ޑަބްލިޔުޕީއެލްގެ ފެށުން ކިއާރާ އަދުވާނީ، ކްރިތީ ސަނޯން އަދި އޭޕީ ދިލަންގެ ހުށަހެޅުންތަކުން

އިންޑިއާ ކްރިކެޓްގެ އަންހެނުންގެ ޕްރިމިއާ ލީގު (ޑަބްލިޔުޕީއެލް) ފެށުމަށް މުމްބާއީގައި އިއްޔެ ބޭއްވި ރަސްމިއްޔާތުގައި ކިއާރާ އަދުވާނީ އާއި ކްރިތީ ސަނޯން އަދި އޭޕީ ދިލަންގެ ފޯރިގަދަ ހުށަހެޅުންތަކެއް ދައްކާލައިފި އެވެ.

ކިއާރާ ވަނީ ވިކީ ކޯޝަލް އާއި އޭނާގެ ފިލްމު 'ގޯވިންދާ ނާމް މޭރާ'ގެ ލަވަ 'ކިޔާ ބާތު ހޭ 2.0' އަށް ނެށުމެއް ހުށަހަޅައިދީފަ އެވެ.

ކްރިތީ ނެށީ އޭނާގެ އެންމެ ފަހުގެ ފިލްމު 'ބޭޅިޔާ'ގެ 'ތުމްކޭޝްވަރީ' އަށެވެ. އަދި ލަވަކިޔުންތެރިޔާ އޭޕީ ދިލަން އޭނާގެ ހިޓް ލަވަތައް ހުށަހަޅައިދިނެވެ.

ތިން ތަރިންނާ އެކު، ކްރިކެޓް ބޯޑުގެ އޮފިޝަލުންނާއި މުބާރާތުގައި ވާދަކުރާ ފަސް ޓީމުގެ ކެޕްޓަނުން ސްޓޭޖުމަތީ ޓްރޮފީ ދައްކާލުން އޮތެވެ.

ޑަބްލިޔުޕީއެލްގައި 23 ދުވަސް ތެރޭ 20 ލީގު މެޗާއި ދެ ޕްލޭއޯފް ކުޅޭނެ އެވެ. ނާވީ މުމްބާއީ ސްޓޭޑިއަމްގައި އިއްޔެ ފެށި ފުރަތަމަ މެޗަށް ނުކުތީ ގުޖުރާތު ޖަޔަންޓްސް އާއި މުމްބާއީ އިންޑިއަންސް އެވެ. މުބާރާތުގެ ފައިނަލް މެޗު ކުޅޭނީ މި މަހު 26ގަ އެވެ.