ހުޅުމާލޭގައި ހުޅުވާފައިވާ ޓޮޑީގެ އާ ފިހާރަ (ފޮޓޯ/ޓޮޑީ)
ދިވެހި ބްރޭންޑު ޓޮޑީގެ އާ ފިހާރައެއް ހުޅުމާލޭގައި ހުޅުވައިފި
ޓޮޑީ އަކީ ރާއްޖޭގެ ބްރޭންޑުތަކުގެ ތެރެއިން ދިވެހިންގެ ތެރޭގައި މަގުބޫލު ބްރޭންޑެކެވެ. ދެބެއިން ކަމަށްވާ އަހްމަދު ރިޔާޒް (ރިޔާ) އާއި މުހައްމަދު ފަޔާޒް (ފަޔާ) ގުޅިގެން 2009 ވަނަ އަހަރު އުފެއްދި ބްރޭންޑުގެ އަމާޒަކީ ތަފާތު އަމިއްލަ އުފެއްދުންތަކެއް އަބަދުވެސް ނެރުމެވެ. މިހާތަނަށް ޓޮޑީ އިން ވަނީ އެކި ޑިޒައިންތަކުގެ ޓީޝާޓާއި އަވިއައިނާއި ތޮފި އަދި ގަހަނާ ވެސް އުފައްދާފަ އެވެ.
ހުޅުމާލޭގެ ބަގީޗާހިނގުމަށް ވާ ގޮތަށް، ސިޓީ ބޭކަރީ އާއި ސެންޓްރަލް ޕާކް ކައިރީގައި ހުޅުވާފައިވާ ޓޮޑީގެ އާ ފިހާރަ އަކީ އެ ބްރޭންޑުގެ ހިތްގައިމު ޑިޒައިންތައް ފަދައިން ނަލަކޮށް ފަރުމާކޮށްފައިވާ ތަނެކެވެ.
ފިހާރައިގައި ޓޮޑީގެ އުފެއްދުންތައް އަތުރައިފައި ހުރީ ވަރަށް ހިތްގައިމުކޮށް، ކޮންމެ ޕްރޮޑަކްޓެއް ވެސް ފަސޭހައިން ބަލާލެވޭ ގޮތަށެވެ.
ޒުވާނުންގެ މެދުގައި މަގުބޫލު ޓޮޑީގެ އާ ފިހާރަ ހުޅުވުމާ ދިމާކޮށް އެ ބްރޭންޑުގެ އިތުރު ޑިޒައިންތަކެއް ވެސް ވަނީ ތައާރަފު ކޮށްފަ އެވެ. އެގޮތުން ޓޮޑީގެ މަގުބޫލު 'މަސް އައިނު' ކަލެކްޝަނުގައި މިފަހަރު ކުޑަކުދިންނަށް ހާއްސަ އަވިއައިނު ވަނީ ހިމަނައިފަ އެވެ. މި ކަލެކްޝަނުގައި އެކި ކުލަތައް ހިމެނެ އެވެ. އަދި ކުޑަކުދިންނަށް ހާއްސަ ތޮފި ވެސް މިފަހަރު ވަނީ ތައާރަފު ކޮށްފަ އެވެ.
ފަޔާޒު ބުނިގޮތުގައި ޓޮޑީގެ އުފެއްދުންތަކުގެ ލިސްޓު ދާނީ ދިގުވަމުންނެވެ. ކައިރި މުސްތަގުބަލެއްގައި ލައިފްސްޓައިލް ޕްރޮޑަކްޓްތަކެއް ތައާރަފު ކުރާނެ ކަމަށް ވެސް އޭނާ ބުންޏެވެ.
ޓޮޑީގެ އުފެއްދުންތަކުގެ އިތުރުން ދިވެހި އެހެން ދެ ބްރޭންޑެއްގެ އުފެއްދުންތައް ވެސް ފިހާރައިގައި ވިއްކަން އެބަހުއްޓެވެ. އެއީ ޑޭވީ އާއި ރަނިން އެވެ.
ޑޭވީ އަކީ 'އެސެންޝަލްސް' އާއި ބާމު ވިއްކަމުން އަންނަ ބްރޭންޑެކެވެ. ޓޮޑީ ފިހާރައަށް އިތުރުވާ އުފެއްދުމެއްގެ ގޮތުގައި ޑޭވީގެ 'ނެޗުރަލް ޑައި ޕްރޮސެސް' އަކުން އުފައްދާފައިވާ ސްކާފްތަކެއް ވަނީ ތައާރަފު ކޮށްފަ އެވެ.
ރަނިން އަކީ ގަހަނާ އުފައްދާ ބްރޭންޑެކެވެ. ޓޮޑީ ފިހާރައިން ލިބެން ހުންނަ ރަނިން ގަހަނާއިން ދައްކުވައިދެނީ ރާއްޖޭގެ ނަލަ ކުޅިތަކުން ފެންނަ އެކި 'އެލެމެންޓްސް' އެވެ.
ޓޮޑީ އިން ބުނިގޮތުގައި އާ ފިހާރައެއް ހުޅުވުމުގެ މުނާސަބަތުގައި ހުރިހާ ޕްރޮޑަކްޓްތަކަކުން %10ގެ ޑިސްކައުންޓެއް ފުރަތަމަ ހަފްތާތެރޭ ލިބޭނެ އެވެ. ޓޮޑީ ފިހާރަ ހުޅުވާފަ ހުންނަނީ އާދީއްތަ ދުވަހުން ބުރާސްފަތި ދުވަހަށް މެންދުރުފަހު 1 އިން 4 އަށް އަދި ރޭގަނޑު 8 އިން 10 އަށެވެ. ހޮނިހިރު ދުވަހު ހުޅުވާފައި ހުންނަނީ 2 އިން 4:30 އަށެވެ. ހުކުރު ދުވަހު ފިހާރަ ބަންދުވާނެ އެވެ.
ޓޮޑީގެ ވެބްސައިޓު މެދުވެރިކޮށް އެ ބްރޭންޑުގެ ކޮންމެ އުފެއްދުމެއް ވެސް ގަނެވޭނެ އެވެ. އަދި ޓޮޑީގެ އިންސްޓަގްރާމް ޕޭޖުން ވެސް އެ ބްރޭންޑުގެ އުފެއްދުންތައް ފެންނާނެ އެވެ.
ކޮމެންޓް (1)
ޕާޕާ