ޕްރިޔަންކާ ޗޯޕްރާ އާއި ނިކް ޖޯނަސް.
ޕްރިޔަންކާ އާއި ނިކް ލަގްޒަރީ ބްރޭންޑަކަށް އިންވެސްޓުކޮށްފި
ލަވަ ކިޔުންތެރިޔާ ނިކް ޖޯނަސް އާއި ފިލްމީ ތަރި ޕްރިޔަންކާ ޗޯޕްރާ ލަގްޒަރީ ބްރޭންޑަކަށް އިންވެސްޓުކޮށްފި އެވެ. މި ދެމަފިރިން ފެޝަން އިންޑަސްޓްރީ އަށް ކުރި ފުރަތަމަ އިންވެސްޓުމެންޓަކީ ލަގްޒަރީ ފެޝަން އަދި ސްޕޯޓްސް ބްރޭންޑު "ޕާފެކްޓު މޮމެންޓް" އަށް ކުރި އިންވެސްޓުމެންޓެކެވެ.
ޕްރިޔަންކާ އާއި ނިކް އަކީ މި ބްރޭންޑުގެ ލޯޔަލް ކަސްޓަމަރުންގެ ގޮތުގައި ތިބި ދެމަފިރިންނެވެ. ޕްރިޔަންކާ އާއި ނިކް، އެ ބްރޭންޑަށް ކުރި އިންވެސްޓުމެންޓާއެކު އޭޝިއާ އަދި މެދުއިރުމައްޗަށް ވިޔަފާރި ފުޅާ ކުރަން އެ ބްރޭންޑުން ކަނޑައަޅާފައިވާ އަމާޒު ހާސިލްކުރެވޭނެ ކަމަށްވެ އެވެ.
މި އިންވެސްޓުމެންޓަކީ މި ދެމަފިރިން އެކުގައި ވިޔަފާރިއަކަށް ކުރި ފުރަތަމަ އިންވެސްޓުމެންޓެވެ. ޕްރިޔަންކާގެ އަމިއްލަ ވިޔަފާރި އެމެރިކާގައި ހިންގާއިރު އެ ވިޔަފާރީގެ ދަށުން ރެސްޓޯރެންޓާއި ހޯމް ވެއާ ވިއްކާ ފިހާރައެއް ވެސް ހިމެނެ އެވެ.
މީގެ އިތުރުން އެމެރިކާ އާއި އިނގިރޭސިވިލާތުގެ މާކެޓުގައި ޕާފެކްޓް މޮމެންޓުގެ މާކެޓިން ރަނގަޅުކޮށް ވިޔަފާރި ރަނގަޅުކުރަން އިތުރު ބާރަކަށް މި އިންވެސްޓުމެންޓުވާނެ ކަމަށްވެ އެވެ.
ޕާފެކްޓް މޮމެންޓު އެންމެ ފުރަތަމަ އުފެދުނީ އެކްސްޓްރީމް ސްޕޯޓްސް އަށް ހާއްސަ ސްޕޯޓްސް ވެއާ ބްރޭންޑެއްގެ ގޮތުގަ އެވެ. ފަހުން އަންހެނުންގެ ފެޝަނަށް ވެސް ހާއްސަވެ. މިހާރު ދެ ޖިންސަށް ހާއްސަ ފެޝަން އަދި ސްޕޯޓްސް ވެއާ އެ ބްރޭންޑުގެ ލޭބަލްގެ ދަށުން ވިއްކަ އެވެ.