'ޕަޓާން' އޭޕްރީލް މަހު ޕްރައިމް ވީޑިއޯގައި ރިލީޒް ކުރަނީ

ޝާހު ރުކް ހާން އާއި ދީޕިކާ ޕަދުކޯންގެ ފިލްމު 'ޕަޓާން' އޭޕްރީލް މަހު އޯޓީޓީ ޕްލެޓްފޯމަކަށް އަންނާނެ ކަމަށް ރިޕޯޓުތައް ބުނެފި އެވެ.

ހަބަރުތައް ބުނާގޮތުގައި، މި މަހުގެ 25 ގައި ސިނަމާތަކުގައި އަޅުވާ އެ ފިލްމު އަންނަ އޭޕްރީލްގައި އެމެޒޯން ޕްރައިމްގައި ރިލީޒް ކުރާނެ އެވެ.

ޔަޝް ރާޖު ފިލްމްސް އިން ޕްރޮޑިއުސްކޮށް، ސިދާތު އާނަންދު ޑައިރެކްޓު ކުރި އެ ފިލްމުގެ މުހިއްމު ރޯލަކުން ޖޯން އަބްރަހަމް ވެސް ފެންނާނެ އެވެ. ހިންދީ ބަހުގެ އިތުރުން ޓެމިލް އަދި ޓެލުގޫ ބަހުން ވެސް އެ ފިލްމު ރިލީޒް ކުރާނެ އެވެ.

'ޕަޓާން'ގެ ޓްރެއިލާ ރިލީޒް ކުރި ފަހުން ޝާހު ރުކް ހާންގެ އެކްޓިން އަށް ފޭނުން ދަނީ ތައުރީފު ކުރަމުންނެވެ. މިއީ ހަތަރު އަހަރަށް ފަހު އޭނާ ސްކްރީނުން ފެންނާނެ ފުރަތަމަ ފިލްމެވެ.

'ޕަޓާން'ގައި ޝާހު ފެންނާނީ އަންޑަކަވާ ސްޕައިއެއްގެ ރޯލުންނެވެ. އޭނާގެ ގިނަ އެކްޝަން މަންޒަރުތަކެއް މި ފިލްމުގައި ހިމެނޭނެ އެވެ.

'ޕަޓާން'ގެ ބައެއް މަންޒަރުތައް ސެންސަރު ބޯޑުން އުނިކޮށް، ފިލްމު ވަނީ ފާސްކޮށްފަ އެވެ. ފިލްމު އޯޓީޓީގައި ރިލީޒް ކުރުމުގެ ކުރިން ހިންދީ ބަހުން ސަބްޓައިޓްލް ހިމަނަން ވެސް ސެންސަރު ބޯޑުން ވަނީ އަންގައިފަ އެވެ.