ވީކެންޑް މައިގްރޭން މިއީ އަސްލު ވާ ކަމެއްތަ؟

މައިގްރޭންއަކީ ވަރަށް އާއްމު ކަމެކެވެ. އޭގެ ވޭނާއި ތުރާ ގިނަ ބަޔަކު ތަޖުރިބާ ކުރާ ވެސް ކަމެކެވެ. މުޅި ހަފްތާގައި ބޮލުގައި ނުރިއްސާ ހުރެފައި ހަފްތާ ބަންދާ ދިމާކޮށް މިކަމާ ކުރިމަތިލަނީ ކޮން ބައެއް ހެެއްޔެވެ؟

ވީކެންޑް މައިގްރޭންއަކީ ހަފްތާ ތެރޭ ބިޒީކޮށް އުޅުމަށް ފަހު ހަފްތާ ބަންދު އައުމުން ކުރިމަތިވާ ބޮލުގެ ރިހުމެކެވެ. މިކަން މެދުވެރިވަނީ މުޅި ހަފްތާގެ ސްޓްރެސް އާއި ޓެންޝަންތައް ދޫކޮށްލުމުންނެވެ. މިކަމަށް ބައެއް ފަހަރު "ލެޓް ޑައުން މައިގްރޭން"އޭ ވެސް ކިޔަ އެވެ. ކުއްލިއަކަށް ސްޓްރެސް ލެެވެލްތަކަށް ބަދަލު އައުމުން މައިގްރޭން އެޕިސޯޑަކާ ކުރިމަތިލާން ޖެހެނީ އެވެ.

އޮފީހެއްގެ އިސް މަގާމެއްގައި މަސައްކަތް ކުރާ އުމުރުން 40އާ ގާތްކުރާ އަންހެނަކު ބުނިގޮތުގައި ކޮންމެ ހަފްތާ ބަންދަކު އޭނާގެ ބޮލުގައި ރިއްސަ އެވެ. މައިގްރޭންއާ ހެދި ބާލީހުން ބޯ ހިއްލާލަކަށް ބޭނުމެއް ނުވެ އެވެ. އޭނާގެ މައިގްރޭންގެ ސަބަބަކީ އޮފީހަށް ނުގޮސް ގޭގައި ހުންނަން ޖެހުމޭ ބުނެ ގޭގައި އުޅޭ މީހުން ދިމާކުރެ އެވެ. 

އެކަމަކު ބައެއް މީހުންގެ ވީކެންޑް މައިގްރޭންއަކީ ހަގީގަތެކެވެ.

އަހަރެމެންގެ ދިރިއުޅުމުގައި ހާސްކަން ވަރަށް ބޮޑެވެ. ދަރިން ސްކޫލަށް ލުމާއި ބަލާ ދިއުން، ސްކޫލްގެ ކަންކަން ހަމަޖެއްސުން، ގޭތެރެ ތަރުތީބު ކުރުމާއި ކަންކަން ބެލެހެއްޓުން، މިއީ ގޭގައި ހުންނަ މީހަކު ކުރާނެ ކަންކަމެވެ.

އޮފީހަށް ދާ މީހަކު ނަމަ، މަސައްކަތުގެ މާހައުލުން ކުރިމަތިވާ ސްޓްރެސް ވެސް އެއީ ބޮޑު ބަޔެެކެވެ. ބައިވެރިޔާއާ އޮންނަ ގުޅުމުގައި ކުރިމަތިވާ ސްޓްރެސްތަކާއި މިހެން ގޮސް އެތައް ކަމަކާ ކުރިމަތިލާން ޖެހެ އެވެ. މާލޭގައި މަގަކަށް ނުކުމެ އެއް ތަނުން އަނެއް ތަނަށް ދިއުމަކީ ވެސް ތަކްލީފެކެވެ. މުޅި ހަފްތާ ހޭދަވަނީ މިކަހަލަ ގޮތަކަށެވެ. ފުން ނޭވާއެއް ލައި ހަމަޖެހިލެވެނީ ހަފްތާ ބަންދު އައުމުންނެވެ.

ވީކެންޑް މައިގްރޭންގެ އަލާމާތްތައް ވެސް އާއްމު މައިގްރޭންއާ އެއްގޮތެވެ. ނަމަވެސް މި މައިގްރޭން މެދުވެރިވަނީ ހަފްތާ ބަންދުގައި ނުވަތަ ހާސްކަން ބޮޑުކޮށް އުޅުމަށް ފަހު މީހާ ހަމަޖެހިލާ ވަގުތުގަ އެވެ. ތިރީގައި މިވަނީ ވީކެންޑް މައިގްރޭންގެ ބައެއް އަލާމާތްތަކެވެ.

ލެޓް ޑައުން މައިގްރޭން ނުވަތަ ވީކެންޑް މައިގްރޭންގެ އެންމެ ބޮޑު އެއް ޓްރިގާއަކީ ކުއްލިއަކަށް މީހާގެ ސްޓްރެެސް ލެވެލް ދަށްވުމެވެ. މިއީ ހައިރާން ކުރަނިވި ސަބަބަކަށް ވެދާނެ އެވެ. ނަމަވެސް، ޓެންޝަން މަތީގައި ހުރެފައި ކުއްލިއަކަށް ރިލޭކްސްވުމުން ހަށިގަނޑަށް އަންނަ ބަދަލަށް ހަށިގަނޑުން ރިއެކްޓް ކުރާ ގޮތަކީ މިއީ އެވެ.

މީހާ ސްޓްރެސްގައި އުޅޭ ވަގުތުގައި ހަށިގަނޑުން ކޯޓިސޯލް ނަމަކަށް ކިޔާ ހޯމޯނެއް ދޫކުރެ އެވެ. މި ހޯމޯން ސްޓްރެސްއާ ކުރިމަތިލާން ފަސޭހަކޮށްދީ ތަދުތަކުން އަރައިގަންނަން އެހީތެރިވެ އެވެ.

އެހެންކަމުން ސްޓްރެސްވުން ދަށްވުމާ އެކު ކޯޓިސޯލް އުފެއްދުން ހަށިގަނޑުން މަޑުޖައްސާލަ ދެ އެވެ. މިކަމުގެ ސަބަބުން މައިގްރޭންގެ ތަދު އިހްސާސް ކުރެވުން ބޮޑުވެ އެވެ. އަދި މައިގްރޭން އެޕިސޯޑް ކުރުމަތިވުން ގާތްވެ އެވެ.

އެންޒައިޓީ

އެންޒައިޓީ މާ ބޮޑު ނަމަ، ގިނައިން ބޮލުގައި ރިހުމަށް މެދުވެރިވެ އެވެ.

ނިދުމަށް އަންނަ ބަދަލުތައް

ބޮލުގައި ރިއްސުމަށް މެދުވެރިވާ ސަބަބުތަކުގެ ތެރޭގައި ނިދި ހަމަނުވުން ނުވަތަ މާ ގިނައިން ނިދުން ވެސް ހިމެނެ އެވެ.

ތެޔޮ އެއްޗެހި ބޭނުން ކުރުން އިތުރުވުން

ކެއުމުގައި ބޭނުންކުރާ ބައެއް ކަހަލަ ބާވަތްތަކަކީ މައިގްރޭން އައުމަށް މެދުވެރިވާ އެއްޗެއްސެވެ.

އާއްމުކޮށް ކައްކަން ބޭނުންކުރާ ވެޖިޓަބަލް އޮއިލް އަދި ކެނޯލާ އޮއިލް އިން ހަށިގަނޑުގައި އޮމެގާ-6 ހުންނަވަރު މަތިކޮށްދެ އެވެ. މިއީ މައިގްރޭން ރިސްކް %40 ބޮޑުވާ ކަމެކެވެ. އަހަރެމެންގެ ކެއުމުގައި ހިމެނޭ ތެޔޮ ހެދިކާ ފަދަ ބާވަތްތަކާ ދުރުވުން މުހިއްމެވެ.

ޕްރޮޓީން މަދުވުން

ހަފްތާއެއް ތެރޭގައި ހަށިގަނޑަށް ބޭނުންވާ ޕްރޮޓީން މަދުވެ، އޮމެގާ-3 މަދު ނަމަ މައިގްރޭން ކުރިމަތިވުމުގެ ފުރުސަތު ބޮޑުވެ އެވެ.

ކާބޯހައިޑްރޭޓް އަދި ހަކުރު

މައިގްރޭނާއި ޓައިޕް 2 ހަކުރުބަލި އަދި އިންސިއުލިން ރެސިސްޓަންސްއާ ގުޅުމެއް ވެ އެވެ. ޕާން، ހަކުރު އަދި އެހެނިހެން ކާބޯހައިޑްރޭޓް ކެއުމަކީ މައިގްރޭންގެ ރިސްކު އިތުރުވާ ކަމެކެވެ. ހާއްސަކޮށް ކޯޓިސޯލް ދަށްވުމުންނެވެ.

ކޮފީއާ ދުރުވުން

މައިގްރޭން އައުމަށް މެދުވެރިވާ އިތުރު އަނެއް ކަމަކީ ހަށިގަނޑުގައި ކެފެއިން ލެވެލް މަދުވުމެވެ. ހަފްތާ ތެރޭ ބޯ މިންވަަރަށް ވުރެ މަދުން ކުއްލިއަކަށް ކޮފީ ބުއިމުން ލެޓް-ޑައުން މައިގްރޭން އައުމަށް މެދުވެރިވެ އެވެ.

ތަދު ކަނޑުވާ ބޭސް ކެއުމުން ވީކެންޑް މައިގްރޭނުން ދުރުކޮށްދެ އެވެ. އެކަމަކު ބޮލުގައި ރިއްސުމުން ސަލާމަތްވާން ތަދުކަނޑުވާ ބޭހަށް އަބަދު ބަރޯސާވުމަކީ އެންމެ ރަނގަޅު ގޮތެއް ނޫނެވެ.

ބޮލުގެ ރިހުމަށް ފަރުވާ ހޯދަންވާނީ ތިމާއަށް ކުރިމަތިވާ އަލާމާތްތަކާއި ބޮލުގައި ރިއްސާ މިންވަރަށް އަދި ކިހާ އާއްމުކޮށް ބޮލުގައި ރިއްސާތޯ ދެނެގެންފަ އެވެ.

މައިގްރޭނަށް ބައިވަރު ހޯމް ރެމެޑީސް ހުރެ އެވެ. ބޮލަށް ފެން އަޅައިގެން ފެންވެރުމުން ބޮލަށް ފިނިކޮށްދީ ލުއިކޮށްދެ އެވެ. ހުތް ރަހަ ލާ މޭވާ ކެއުމުން ވެސް މައިގްރޭން ލުއިކޮށްދެ އެވެ. މީގެ އިތުުރުން، ފޯނުގެ ސްކްރީނަށް ބަލާ މިންވަރު މަދުކުރުމަކީ ކުރެވިދާނެ ކަމެކެވެ.

މައިގްރޭން ކުރިމަތިވާ މީހުން ޑޮކްޓަރަށް ދައްކަންވީ ބައެއް ހާލަތްތައް: