ބައިކް މޯލްޑިވްސްގެ ކާމިޔާބު 10 އަހަރު ފާހަގަކޮށްފި

އެންމެ ފަހުން ބައިސްކަލެއްގެ ފާލުގަނޑުގައި ފައި އަޅައި އަނބުރާލި ދުވަސް ހަނދާން އެބަހުރި ހެއްޔެވެ؟ ބައިކް މޯލްޑިވްސްއަށް މިއީ މާ ދުރު ހަނދާނެއް ނޫނެވެ.

ބައިކް މޯލްޑިވްސްއަކީ ދުޅަހެޔޮ ދިރިއުޅުމަކަށާއި ހަރަކާތްތެރިވެ އުޅުމުށް ބާރުއަޅާ، ރާއްޖޭގައި ބައިސްކަލް ދުއްވުމަށް ކުރިއެކޭ އެއްގޮތަށް މީހުން ޝައުގުވެރިކުރުމަށް އުފައްދާފައިވާ ޖަމިއްޔާއެކެވެ. ވެެެއްޓަށާއި ހައްޓަށް ވެސް ރަނގަޅު މި ގޮތް ދިރުވުމުގެ މަސައްކަތުގައި މި ޖަމިއްޔާ ދެމިއޮންނަތާ 10 އަހަރު ފުރުން މިދިޔަ ހުކުރު ދުވަހު ވަނީ ފާހަގަކޮށްފަ އެވެ. ބައިކް މޯލްޑިވްސްއިން ބުނާ ގޮތުގައި މިއީ ކާމިޔާބު 10 އަހަރެވެ.

ބައިކް މޯލްޑިވްސްގެ ބާނީންނަކީ ޒުލޭހާ ހަސަން ދިީދީ އާއި އަހުމަދު ހަސަން ދީދީ އަދި މަރުހޫމް މާދިހު އިސްމާއިލް އެވެެ.

ވޭތުވެދިޔަ 10 އަހަރުތެރޭ ބައިކް މޯލްޑިވްސްއިން 300 އެއްހާ މެންބަރުން ހޯދާފައިވެ އެވެ. ރާއްޖެ އާއި ރާއްޖެއިން ބޭރުގެ އެކި އިވެންޓްތަކުގައި ބައިވެރިވެ އެކި އުމުުރުފުރައިގެ މީހުން އަލުން ބައިސްކަލަށް ހިތްޖައްސާފައި އެވެ. ބައިކް ކުޑަކުދިންނަށް ހާއްސަކޮށްގެން ބައިސްކަލް ދުއްވުމުގެ މުބާރާތެއް ބާއްވައި އެތައް ކުދިންނަށް ބައިސްކަލް ދުއްވަން ފަރިތަކޮށް ދަސްކޮށްދީ އެ ކުދިން އަމިއްލަ ނަފްސަށް ކުރާ އިތުބާރު އިތުރުކޮށްދީފައި އެވެ. އަދި ފާއިތުވި ފަސް އަހަރު ދުވަހު އިންޓަ ސްކޫލް ބައިސްކަލް ދުއްވުމުގެ މުބާރާތްތައް ކުރިއަށް ގެންގޮސްފައިވެ އެވެ.

ބައިކް މޯލްޑިވްސްގެ އެންމެ ތަފާތު އެއް ކަމަކީ، އެ މީހުންގެ ހަރަކާތްތައް މެދުކެނޑުމެއް ނެތި، ކޮންމެ ދުވަހަކު ފަތިހު ނިކުމެވޭ މީހުން ބައިސްކަލްގައި މާލެ ވަށާ ޖަހާ ބުރާއި މުޅި ބައިކް މޯލްޑިވްސް އާއިލާ އެއްކޮށްހެން ހުޅުމާލޭގައި ޖަހާ ބައިސްކަލް ބުރު ވެސް މިވީ 10 އަހަރު ތެރޭ ކުރިއަށް ގެންގޮސްފައިވާތީ އެވެ.

ބައިކް މޯލްޑިވްސްގެ 10 ވަނަ އަހަރީ ދުވަހުގެ ބައިސްކަލް ބުރު މިދިޔަ ހުކުރު ދުވަހު ހުޅުމާލޭ ސެންޓްރަލް ޕާކްގައި ކުރިއަށްގެންދިޔަ އެވެ. ޝަރަފުވެރި މެހުމާނުގެ ގޮތުގައި އެންވަޔަރްމެންޓް މިނިސްޓަރު ތޯރިގު އިބްރާހިމް ބައިވެރިވެވަޑައިގެންނެވި އެ އިވެންޓް ހާއްސަކުރީ ޖަމިއްޔާގެ އެއް ބާނީ މަރުހޫމް މާދިހް އިސްމާއިލްގެ ހަނދާނަށެވެ.

ބައިކް މޯލްޑިވްސްގެ ޖެނެރަލް ސެކްރެޓަރީ އަސްމާ ހަސަން ވިދާޅުވި ގޮތުގައި ކުރިއަށް އޮތް ރޯދަ މަހު އެ ޖަމިއްޔާ އާއި އެސްއެސްޓީވީ ގުޅިގެން ވަރަށް ހާއްސަ ޕްރޮގްރާމްތަކެއް ކުރިއަށް ގެންދިއުމަށް މިހާރު އަންނަނީ ތައްޔާރުވަމުންނެވެ.

ބައިކް މޯލްޑިވްސްގެ އެގްޒެކެޓިވް މެންބަރުންގެ ފަރާތުން އޮތީ އެ މީހުންގެ މެންބަރުންނަށް ޝުކުރުވެރި ހިތެކެވެ. އަދި ކުރިއަށް ހުރި އަހަރުތަކުގައި އިތުރު ލަނޑުދަނޑިތައް ހާސިލް ކުރުމަށް "ޕެޑަލިން ފޯވަޑް" ޝިއާރުގެ ދަށުން މަސައްކަތް ކުރުމަށް މި ޖަމިއްޔާ އިން ވަނީ ނިންމައިފަ އެވެ.