އަންބަލަންގެ އަކީ ރާއްޖޭގައި ފުރަތަމަ ފަހަރަށް ހަމައެކަނި އަންހެނުން ތިލޭރުކަން ކޮށްގެން ގަހަނާ އުފައްދާ ވިޔަފާރިއެއް (ފޮޓޯ/އަންބަލަންގެ)
ފަސް އަންހެނެއްގެ އަންބަލަންގެ އިން މި ދަސްކޮށްދެނީ ތިލޭރުކަން
ރާއްޖޭގައި އަމިއްލަ ބްރޭންޑުތައް އަންނަނީ އިތުރުވަމުންނެވެ. އަދި ކޮންމެ ބްރޭންޑެއް ވެސް އެހާމެ ތަފާތުވެފައި އުފެއްދުންތެރި އެވެ. އެކަމަކު އޭގެ ތެރެއިން ފާހަގަ ކޮށްލެވޭ ހާއްސަ އެއް ބްރޭންޑެއް ވެ އެވެ. އެއީ ފަސް ރަހުމަތްތެރިއަކު ގުޅިގެން މީގެ ދެ އަހަރު ކުރިން ވުޖޫދަށް ގެނައި އަންބަލަންގެ އެވެ.
ޝަދްޔާ އަދީލް ޖަލީލް، މަރިޔަމް އިބްރާހިމް، ހަދީޖާ ނަޒްވާ، އާމިނަތު ޖުލައިލާ އަދި އައިޝަތު ރިފްގާ އާޒިމް ފުރަތަމަ ބައްދަލުވީ މޯލްޑިވްސް އިންސްޓިޓިއުޓް އޮފް ޓެކްނޮލޮޖީ (އެމްއައިޓީ)ގެ ގަހަނާ ކޯހަކުންނެވެ. ތިލޭރުކަން ދަސްކުރުމުގެ ތެރެއިން މި ފަސް އަންހެނުން ރަހުމަތްތެރިންނަށް ބަދަލުވެ، އެމީހުންގެ ހުނަރުން ފުރިފައިވާ ހުވަފެންތައް ހަގީގަތަކަށް ހަދަން ލަސްތަކެއް ނުވެ މަސައްކަތް ފެށި އެވެ.
ބްރޭންޑްގެ ތަފާތުކަން އިތުރުކޮށްދޭ އަނެއް ކަމަކީ ދީފައި އެވާ ތާރީހީ އަދި މާނަ ފުން ނަމެވެ. އަންބަލަންގެ އަކީ އިހުޒަމާނުގައި އަންހެނުންނަށް ހާއްސަ ތަނެކެވެ. އަންހެނުން އެއްވެ ވާހަކަދައްކާ، ކައްކާ، އަތްތެރި މަސައްކަތް ކުރަން ގޭގެ ދެކުނު ފަރާތުގައި ވަކިން ހަދާފައި ހުންނަ ބަޔަކަށް ކިޔާ ނަމެކެވެ.
އަންބަލަންގެ އަކީ މިހާރު ރާއްޖޭގެ ސަގާފަތުން ނެތިފައިވާ، ހަމައެކަނި ސުކޫލު ފޮތްތަކުން ކިޔައިދޭ ދުރު ހަނދާނަކަށް ވެފައިވީ ނަމަވެސް މި ފަސް ތިލޭރުވެރިން ވަނީ އަނެއްކާވެސް އަންބަލަންގެ އޭގެ ހަގީގީ ރޫހުގައި އަނބުރާ ގެނެސްދީފަ އެވެ.
މިހާތަނަށް އެ ބްރޭންޑުން އުފައްދާފައިވާ ގަހަނާއަކީ ވަރަށް ޗާލު، އަބަދު އަޅައިގެން އުޅެވޭނެ ޑިޒައިންތަކެކެވެ. ކޮންމެ އުފެއްދުމަކަށް ވެސް ހިޔާލު ހޯދަނީ ރާއްޖޭގެ މުއްސަނދި ސަގާފަތުންނެވެ. އެގޮތުން 'މެކްރަ މަހި' ކަލެކްޝަންގައި ހިމެނެނީ ދިވެހި ފައްޓަރުބައިން ނަމޫނާ ނަގައިގެން ޒަމާނީ ގޮތަކަށް އުފައްދާފައިވާ ގަހަނާ އެވެ. އަދި 'ތަކަފަތި' އަކީ ކުޅިތަކުން ފެންނަ މާމެލާމެއްޔާއި ގަސްގަހުން ހިޔާލު ހޯދައިގެން ނެރެފައިވާ އުފެއްދުމެކެވެ.
"އަތުން ގަހަނާ ފަރުމާ ކުރުމަކީ ފަސޭހަ ކަމެއް ނޫން. ކޮންމެ އެއްޗެއް ތައްޔާރު ކުރަން ވަރަށް ބޮޑަށް ޕްރެކްޓިސްކޮށް ކެތްތެރިވާން ޖެހޭ. އަދި ގިނަ އިރު އިށީނދެ އިނދެ، ކުދިކުދި ޑީޓެއިލްތަކަށް މަސައްކަތްކުރުމުގެ ކެތްތެރިކަން ހުންނަންޖެހޭ. އެހެންވެ ކެތްތެރިވުމަކީ މިހާތަނަށް އަޅުގަނޑުމެންނަށް ދަސްވި އެންމެ އަގުބޮޑު އެއް ކަންތައް،" ޝަދްޔާ ކިޔައިދިނެވެ.
އަމިއްލަ އަތުން އުފައްދާ ގަހަނާއޭ ބުނުމުން އަދި އެއީ ކިހާ ވަރެއްގެ މަސައްކަތަކާއި ވަގުތެއް ހޭދަވާ ކަމެއްކަން މީހަކަށް ފުންކޮށް ނަގައިގަންނަން ދަތި ވެދާނެ އެވެ. އަޅުގަނޑަށް ވެސް ފުރަތަމަ އަންބަލަންގޭގެ އުފެއްދުންތައް ފެނިފައި ކުރެވުނު އިހުސާސްތަކާއި އެމީހުންގެ ތިލޭރުކަމުގެ ކްލާހުގައި ބައިވެރިވެ އެ މަސައްކަތް ތަޖުރިބާ ކޮށްލުމަށް ފަހު ދެން ކުރެވުނު އިހުސާސްތައް އުޑާއި ބިމާހާ ތަފާތެވެ. ކޮންމެ ގަހަނާއެއް ތައްޔާރު ކުރަން އެތައް ވަގުތެއް ހޭދަ ވެ އެވެ. އެތައް މަރުހަލާތަކެއް ކަޑައްތު ކުރަންޖެހެ އެވެ. އެއިން އެއްވެސް ކަމެއް އޮޅިގެން ގޯސްކޮށް ކުރެވިއްޖެ ނަމަ އަނެއްކާވެސް ޖެހޭނީ ފަށާށެވެ. ނުވަތަ އެތަނެއް ރަނގަޅު ކުރަން ހަމަ އެހާ ވަގުތު ދެ އެވެ.
އަންބަލަންގެއިން ފުރަތަމަ ފަހަރަށް ހިންގާ ތިލޭރުކަމުގެ ވޯކްޝޮޕްގައި ބައިވެރިވެގެން ވަރަށް ގިނަ ކަންކަން އަޅުގަނޑަށް ދަސްވުމުގެ އިތުރުން އެމީހުން ކޮންމެ ގަހަނާއެއް ވެސް އުފެއްދުމުގައި ގެންގުޅޭ ފަރުވާތެރިކަމާއި ޝައުގުވެރިކަމަށް އިތުރު އިހުތިރާމެއް ކުރެވުނެވެ. ކޮންމެ އެއްޗެއް ވެސް ތައްޔާރު ކޮށްފައިވަނީ ވަރަށް ލޯބިންކަން ކަށަވަރުވި އެވެ.
އަންބަލަންގެ އިން މިދިޔަ މަހު 3 ގައި ފެށި 'ކްރާފްޓް އަ ރިންގް' ވޯކްޝޮޕްގައި ބައިވެރިވާ މީހުންނަށް ރިހި އަނގޮޓިއެއް ފަރުމާ ކުރާނެ ގޮތް ދަސްކޮށްދެ އެވެ. އަދި ބޭނުންވާ މެޓީރިއަލް ދިނުމުގެ އިތުރުން އުފައްދާ އަނގޮޓި އެ މީހަކު ގެންދަން ލިބެ އެވެ.
އަންބަލަންގޭގެ ސްޓޫޑިއޯގައި ކުރިއަށްދާ މި ވޯކްޝޮޕަށް ތަން ތައްޔާރު ކޮށްފައިވަނީ ވަރަށް ތަރުތީބުކޮށް ކޮންމެ މީހަކަށް ވެސް އިށީނދެ އިނދެގެން ހުރިހާ ވަސީލަތެއް ވެސް ފަސޭހައިން ބޭނުންކުރެވޭ ރައްކާތެރި ގޮތަކަށެވެ. އަދި ކޮންމެ މަރުހަލާއެއް ގާތުން ކިޔައިދޭން އަންބަލަންގޭގެ ތިލޭރުން ތިބޭނެ އެވެ.
"މި ވޯކްޝޮޕްގެ ޒަރިއްޔާއިން އަޅުގަނޑުމެންގެ މުޖުތަމައު ދެނެގަނެ، ގަހަނާއެއް އުފައްދަން ކުރަންޖެހޭ މަސައްކަތް މީހުންނަށް ދައްކައިދޭން ބޭނުންވި. ހޭންޑްމޭޑް ގަހަނާ އަގުބޮޑުވަނީ ކީއްވެގެން ކަމާއި މިކަހަލަ ފަންނެއް އުފާވެރި މާހައުލެއްގައި ތަޖުރިބާކޮށްލަން ބައިވެރިންނަށް ފުރުސަތު ދޭން ބޭނުންވި،" ޝަދްޔާ ބުންޏެވެ.
ރާއްޖޭގެ އެންމެ 'އޯތެންޓިކް' ބްރޭންޑުގެ ޝަރަފަކީ އަންބަލަންގެ އިން އެންމެ ބޮޑަށް ހާސިލު ކުރަން ބޭނުންވާ އެއް ލަނޑުދަނޑި އެވެ. ފަންނުވެރިންގެ ގޮތުގައި އަބަދުވެސް އާ ޑިޒައިންތަކެއް އުފައްދަން ޖެހެ އެވެ. އަދި ނެރެފައިވާ ޑިޒައިންތަކަށް އޯޑަރު ތައްޔާރު ކުރުމަކީ އެއިން ކޮންމެ އެއްޗެއް ފަށައިން ނިމެންދެން ތައްޔާރު ކުރުމެވެ. އޭގެ އިތުރުން، ބްރޭންޑުގެ ފަހަތުގައި ތިބި ގިނަ މީހުންނަކީ މައިންނަށް ވާތީ، އޯޑަރުތައް ގަޑިއަށް ނިންމަން ވަގުތު ހޯދަން ޖެހެނީ ގޭތެރޭގެ މަސައްކަތްތައް ވެސް ކުރަމުންނެވެ.
"ވަގުތު މެނޭޖު ކުރުމަކީ އަޅުގަނޑުމެން ކުރިމަތިލާންޖެހޭ އެންމެ ބޮޑު ގޮންޖެހުން. އަނެއް ކަމަކީ ބޭނުންވާ ހުރިހާ ސާމާނެއް ރާއްޖެ އިން ހޯދަން ނުވަތަ ގަންނަން ނުލިބުން،" ޝަދްޔާ ކިޔާދިނެވެ.
މި ގޮންޖެހުންތަކާ އެކު ވެސް އަންބަލަންގެ އިން ވަނީ ދިވެހިންގެ އިހުތިރާމާއި ތައުރީފު ހޯދާފަ އެވެ.
ތިލޭރުކަން ފަދަ މަސައްކަތަކުން އަމިއްލަ އުފެއްދުންތަކެއް ނެރެން މި އަންހެނުން އެ ކުރާ ހިތްވަރަކީ ވަރަށް ތަފާތު އަދި ފަހުރުވެރި ކަމެކެވެ. ސަބަބަކީ ތިލޭރުކަމަކީ ރާއްޖޭގައި ޒަމާނުއްސުރެ ފިރިހެނުން ކޮށް އުޅުނު މަސައްކަތެކެވެ.
އަންބަލަންގެ އިން ވަނީ އިހުގެ މަސައްކަތަކާއި ސަގާފަތެއް ޒަމާނީ ބަދަލަކާ އެކު ދިރުވައި، އާ ފެށުމެއް ގެނެސްދީފަ އެވެ. އެކަން ތަޖުރިބާކޮށްލަން ބޭނުންވާ މީހުންނަށް، އެ ބްރޭންޑުގެ 'ކްރާފްޓް އަ ރިންގް' ވޯކްޝޮޕް މި މަހުގެ 10ގެ ނިޔަލަށް ވަނީ ހުޅުވާލާފަ އެވެ.
ކޮމެންޓް (4)
އައިޝާ
އިނާ
ޏަމްނަމް
އޭނަ