ކުދިން ގޮވައިގެން 'ބާބީ' ބަލަން ދަނީތަ؟ ފިލްމު އޮތީ 13 އަހަރުން މައްޗަށް

ބާބީ ބުދަކީ އާއްމުކޮށް ހަގު އުމުރުތަކުގެ ކުޑަކުދިން ވެސް ގެންގުޅޭ ކުޅޭއެއްޗަކަށް ވިޔަސް، މިއަދު ނެރޭ 'ބާބީ' ފިލްމު ރޭޓްކޮށްފައި ވަނީ 13 އަހަރުން ދަށުގެ ކުދިންނަށް ދެއްކުން އެކަށީގެންނުވެދާނެ ފިލްމެއްގެ ގޮތުގަ އެވެ.

މި ދުވަސްވަރު ފިޔާތޮށިކުލައިގެ ބޮޑު ހުމެއް ފަތުރައި އެންމެންގެ ޝައުގުވެރިކަން ދަމައިގަނެގެން އުޅޭ މި ފިލްމުގެ ޕޯސްޓަރުތަކާއި ޓްރެއިލާ އިން ދައްކާލާ ބާބީ ލޭންޑާއި އެ މަންޒަރުތަކުން ކުރުވާ އިހުސާސުން މައުސޫމްކަން ސިފަވާނެ އެވެ. އަދި، ހޮލީވުޑްގެ ހަބަރުތައް ބުނާގޮތުން، ޖުމްލަކޮށް ބަލާއިރު 'ބާބީ' ގައި މާބޮޑު ބޭއަދަބީ މަންޒަރެއް ނުވަތަ އަނިޔާ އާއި ތަޅާފޮޅުމެއް ނުހިމެނެ އެވެ. 

ނަމަވެސް 'ބާބީ' ކްލެސިފައިކޮށްފައި ވަނީ ޕީޖީ-13 ފިލްމެއްގެ ގޮތުގަ އެވެ. އެއީ ފިލްމުގައި ބުނެލާ ބައެއް އެއްޗެހި 13 އަހަރަށް ވުރެ ހަގު ކުދިންނާ ނުގުޅިދާނެ ކަމަށް ކަނޑައަޅައިފަ އެވެ.

ޝްވެކް ސިނަމާ އިން މާލެ އާއި ހުޅުމާލޭގައި ރޭގަނޑާއި ހަވީރުގެ ޝޯތަކެއް ވެސް ޝެޑިއުލްކޮށްފައިވާ 'ބާބީ'ގެ ލީޑް ތަރިންނަކީ މާގޯ ރޮބީ އާއި ރަޔަން ގޮސްލިން އެވެ.

ގްރެޓާ ގާވިގް ޑައިރެކްޓްކޮށްފައިވާ 'ބާބީ' އާއެކު މިއަދު ހޮލީވުޑްގެ ވަރުގަދަ އެހެން ފިލްމެއް ވެސް ނުކުންނާނެ އެވެ. އެއީ ކްރިސްޓޮފާ ނޯލާން ޑައިރެކްޓްކޮށްފައިވާ 'އޮޕެންހައިމާ' އެވެ. މި ކުރިމަތިލުން އަންނާތީ 'ބާބެންހައިމާ'ގެ ނަމުގައި ސޯޝަލް މީޑިއާގައި ހޮލީވުޑް ފޭނުން ފޯރިނަގާތާ ހަފްތާތަކެއް ވަނީ ވެފަ އެވެ.