މެންބަރު ހައިތަމްގެ ސަލާމް ދިގުވެ ރިޔާސަތުން ކަންބޮޑުވެއްޖެ

މައްޗަންގޮޅި ދެކުނު ދާއިރާގެ މެމްބަރު އަހުމަދު ހައިތަމްގެ ސަލާމުގެ މުއްދަތު ނިމޭ ދުވަހެއް ހޯދަން ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެދިވަޑައިގެންފި އެވެ.

ވީ ކިހިނެއް؟ - މިއަދުގެ ޖަލްސާ ފައްޓަވައި މަޖިލީހުގެ ހާޒިރީ ވިދާޅުވުމަށް ފަހު ހައިތަމް މަޖިލީހަށް ހާޒިރުނުވެ ސަލާމުގައި ހުންނަތާ ގިނަ ދުވަސްވެފައި ވާތީ ނަޝީދު ވަނީ ކަންބޮޑުވުން ފާޅުކުރައްވާފަ އެވެ.

ޖަލްސާ ފެށިއިރު، ތަޅުމުގައި ތިއްބެވީ 87 މެމްބަރުންގެ ތެރެއިން 31 މެމްބަރެކެވެ. ފަސް މެމްބަރަކު ސަލާމުގައި ތިއްބެވިއިރު، ނަޝީދު ހަމައެކަނި ނަމުން ފާހަގަކުރެއްވީ ހައިތަމް ސަލާމުގައި ހުންނަވާ ވާހަކަ އެކަންޏެވެ.

"މި ފަސް މެމްބަރުންގެ ތެރެއިން ސަލާމުގައިވާ މައްޗަންގޮޅި ދެކުނު ދާއިރާގެ މެމްބަރުގެ ސަލާމުގެ ތާރީހު ނިމޭ ދުވަހެއް ވިދާޅުވެފައި ނުވާތީވެ މަޖިލީހުގެ އިދާރާއިން އެކަން ސާފުކުރުމަށް އެ އިއްޒަތްތެރި މެމްބަރުގެ އަރިހުގައި ވާނީ ދަންނަވާފައި،" ނަޝީދު ވިދާޅުވި އެވެ.

އެނގުން މުހިއްމު - މިއީ ހައިތަމް ސަލާމުގައި ހުންނަވާތީ ނަޝީދު އެކަން ފާހަގަކުރެއްވި ދެވަނަ ފަހަރެވެ. މިދިޔަ މަހުގެ 24 ގައި ބޭއްވި ޖަލްސާގައި ވެސް ނަޝީދު ވަނީ ހައިތަމްގެ ސަލާމުގެ މުއްދަތު ނިމޭ ދުވަހެއް އެނގިވަޑައިނުގަންނަވާ ކަމަށް ވިދާޅުވެފަ އެވެ.

"އަޅުގަނޑަށް ފާހަގަވޭ، މައްޗަންގޮޅި ދެކުނު ދާއިރާގެ އިއްޒަތްތެރި މެމްބަރު ސަލާން ނިމޭ ތާރީހެއް ވިދާޅުވެފައެއް ނެތް. ފެށުނީއްސުރެ ފަށައިގެން ސަލާމުގައި ދަމުންދަމުން މިދަނީ. އަޅުގަނޑުގެ ހިތަށް ވަދޭ މި އިއްޒަތްތެރި މެމްބަރު ކޮންތާކުބާއޭ އުޅުއްވަނީ" ނަޝީދު ވިދާޅުވި އެވެ.

ހައިތަމް ސަލާމުގައި ހުންނަވާ ސަބަބެއް މަޖިލީސް އިދާރާއިން ހާމަކޮށްފައެއް ނުވެ އެވެ.