ރާއްޖޭގެ ފުރަތަމަ ކްލޭ ސްޓޫޑިއޯއާ އެކު އާ ފަންނުތަކެއް

ރާއްޖޭގައި ފުރަތަމަ ފަހަރަށް ކްލޭ ސްޓޫޑިއޯއެއް "ދަ ކްލޭ ސްޓޫޑިއޯ" ނަމުގައި ހުޅުވައި، ޕޮޓާރީ ކްލާސްތައް ހިންގަން ފަށައިފި އެވެ. 

މުޅިން ތަފާތު ކޮންސެޕްޓަކަށް ޝޯރޫމަކާއި ކެފޭއަކާ ވެސް އިންވެގެން ހެދި މި ތަން ހުޅުމާލޭގެ ރެއިންކްރެސްޓް ޓަވަރު-އޭގަ އެވެ.

މި މަހުގެ 21 ގައި ހުޅުވި މި ސްޓޫޑިއޯގެ މަގްސަދަކީ އާޓަށް ލޯބިކުރާ މީހުންނަށް މުޅިން އާ ތަޖުރިބާއަކާއި އާ ހުނަރުތަކެއް ގެނެސްދިނުމެވެ.

މި ކްލޭ ސްޓޫޑިއޯގައި ޕޮޓަރީ އާޓް ދަސްކުރުމުގެ ފުރުސަތު އޮވެ އެވެ. އަޖުމަ ބަލައިލަން ބޭނުން ނަމަ 'ޓޭސްޓާ' ކްލާސްތަކުގައި ބައިވެރިވެވޭނެ އެވެ. އަދި އިތުރު ހަރުފަތަކަށް ހުނަރު ކުރިއަރުވަން ބޭނުން ނަމަ ފަށައިގަންނަ ކްލާހާއި އެޑްވާންސް ކްލާސްތަކުން ޖާގަ ލިބޭނެ އެވެ.

ކްލާސްތައް ރާވާފައިވަނީ ހުރިހާ އުމުރު ފުރައެއްގެ މީހުންނަށް ވެސް ޕޮޓަރީ އާޓް ދަސްކުރަން ފަހިވާ ގޮތަށެވެ.

ރޯދަމަހު ހިންގާ ކްލާސްތަކުން ޖާގަ ބޭނުން ނަމަ ދަ ކްލޭ ސްޓޫޑިއޯގެ ވެބްސައިޓުން ބުކް ކުރެވޭނެ އެވެ. މި ރޯދަމަހު ކުރިއަށް ގެންދަނީ؛

ކްލޭ ސްޓޫޑިއޯއިން ހިންގާ މި ކްލާސްތައް ނަގައިދެނީ ތަމްރީން ލިބިފައިވާ ދިވެހި އިންސްޓްރަކްޓަރުންނެވެ. ކޮންސަލްޓަންޓެއްގެ ގޮތުގައި ބިދޭސީ ފަންނާނަކު ހަރަކާތްތެރިވެ އެވެ.

މުޅިން އާ އަދި ތަފާތު ކޮންސެޕްޓަކަށް ހުޅުވި ކްލޭ ސުޓޫޑިއޯއަށް 'ދައުރު'ން ޒިޔާރަތް ކުރުމުން ސްޓޫޑިއޯއާ ބެހޭ މައުލޫމާތު ދެއްވީ ކޯފައުންޑާ އަހުމަދު މުއާޒް އެވެ.

ރާއްޖޭގައި ފަންނުވެރިންނަށް މަސައްކަތް ކުރާނެ ފުރުސަތު ހޯދައިދީ، އެފަދަ މަސައްކަތްތައް ކުރެވޭނެ ތަންތަން ހަދައިގެން ވީހާވެސް ގިނަ ބަޔަކަށް ދަސްކޮށްދިނުމަކީ، މުއާޒުގެ މަގުސަދެވެ.

 މާލޭގައި "ކޮމިއުނިޓީ ސުޓޫޑިއޯ" އެއް ހިންގަ އެވެ. މީގެ އިތުރުން ހުޅުމާލޭގެ ދެވަނަ ފިޔަވަހީގައި މޭކާސްސްޕޭސް ނަމުގައި ތްރީޑީ ޕްރިންޓިންއަށް ހާއްސަ ސުޓޫޑިއޯއެއް ހުޅުވުމުގެ މަސައްކަތް ވެސް އަންނަނީ ކުރައްވަމުންނެވެ.

ރާއްޖޭގައި އާޓާއި ފަންނު މި އޮތީ ވަރަށް ބޮޑަށް އިހުމާލުވެ ދޫކޮށްލެވިފައި ކަމަށް މުއާޒް ގަބޫލުކުރައްވަ އެވެ. ނަމަވެސް އޭނާ ވިދާޅުވި ގޮތުގައި އަހަރެމެންގެ މުޖުތަމައުއަށް އާޓްގެ އެހީގައި ހެޔޮ ބަދަލެއް ގެނެވިދާނެ އެވެ.

"ރާއްޖޭގައި އެކަށީގެންވާ ވަރަށް ކްރިއޭޓިވް ސްޕޭސްތަކެއް ނެތް މީހުންނަށް އެމީހުންގެ ހުނަރުތައް ދައްކާލައި ކްރިއޭޓިވް ހިޔާލުތައް ފާޅުކުރާކަށް،" އޭނާ ވިދާޅުވި އެވެ.

"އަހަރެން ގަބޫލުކުރަނީ، މުޖުތަމައުއަށް ރަނގަޅު ބަދަލެއް ކްރިއޭޓިވް ސްޕޭސްތަކުގެ އެހީގައި ގެނެވިދާނެ ކަމަށް. އަހަރެމެންގެ މުޖުތަމައުއަކީ އެކަކު އަނެކަކުގެ އިހްސާސް ދަންނަ، އަންޑަސްޓޭންޑިން، ބެޓާ އެންޑް އެމްޕަތެޓިކް ބަޔަކަށް ވެވިދާނެ." 

"އަހަރެމެން ބޭނުންވަނީ މިކަން ތަޖުރިބާއެއްގެ ގޮތަށް މީހުންނަށް ފޯރުކޮށްދޭން. މި ކޮންސެޕްޓަަކަށް އަދި ސްޓޫޑިއޯއެއް ރާއްޖެއަކު ނެތް. މިއީ ރާއްޖޭގެ ފުރަތަމަ ކްލޭ ސްޓޫޑިއޯ،" އާ ސްޓޫޑިއޯއާ ބެހޭ ގޮތުން މުއާޒް ވިދާޅުވި އެވެ.

ސުޓޫޑިއޯ ޑިޒައިންކޮށްފައި ވަނީ މީހުންގެ ނަފްސާނީ ހަމަޖެހުމަށް ވަރަށް ބޮޑަށް އިސްކަންދީގެންނެވެ. ބޭނުމަކީ ހައިޖާނާއި ސްޓްރެސް ބޮޑު ދިރިއުޅުމުން ސަލާމަތްވެ، މީހާ ހަމަޖެހިލާ ފަދަ މާހައުލެއް އުފެއްދުން ކަމަށް މުއާޒު ވިދާޅުވި އެވެ. 

ސްޓޫޑިއޯގެ ކޮންސެޕްޓް ބިނާވެފައި އޮތީ ހަމައެކަނި ކްލާސް އާއި ވޯކްޝޮޕް ހިންގުމަށް ވުރެ ފުޅާކޮށެވެ.

ޕޮޓަރީ ކްލާސްތަކުގެ އިތުރުން ކްލޭ ސްުޓޫޑިއޯގެ ފަރާތުން ރާއްޖޭގައި ފުރަތަމަ ފަހަރަށް ސެރަމިކްވެއާ ނުވަތަ މުށިން ތަކެތި އުފައްދަން ވެސް އަންނަނީ ތައްޔާރުވަމުންނެވެ.

މިގޮތުން ގޭތެރެ ޒީނަތްތެރިކުރަން 'ޑެކެރޭޓިވްވެއާ' ކަލެކްޝަނަކާއި ކެއިން ބުއިމަށް ބޭނުންކުރެވޭ ކަހަލަ މުށި ތަށި 'ޑިނާވެއާ' މުޅިން އަމިއްލަ ބްރޭންޑެއްގެ ދަށުން އުފައްދަން ވެސް ކްލޭ ސްޓޫޑިއޯއިން އަންނަނީ މަސައްކަތްކުރަމުންނެވެ. 

ދަ ކްލޭ ސްޓޫޑިއޯގެ ޝޯރޫމާއި ކެފޭ ކުރިއަށް އޮތް ދެ ހަފްތާއެއް ތެރޭގައި ހުޅުވޭނެ ކަމަށް، މުއާޒު ލަފާކުރައްވަ އެވެ.

މުއާޒް ވިދާޅުވީ ކްލޭ ސްޓޫޑިއޯ އުފެއްދުމުގެ އެއް އަމާޒަކީ ވީހާވެސް ގިނަ ބަޔަކަށް އުފެއްދުންތެރިކަމާއި ހުނަރު ދައްކާލުމުގެ ފުރުސަތު ފަހިކޮށްދިނުމެވެ.

"ޕޮޓަރީގައި ކުރިއަށް ދާން ބޭނުންވާ ފަރާތްތަކަށް ސުޓޫޑިއޯއަށް އައިސް އިކުއިޕްމަންޓް ބޭނުންކުރުމުގެ ފުރުސަތު އޮންނާނެ. ބޭނުމަކީ މޭކާސް ސްޕޭސްއެއް ކްރީއޭޓްކޮށް ކޮމިއުނިޓީ އެންގޭޖް ކުރުން މިކަމުގައި،" އޭނާ ވިދާޅުވި އެވެ.

ކްލޭ ސްޓޫޑިއޯގެ އަމާޒުތައް ގިނަ އެވެ. ރާއްޖޭގެ ރިސޯޓްތަކުގަ އާއި ރަށްރަށުގެ ސްކޫލްތަކުގައި ވެސް ޕޮޓަރީ މަސައްކަތް ފަށައިގަންނަން ބޭނުންވާ ފަރާތްތަކަށް ފަންނީ ލަފަ އާއި އެހީތެރިކަން ފޯރުކޮށްދޭން އެ ސްޓޫޑިއޯ އޮތީ ތައްޔާރަށެވެ.

ރާއްޖޭގެ އާޓްގެ ދާއިރާއަށް ކްލޭ ސްޓޫޑިއޯއިން މިގެނެސްދެނީ ބޮޑު ބަދަލެކެވެ. އާއްމުކޮށް ރާއްޖޭގައި އާޓް މި އޮންނަނީ ކުރެހުމާއި ޕެއިންޓްގެ މައްޗަށް ބިނާވެފަ އެވެ. އެކަމަކު އާޓަކީ ވަރަށް ފުޅާ ދާއިރާއެކެވެ. 

މުއާޒް ވިދާޅުވި ގޮތުގައި ކްލޭ ސްޓޫޑިއޯ އިން މި ހުޅުވާލަދެނީ އިތުރު ދޮރެކެވެ.

ރާއްޖޭގައި ކްލޭ އާއި ސެރަމިކް އިން އުފައްދާ އެއްޗެހި އަދި ނުފެނެ އެވެ. މިސާލަކަށް އަންވެއިލިން ވިޝަން ކަހަލަ މައުރަޒުތަކުގައި ވެސް އެފަދަ އުފެއްދުންތައް ބައިވެރިއެއް ނުކުރެ އެވެ. 

"ދެން އަންނަ މައުރަޒެއްގައި އާ ޖީލެއްގެ ފަންނުވެރިން އުފެދިގެން އެމީހުންގެ ޕޮޓަރީ އަދި ސެރަމިކް މަސައްކަތްތައް، ހުނަރު އަދި އުފެއްދުންތެރިކަން ފެންނާނެ. ދިވެހިންނަށް ނެތީ ފުރުސަތުތަކެއް،" މުއާޒް ވިދާޅުވި އެވެ.