ދިވެހި ވަޑިއެއްގެ ހުނަރުވެރިކަން މި ލަގްޒަރީ ސަފާރީން

މިއީ ރ. އިންނަމާދޫގެ މާވަޑި އަބްދުﷲ އާތިފް ބަން ފަސްވަނަ ސަފާރީ އެވެ. އެކަމަކު ދުވަހަކު އޭނާ އަދި ނުބަންނަވަރުގެ ބޮޑު އަދި ފުރިހަމަ އުޅަނދެކެވެ. ލަގްޒަރީ  ސަފާރީގެ މަސައްކަތް ނިންމައި ބާލައި އިންނަމާދޫ ފަޅުތެރެއަށް ފުންކޮށްފައި އޮތް އިރު ގިނަ ބައެއްގެ ލޮލުގައި އެ ވަޑީގެ ހުނަރުވެރިކަން އަންނަނީ އަޅައިގަންނަމުންނެވެ.

ރ. އަތޮޅުގައި، ނޫނީ މިފަހުން ރާއްޖޭގައި ވެސް، ބަން އެންމެ ބޮޑު މި ސަފާރީގައި 45 މީޓަރު ހުރެ އެވެ. އުޅަނދުގެ ކޮޓަރިތަކާއި ފާހާނާތައް މިފަދަ އެހެން އުޅަނދުތަކާ ބަލާއިރު ބޮޑެއްޗެވެ. ސަފާރީގެ ވަށައިގެން ފެންނަނީ ހުނަރުވެރިކަމެވެ. ދިވެއްސެއްގެ ފަންނުވެރިކަމެވެ.

"އެންމެ ހިތްހަމަޖެހެނީ ކަނޑައަޅާފައިވާ މުއްދަތަށް ވުރެ ލަސްނުވެ މި މަސައްކަތް ނިންމާލެވުނީމަ. އެއީ މިފަދަ މަސައްކަތެއްގައި ވަރަށް ބޮޑު ކާމިޔާބީއެއް،" އެއް އަހަރާއި ހަތް މަސް ދުވަހުން ނިންމާލި މަސައްކަތާ ގުޅޭގޮތުން، 48 އަހަރުގެ ވަޑި ބުންޏެވެ.

އާތިފަކީ އެންމެ ޒުވާން ދުވަސްވަރުން ފެށިގެން ވަޑިއެކެވެ. ފުރަތަމަ މާލެ ސަރަހައްދުގައި، މީހުންގެ ކައިރީގައި މަސައްކަތް ކުރުމަށް ފަހު، އަމިއްލަ ރަށުގައި ގާއިމްވެ ހުރެ މަސައްކަތް ކުރަން ނިންމީ 2006 ވަނަ އަހަރު އެވެ. އަމިއްލަ ކުންފުންޏަކާއި ދޯނި ބަންނަ ޔާޑެއް ހަދައިގެން މަސައްކަތް ފެށީ، ތަމްރީނުކޮށްފައިވާ މުވައްޒަފުން ބައިތިއްބައިގެންނެވެ.

ހުނަރުވެރި ވަޑިން ގިނަ އިންނަމާދޫގައި ފެށި މި ވިޔަފާރި ވަރަށް ކާމިޔާބެވެ. ފުރަތަމަ، ލަކުޑި އުޅަނދުގައި ފައިބަރު ޖަހައިގެން، ފަހުން މުޅިން އެއްކޮށް ފައިބަރުގައި ބޮޑެތި ދޯނިތައް ބަނެވެ. އަދި ވިޔަފާރި ފުޅާވެ، އާތިފްގެ ޔާޑުން ސަފާރީ ފަދަ އުޅަނދުތައް ބާލަން ފެށި އެވެ.

"މިހާރު ބާލާފައި އެ އޮތީ އަޅުގަނޑުގެ އެންމެ ބޮޑު ސަފާރީ. އަދި މިހާރު ވެސް އޭގެ އިތުރު ތިން ސަފާރީގެ މަސައްކަތް ކުރިއަށް އެބަދޭ،" މާލަސްތަކެއް ނުވެ އެ ސަފާރީތައް ވެސް ބޭލޭނެ ކަމުގެ ޔަގީންކަމާ އެކު އާތިފް ބުންޏެވެ.

ދިވެއްސަކަށް އޭނާ ބަނދެދިން އެ ސަފާރީއަކީ އޭގެ ވެރިމީހާ ޑިޒައިންކޮށްފައިވާ އުޅަނދެކެވެ. އެކަމަކު އެހާ ފުރިހަމަކޮށް އުޅަނދު ނިންމާލުމުގައި އާތިފްގެ ހުނަރުވެރިކަމާއި ޝައުގުވެރިކަން މުހިއްމު ރޯލެއް ކުޅެ އެވެ.

މިހާރު އޭނާގެ ކައިރީގައި ގިނައިން މަސައްކަތް ކުރަން އުޅެނީ ސްރީ ލަންކާގެ މީހުންނެވެ. އާތިފްގެ އުއްމީދަކީ އެ މަސައްކަތުގައި ގިނަ ދިވެހިން ބައިވެރިވެ، އެ މީހުންގެ ހުނަރުވެރިކަން ފެނުމެވެ.