ޒައިން: އޭނާ އަކީ ރާއްޖޭގެ ފުރަތަމަ އޯޓިސްޓިކް ޚަތީބު
ޒައިންގެ އެ ނުކުޅެދުން އޭނާގެ ހުވަފެނުގެ ހުރަހަކަށް ނުވި، މާދަން އިމާމުވެ ހުކުރުކުރާނެ
ދަރިފުޅު ވަރަށް ކުޑައިރުއްސުރެ، މަންމަ ޝާނިޔާ އިބްރާހިމް ކައިރީގައި ބުނެ އެވެ؛ އަހަރެން ވާނީ އިމާމަކަށެވެ. މިސްކިތުގައި ހުތުބާ ކިޔާނަމެވެ. ތަރާވީސް ކުރާނަމެވެ.
އެކަމަކު އޯޓިސްޓިކް ދަރިފުޅުގެ އެ އުއްމީދުތައް، އޭރު ޝާނިޔާއަށް ސިފަވެފައިވަނީ ކުލަ ނެތް ހުވަފެނެއްގެ ގޮތަށެވެ. ނުކުޅެދުންތެރިކަން ހުންނަ ކުއްޖަކަށް ވެފައި، މިސްކިތެއްގެ އިމާމަކަށް ވުމުގެ ފުރުސަތު ލިބުމަކީ، ވުމަށް ވުރެ ނުވުން ގާތް ކަމެއް ކަމަށް ބެލެވިފައި އޮތީ އެވެ.
އެކަމަކު ދަރިފުޅު، ހުސެން ޒައިން އަލީގެ ނުގުޑާ އަޒުމާއި ކެތްތެރިކަމުގެ މޭވާ ފޮންޏެވެ. ޒުވާން ޚަތީބުން އުފެއްދުމަށް މި ސަރުކާރުން ފެށި ޕްރޮގްރާމްގެ ދަށުން، މާދަމާ ހުޅުމާލޭގެ މަސްޖިދުލް އަމާނީގައި އިމާމުވެ ހުކުރު ކުރާނީ 17 އަހަރުގެ ޒައިންނެވެ. މިއީ އޯޓިސްޓިކް ކުއްޖެއް، ރާއްޖޭގައި ހުކުރު ކުރާ ފުރަތަމަ ފަހަރެވެ.
"ވަރަށް، ވަރަށް އުފާވެފައި މިހިރީ. ހިޔެއް ނުކުރަން މި ދުވަސް ފެންނާނެ ކަމަކަށް ވެސް،" ދެ ކުދިންގެ މަންމަ ބުންޏެވެ.
ޝާނިޔާ ކިޔައިދިން ގޮތުގައި ހަގަށް ދެ ވަނައަށް ހުންނަ އޭނާގެ ދަރިފުޅަކީ އެންމެ ކުޑައިރުއްސުރެ 'ޚަތީބެކެވެ.' އޯޓިސްޓިކް ކުއްޖަކަށް ވުމުން ވާހަކަ ނުދެއްކުނަސް، އުމުރުން ހަތަރު އަހަރުގައި ގޭގައި ބަންގި ގޮވަން ފަށައިފި އެވެ. ގަމަތްދީ ނަމާދުކޮށް، ހުކުރު ހުތުބާ ވެސް ކިޔަން ފަށައިފި އެވެ. ހުކުރު ދުވަހުގެ އެ ވަގުތަށް އޭނާ ދިގު އިންތިޒާރެއް ކުރެ އެވެ. ބައްޕައާ އެކު މިސްކިތަށް ދިޔަޔަސް އެހެން ހުރިހާ ކަމަކަށް ވުރެ، އޭނާގެ ލޯ ހުއްޓިފައި ހުންނާނީ އިމާމަށެވެ.
ދަރިފުޅުގެ ނުކުޅެދުންތެރިކަމާ އެކު ދިރިއުޅުން ވީ، މިހާރު މާލޭގައި ރަޖިސްޓްރީވެފައިވާ އެ އާއިލާއަށް ކުރިން ފަސޭހަ ކަމެއް ނޫނެވެ. ކޮންމެ ދުވަހަކު ވެސް އާ ގޮންޖެހުންތަކަކާ ކުރިމަތިލާން ޖެހެ އެވެ. ބަލީގެ ގޮތުން، ބޭރަށް ނުކުމެ އުޅުމާއި މީހުންގެ ތެރޭގައި އުޅުމާއި މުއާމަލާތުކުރަން ޒައިންއަށް އުނދަގުލެވެ. އެކަމަކު ކޮންމެ ދުވަހަކު ދޭ ތެރަޕީތަކާ އެކު، ދަރިފުޅުގެ އުޅުމާއި ދިރިއުޅުމަށް ބޮޑެތި ކުރިއެރުންތަކެއް އައިއިރު، ހަތީބަކަށް ވުމަށް އޭނާ ދެކެމުން އައި ހުވަފެނާ މެދު އާއިލާއިން އުއްމީދު ވެސް ކަނޑައެއް ނުލަ އެވެ.
ޒުވާން ހަތީބުން ތައްޔާރުކުރުމުގެ ޕްރޮގްރާމްގައި ޒައިން ބައިވެރި ކުރުވީ ވެސް، އެކަން ހާސިލްކޮށްދިނުމުގެ ގޮތުންނެވެ.
ހުތުބާ ކިޔުމަށް ދަރިފުޅު އޮންނަ ޝައުގުވެރިކަން ކިޔައިދެމުން ޝާނިޔާ ބުނީ، ބުރާސްފަތި ދުވަހު، އިސްލާމިކް މިނިސްޓްރީގެ ވެބްސައިޓަށް ހުކުރު ހުތުބާ ލުމާ އެކު ޒައިން އެ ޑައުންލޯޑްކޮށްގެން، ކިޔަން ފަށާ ކަމަށެވެ. ހުކުރަށް ދިޔުމުގެ ކުރިން އެ ހިތުދަސްކުރެ އެވެ. ފަހަރެއްގައި މިސްކިތަށް ނުދެވުނު ކަމުގައި ވިޔަސް، ވަގުތު ޖެހުމާ އެކު އޭނާ ޚަތީބަކަށްވެ، އެ ހުތުބާ ކިޔައި ނަމާދު ކުރެ އެވެ. އެއީ އޭނާގެ އުމުރުން 12 އަހަރުން ފެށިިގެން އާދައެކެވެ.
"އެ ހެޔޮ ކޮންމެ ތަނެއްގައި ހުއްޓަސް. ރާއްޖޭން ބޭރުގައި ހުރި ކަމުގައި ވިޔަސް. ހުކުރު ދުވަހުގެ ވަގުތު ޖެހުމާ އެކު އޭނާ ހުތުބާ ކިޔައި ނަމާދު ކުރާނެ،" ޝާނިޔާ ބުންޏެވެ.
"މިސްކިތަށް ނުދެވިއްޖެ ނަމަ އޭނާގެ ހަގަށް ހުންނަ ކޮއްކޮއާ އެކު އިމާމުވެ ހުކުރު ކުރާނީ."
އިމާމަކަށް ވުމުގެ ފުރުސަތުު އޭނާއަށް އެންމެ ރަނގަޅަށް ލިބުނީ ކޮވިޑް-19ގެ ބަލިމަޑުކަމުގައި، ގޭގައި ބަންދުވެގެން ތިބެން ޖެހުނު އިރު އެވެ. އޭރު ގޭގެ އެންމެން ވެސް ނަމާދު ކުރީ ޒައިންގެ ފަހަތުގަ އެވެ. އެއީ، އުމުރުން ހަތް އަހަރުން ފެށިގެން އެންމެ ނަމާދެއް ވެސް ވައްޓާނުލައި ކުރަމުން އައި އެ ޒުވާނާއަށް އުފާވެރި ވަގުތެކެވެ.
ޝާނިޔާ ކިޔައިދިން ގޮތުގައި ނަމާދު ވަގުތަށް ދަރިފުޅު އިންތިޒާރު ކުރެ އެވެ. ބަންގި ގޮވުމުގެ 15 މިނިޓް ކުރިން، އޭނާ އިންނާނީ ފެންވަރައި ރީތިވެލައިގެން، ނަމާދަށް ދާން ތައްޔާރުވެގެންނެވެ. ބޮލުގައި ތާކިހާ އަޅައި، ނަމާދު ކުރުމަށް ހާއްސަކޮށްފައިވާ ކުރުތާ ލައި ޖަރީވެގެންނެވެ. ފަތިސް ނަމާދަކަސް އިޝާ ނަމާދަކަސް އޭނާގެ އެ އާދައަކަށް ބަދަލެއް ނާދެ އެވެ.
ތާޖުއްދީން ސްކޫލުގެ ގްރޭޑް 10ގައި ކިޔަވަމުން އަންނަ މި ދަރިވަރު، ކިޔެވުމުގައި ވެސް ތޫނުފިއްޔެވެ. އޭނާ ކަންކަން ދަސްކުރާލެއް އަވަހެވެ. ގުރުއާނުގެ 11 ފޮތް މިހާރު ހިތުދަސްކޮށްފައިވަނީ އޭގެ މާނައާ އެކުގަ އެވެ. ގުރުއާނުގެ ތަރުޖަމާއަކީ ވެސް އޭނާ ހާއްސަ ސަމާލުކަމެއް ދީގެން ދަސްކުރަމުން އަންނަ ބައެކެވެ.
ޒައިން އާއި އޭނާގެ އާއިލާ މިހާރު އިންތިޒާރު ކުރަމުން އަންނަނީ މާދަމާގެ ހުކުރު ވަގުތަށެވެ. ލޯޔަރެއްގެ ގޮތުގައި މަސައްކަތް ކުރާ ބައްޕަ އަލީ ރިޒާ އާއި ދެން ތިބި ބޭބެމެން ވެސް އެ ދުވަހު ހުކުރަށް ދާނީ ފަހުރުވެރިކަމާ އެކު އެވެ. ނުކުޅެދުންތެރިކަން ހުރި ކަމުގައި ވިޔަސް، ކުރިއަށް ދިޔުމަށް ދަރިފުޅަށް މަގު ދައްކައިދީ އަދި ލިބުނު ފުރުސަތުގެ ބޭނުން ހިފަން ދަސްކޮށްދެވުނީތީ އެވެ.
އެންމެ ކުޑައިރުއްސުރެ ޒައިން ކުރަމުން އައި އިންތިޒާރުގެ ނިމުން ދެކިލުމަށް އެމީހުން ތިބީ ކެތްމަދުވެފަ އެވެ.
ކޮމެންޓް (10)
ސާބަސް
ހަސަން
ޙަސަން
އިއްބޭ
އަސީ
ނަޖާޙް
ނަސީ
ެ منعم
ހިއްވަރު
ހަލީމު.