އުރަމަތީގެ ކެންސަރަށް ރިސްކު އޮތް މިންވަރު ދެނެގަތުން މުހިއްމު

ބަދަލު ނުގެނެވޭނެ ފަދަ ސަބަބުތައް

• 1-

  އުމުރު މަތިވުން: އުމުރުން ދުވަސްވުމަކީ އުރަމަތީގެ ކެންސަރު ޖެހުމަށް އޮތް ރިސްކެކެވެ. މިއީ އެއްވެސް މީހަކަށް ބަދަލުކުރެވޭނެ ކަމެއް ނޫނެވެ. އެކަމަކު ގިނަ ފަހަަރަށް އުރަމަތީގެ ކެންސަރު ހުރިކަން ދެނެގަނެވެނީ އުމުރުން 50 އަހަރުން މަތީގެ މީހުންނެވެ.

• 2-

  ގުދުރަތީގޮތުން: ބައެއް އަންހެނުންނަށް ވާރުތަކޮށްފައިވާ ޖީންތަކުގައި ބަދަލެއް (ހާއްސަކޮށް ބީއާރުސީއޭ1 އަދި ބީއާރުސީއޭ 2) ހުންނަ ނަމަ އުރަމަތީގެ އަދި އޯވަރީގެ ކެންސަރު ޖެހުމާ ގާތެވެ.
  

• 3-

  ދަރިމައިވެވޭ މުއްދަތު: އުމުރުން 12 އަހަރުގެ ކުރިން މައްސަރު ކަންތައް ލައިގަނެ އަދި އުމުރުން 55 އަހަރު ފަހުން އިއްދައިން ކެނޑޭ ނަމަ އަންހެނުން ގިނަ ދުވަހަށް ހޯމޯންތަކަށް ހުށަހެޅިފައިވުމަކީ އުރަމަތީގެ ކެންސަރު ޖެހުމަށް މެދުވެރިވާ ސަބަބެކެވެ.

• 4-

  އުރަމަތީގެ ޓިޝޫތައް ހުންނަ ގޮތް: އުރަމަތީގައި ފެޓީ ޓިޝޫއަށް ވުރެ ގިނައިން ކަނެކްޓިވް ޓިޝޫ ހުންނަ މީހުންގެ އުރަމަތީގައި ޓިއުމަރު ހުންނަކަން މެމޯގްރާމް އިން ދެނެގަންނަން އުނދަގުލެވެ. އަދި މިގޮތަށް ޓިޝޫތައް ހުންނަ މީހުންނަށް އުރަމަތީގެ ކެންސަރު ޖެހުމުގެ ފުރުސަތު ބޮޑެވެ.
  

• 5-

  އުރަމަތީގެ ކެންސަރު ކުރިން ޖެހިފައި ހުރުން: އުރަމަތީގެ ކެންސަރު އެއްފަހަރު ޖެހިފައި ހުރެއްޖެ ނަމަ ދެވަނަ ފަހަރަށް ޖެހުމުގެ ފުރުސަތު ބޮޑެވެ. އަދި ކެންސަރު ނޫނަސް އުރަމަތީގެ ބަލިތައް ޖެހިފައިވާ ނަމަ ކެންސަރުގެ ނުރައްކާ ބޮޑެވެ.
  

• 6-

  އާއިލާގެ ފަރާތުން: މަންމަ ނުވަތަ ދައްތަ ފަދަ އާއިލީ ގާތް މީހަކަށް އުރަމަތީގެ އަދި ރަހިމުގެ ކެންސަރު ޖެހިފައިވާ ނަމަ އެމީހަކަށް އުރަމަތީގެ ކެންސަރު ޖެހުމުގެ ފުރުސަތު އޮވެ އެެވެ. އާއިލާގެ ތެރޭގައި މަންމަ އަދި ބައްޕަގެ ފަރާތުގައި ގިނަ މީހުންގެ އުރަމަތި ނުވަތަ ރަހިމުގެ ކެންސަރު ހުންނަ ނަމަ މި ބަލި ޖެހުން ގާތެވެ.
  

• 7-

  ރޭޑިއޭޝަން ތެރަޕީ: މޭމަތި ނުވަތަ އުރަމައްޗަށް ކުރިން ރޭޑިއޭޝަން ތެރަޕީ ހަދާފައިވާ ނަމަ ކެންސަރު ޖެހުން ގާތެވެ.
  

އަމިއްލަ އަށް ބަދަލުކޮށްލެވިދާނެ ހިރާސްތައް

• 1-

  ކަސްރަތާއި ހެލިފެލިވެއުޅުމާ ދުރު އަންހެނުންނަށް އުރަމަތީގެ ކެންސަރު ޖެހުމުގެ ފުރުސަތު ބޮޑެވެ. އުމުރުން ދުވަސްވެފައިވާ އަންހެނުން ވެސް ހަށިގަނޑުގެ ބަރުދަން އިތުރުވެ އާދަޔާހިލާފަށް ފަލަ ނަމަ ދުޅަހެޔޮ ސިއްހަތެއްގައި ހުންނަ މީހަކާ އަޅާބަލާއިރު ކެންސަރު ޖެހުމުގެ ފުރުސަތު ބޮޑެވެ.

• 2-

  އިއްދައިން ކެނޑޭ ފަހުން ހޯމޯން ތެރަޕީ ފަސް އަހަރަށް ވުރެ ގިނަ މުއްދަތަކަށް ނަގާ ނަމަ އުރަމަތީގެ ކެންސަރު ޖެހުމުގެ ފުރުސަތު ބޮޑެވެ. އަދި ދަރިމައިވުމާ ދުރުކުރާ ބައެއް ބޭސް ބޭނުން ކުރާ ނަމަ އުރަމަތީގެ ކެންސަރާ ޖެހުން ގާތެވެ.
  

• 3-

  ދަރިމައިވުމުގެ ތަޖުރިބާ އަކީ ވެސް މުހިއްމު ދައުރެއް އަދާ ކުރާ ކަމެކެވެ. އުމުރުން 30 އަަހަރަށް ވުރެ މަތީ އުމުރެއްގައި ފުރަތަމަ ދަރިފުޅު ހޯދާ ނަމަ، ގާތުން ކިރު ނުދޭ ނަމަ އަދި މާބަނޑުވެ ދުވަސް ނުފުރާ ނަމަ އުރަމަތީގެ ކެންސަރު ޖެހުމުގެ ފުރުސަތު ބޮޑެވެ.
  

• 4-

  ރާ ބުއިމަކީ އުރަމަތީގެ ކެންސަރު ޖެހުމަށް މަގުފަހިވާ ކަމެކެވެ. ރާއްޖޭގައި ފޮރުވިގެން ރާ ބޯ މީހުން ގިނަވެފައިވާ އިރު މިއީ އުރަމަތީގެ ކެންސަރަށް އޮތް ރިސްކް ފެކްޓަރެކެވެ.

ޑރ. މުހައްމަދު ޝިފާންގެ ބްލޮގުން

• އުރަމަތި އެއްކޮށް ނޫނީ ބައެއް ދުޅަވެފައި ހުރުން (ގަނޑުކޮޅެއް ވަކިން ނެތްކަމުގައި ވިޔަސް)

• ހަންގަނޑު ރޫޖެހި އެތެރެއަށް ވަދެފައި ހުރުން (އޮރެންޖް ތޮށިގަނޑެއްހެން)
  

• އުރަމަތި ނޫނީ ވައްގަނޑުގައި ރިއްސުން
  

• ވައްގަނޑު އެތެރެއަށް ވަދެފައި އިނުން
  

• ވައްގަނޑު ނޫނީ އުރަމަތީގެ ހަންގަނޑު ބޯވެ، ރަތްވެ، ހަން ނޮޅޭގޮތްވުން
  

• ވައްގަނޑުން ކިރު ނޫން އެއްޗެއް އައުން
  

• ގޮށެއް ދުޅަވެފައި އިނުން (ބައެއް ފަހަރު އުރަމަތިން ގަނޑެއް ފެނުމުގެ ކުރިން ކިހިލިފަތްދަށުން ނޫނީ ކަރުން ގޮށެއް ފެނިފައި ހުރެދާނެ)

ސްކްރީން ކުރުން މުހިއްމު

ސްކްރީން ކުރުމުގައި ޑރ. ޝިފާންގެ ލަފާ

• އުމުރުން 40-44ގެ އަހަރުގެ އަންހެނުން އަހަރަކު އެއްފަހަރު މެމޯގްރާމްއެއް ހެދުމުގެ އިހްތިޔާރު އޮވެ އެވެ.

• އުމުރުން 45-50 އަހަރުގެ އަންހެނުން އަހަރަކު އެއްފަހަރު މެމޯގްރާމްއެއް ހަދަން ބާރުއަޅަންވެ އެވެ.

• އުމުރުން 55 އަހަރާއި އެއަށް ވުރެ ދޮށީ އުމުރުގެ އަންހެނުންނަށް މެމޯގްރާމްއެއް ބޭނުންކޮށްގެން ސްކްރީން ކުރުން ދެ އަހަރުން އެއް އަހަރު ނޫނީ އަހަރަކު އެއްފަހަރު ހެދުން ވެސް އެންމެ ރަނގަޅެވެ.