ސަލްމާން ހާން އާއި ޕޫޖާ ހެޖް 'ކިސީ ކާ ބާއީ ކިސީ ކީ ޖާން' ޕްރޮމޯޓްކުރުމަށް އިވެންޓެއްގައި
ސަލްމާންއާ ރައްޓެހިވެގެން އުޅޭ ކަމަށް ބުނާ ވާހަކައަށް ޕޫޖާ ހެޖު ޖަވާބުދީފި
ސަލްމާން ހާންއާ ރައްޓެހިވެގެން އުޅޭ ކަމަށް ބުނެ ފެތުރެމުންދާ ވާހަކަތަކާ ގުޅޭގޮތުން ޕޫޖާ ހެޖު އެންމެ ފަހުން އެއްޗެކޭ ބުނެފި އެވެ.
ޕޫޖާ އާއި ސަލްމާން އެކުގައި ފެންނާނެ 'ކިސީ ކާ ބާއީ ކިސީ ކީ ޖާން' ރިލީޒްކުރަން ކައިރިވެފައިވާ މި ދަނޑިވަޅުގައި ޕޫޖާ ބުނީ އޭނާ ހުރީ ހުސްކޮށް ކަމަށެވެ. އަދި މި ވަގުތު އޭނާ އެންމެ އިސްކަންދެނީ ކެރިއަރަށް ކަމަށް ވެސް ޕޫޖާ ބުންޏެވެ.
ސަލްމާން އާއި ޕޫޖާ ރައްޓެހިވެގެން އުޅޭ ކަމަށް ވާހަކަދެކެވޭތާ މަސްތަކެއް ވެއްޖެ އެވެ. އަދި ދެ މީހުން ކުރެ އެކަކު ވެސް މިހާތަނަށް އެކަމާ ދޭތެރޭ އެއްޗެއް ބުނެފައިނުވާތީ އެ އަޑު އޮތީ ވަކިން ގަދަވެފަ އެވެ.
ޕޫޖާ އީޓައިމްސް އަށް ދިން އިންޓަވިއުއެއްގައި ބުނީ އޭނާއާ ބެހޭގޮތުން އެކި ވާހަކަތައް ލިޔެފައި ހުއްޓާ ފެންނަ ކަމަށެވެ. އެކަމަކު އޭނާ ހުސްކޮށް ހުރި އިރު، އެ ގޮތުގައި ހުންނަން ހިތްހަމަޖެހޭ ކަމަށް ވެސް ޕޫޖާ ބުންޏެވެ.
ކުރީގެ އިންޓަވިއުއެއްގައި ޕޫޖާ ވަނީ ސަލްމާން ހާންގެ ފިލްމަކުން މުހިއްމު ރޯލެއް ލިބުމާ މެދު އުފާކޮށް ވާހަކަދައްކައިފަ އެވެ. އަދި ސަލްމާނާ އެކު މަސައްކަތްކުރުމުގެ ތަޖުރިބާއިން އޭނާ ބުނިގޮތުގައި ސަލްމާނަކީ ހިތަށް އަރާ އެއްޗެހި ސީދަލަށް ބުނާ "ރިއަލް" މީހެކެވެ.
'ކިސީ ކާ ބާއީ ކިސީ ކީ ޖާން' އަންނަ ހުކުރުދުވަހު ސިނަމާތަކުގައި އަޅުވާނެ އެވެ.