ހުރި ގެސްޓްހައުސް ކުރިމައްޗަކަށް ނޫނެވެ. ކާރުން ފައިބައިގެން ގޮސް، ގެސްޓްހައުސްއަށް ވަދެ، ދެން އަޒުހާން ދިޔައީ ކުއްޔަށް ނެގި 203 ކޮޓަރިއަށެވެ. 

އެކަނި އެ ކޮޓަރީގައި ބައި ގަޑިއެއް ހާއިރު އޮތުމަށް ފަހު، އެންމެ ފަހުން އަޒުހާން ގެސްޓްހައުސް އިން ނުކުތް ގަޑިއަކީ އެ އެވެ. ނުކުމެގެން ދިޔައީ ކީ ކާޑު ނުދީ އެވެ. އަދި ގެސްޓްހައުސް މީހުންނަށް ޗެކްއައުޓްވާކަން ވެސް ނާންގަ އެވެ.  އެ ތަނުން ނުކުމެގެން ދެން އޭނާ އެންމެ ފަހުން ފެނުނީ ރެޑްބުލް ދަނޑު ކައިރިންނެވެ. އެ ހިސާބުން އަޒުހާން 'ގެއްލުނީ' އެވެ.

'ދައުރު' އިން އިތުރަށް ހޯދި އެހެން ބައެއް ހޯދުންތަކާއި ފާހަގަކުރެވޭ ކަންކަން:

'ދައުރު'ގެ މި ހޯދުންތަކާ އެކު ވެސް އަދިވެސް ޖަވާބު ނުލިބޭ އެތައް ސުވާލުތަކެއް އެބަ ހުއްޓެވެ. ނޭނގެނީ ސީދާ އަޒުހާންއަށް ވީ ގޮތެވެ. ފުލުހުން ރޭ ނެރުނު ބަޔާނުގައި ބުނީ އަޒުހާން މަރާލި ކަމުގެ އެއްވެސް ހެއްކެއް މިހާތަނަށް ފެނިފައި ނުވާ ކަމަށެވެ.

އޭނާގެ ފޯނު މިހާރު ވަނީ ހޯދައިފަ އެވެ. ކުރިއަށް އޮތް ދުވަސްތަކުގައި އިތުރަށް ކަންކަން ނިއުޅިގެން ދާނެ ކަމަށް ބެލެވެ އެވެ. އަދި ބޭރަށް ހަށިގަނޑު ފޮނުވައިގެން ހަދާ އޮޓޮޕްސީން އެހެން މައުލޫމާތުތައް ވެސް ކަށަވަރުވާނެ އެވެ.