'ދި އާޗީސް'ގެ ޓީޒާ: އާޗީގެ ދުނިޔެ އިންޑިއާއިން

ގިނަ ބަޔަކު އިންތިޒާރުކުރަމުން އަންނަ ބޮލީވުޑް ފިލްމު 'ދި އާޗީސް'ގެ ޓީޒާ ނެރެފި އެވެ.

ބްރެޒިލްގައި ބޭއްވި ނެޓްފްލިކްސްގެ 'ޓުޑުމް' އިވެންޓުގައި ނެރުނު ދޮޅު މިނެޓެއްހާ ދިގު ޓީޒާ އިން ފެންނަ ގޮތުގައި 1964 ވަނަ އަހަރު ދައްކައިދޭ މި މިއުޒިކަލްގައި 'އާޗީ' ކޮމިކްސްގެ ދުނިޔޭގެ ހުރިހާ ރަހަތަކެއް އެކުލެވެ އެވެ.

ރިވަޑޭލް ޓައުންގައި ފުރާވަރުގެ އާޗީ އާއި އޭނާގެ ރަހުމަތްތެރިން އެކުގައި ވަގުތު ހޭދަކުރަން އަބަދު ގޮސް ތިބޭ ޕޮޕް ޓޭޓްސް ރެސްޓޯރެންޓާއި ދި އާޗީސް ބޭންޑުގެ މިއުޒިކާއި ޕާޓީތަކުގައި ނެށުމާއި ސްކޫލުގައި އުޅޭ މަންޒަރާއި ބޭރުތެރޭ ވަގުތު ހޭދަކުރާ ތަން ޓީޒާގައި ގެނެސްދީފައިވެ އެވެ. އަދި ލޯތްބާއި ހިތްހަލާކުވުން ދޭހަވާ މަންޒަރުތަކެއް ވެސް ވަނީ ހިމަނައިފަ އެވެ.

ޓީޒާ ނެރެމުން ނެޓްފްލިކްސް އިންޑިއާ އިން އިންސްޓްގްރާމްގައި ބުނީ އާޗީސް އާއި އޭނާގެ ރަހުމަތްތެރިން ކޮމިކްތަކާއި ފޮތްތަކާއި 'ރިވަޑޭލް' އިން ފެނުމަށް ފަހު މިފަހަރު ފެންނާނީ އިންޑިއާ އިން ކަމަށެވެ. 'ދި އާޗީސް' އިން ދައްކައިދޭނީ ކުރިން ދެކެފަރިތަ އެކަމަކު އާ ކަންކަން ވެސް ފެންނާނެ ދުނިޔެއެއް ކަމަށް އެ ޕޯސްޓުގައި ލިޔެފައިވެ އެވެ.

ޒޯޔާ އަހުތަރް ޑައިރެކްޓްކުރާ 'ދި އާޗީސް'ގެ ޓީޒާއާ އެކު ފިލްމާ މެދު ކުރާ އުއްމީދު ވަނީ އިހުނަށް ވުރެ ވެސް ބޮޑުވެފަ އެވެ.

މި ފިލްމަށް ސަމާލުކަން ހުއްޓިފައިވާ އެއް ސަބަބަކީ ކާސްޓުގައި ބޮލީވުޑްގެ ތަޖުރިބާކާރު މަޝްހޫރު ތަރިންތަކެއްގެ ދަރިން ހިމެނުމެވެ. 

މިއީ ޝާހު ރުކް ހާންގެ ދަރިފުޅު ސުހާނާ ހާން، ޝްރީދޭވީ އާއި ބޮނީ ކަޕޫރުގެ ދަރިފުޅު އަދި ޖާންވީ ކަޕޫރުގެ ކޮއްކޮ ހުޝީ ކަޕޫރު އަދި އަމީތާބު ބައްޗަންގެ ކާފަ ދަރިފުޅު އަގަސްތުޔާ ނަންދާ ބޮލީވުޑަށް ތައާރަފްވާ ފިލްމެވެ. އޭގެ އިތުރުން މިހިރް އަހޫޖާ، ޑޮޓް، ޔުވްރާޖް މެންޑާ އަދި ވިޑަންގް ރައިނާ ވެސް މި ފިލްމުން ފެންނާނެ އެވެ.