ޝިއާއުގެ ހަނދާނުގައި ހަމްބަލް ބަކަރިގެ 'އަނިޔާ'

"އަރަމުން އައި ތަރިއެކޭ

އުދަރެހުން ގެއްލުނީ

ވިދަމުން އައި އަލިކަމެއް

މުޅި އުމުރަށް ވަކި މިވީ"

މިއީ ބައިސްކޯފުގެ ބޭންޑް ހަމްބަލް ބަކަރި އިން މިދިޔަ ހަފްތާގައި ނެރުނު 'އަނިޔާ' އަލްބަމްގެ ލަވަ 'ތަރި'ގެ ކަޑި އެކެވެ.

މި އަލްބަމް ހާއްސަކޮށްފައިވަނީ މާލޭގެ ގެއެއްގެ ތެރޭގައި މިދިޔަ އޮގަސްޓް މަހު ވަރަށް އަނިޔާވެރި ގޮތަކަށް މަރާލި ޝިއާއު މުހައްމަދު ސައީދުގެ ހަނދާނަށެވެ. 

އަލްބަމްގައި ނުވަ ލަވަ ހިމެނެ އެވެ.  'ތަރި' އަދި 'ވައިކޮޅު' މިއީ ޝިއާއުގެ މަރަށް ފަހު އޭނާ އަށް ހާއްސަކޮށްފައިވާ ދެ ލަވަ އެވެ.

އަލްބަމްގެ ލަވަތައް ކިޔާފައިވަނީ މޫސާ އާދަމް މަނިކު (ކޭޖޭ) އެވެ.

ލަވަތަކުގެ ޅެން ހަދާފައިވަނީ ހަމްބަލް ބަކަރި އެވެ. އެ ބޭންޑުގެ ޅެންތަކުގެ ތަފާތަކީ ބުނަން ބޭނުންވާ އެއްޗެއް ވީހާ ވެސް ތިލަކޮށް ބުނުމެވެ. މި ލަވަތައް ޖަހާލައި އަޑުއާހަލުމުން އެކަން ފާހަގަ ވާނެ އެވެ.

އުމުރުން 22 އަހަރުގައި މަރުވުމުގެ ކުރިން ޝިއާއު ގެންދިޔައީ ހަމްބަލް ބަކަރިއާ އެކު ޖޭމް ސެޝަންތަކުގައި ބައިވެރިވަމުންނެވެ.

ބައިސްކޯފުން ބުނި ގޮތުގައި ޝިއާއުގެ ކުއްލި މަރުގެ ކުރިންސުރެ އޭނާއާ އެކު މި އަލްބަމްގެ މަސައްކަތް އަައީ ކުރަމުންނެވެ. އޭނާގެ މަރާ ގުޅިގެން މަސައްކަތް މެދުކަނޑާލި ނަމަވެސް، ޝިއާއުގެ ހަނދާން ދިރުވުމަށްޓަކައި، މަސައްކަތް އަލުން ކުރިއަށް ގެންގޮސް، އަލްބަމް ނެރުނީ ކަމަށް އެ ތަނުން ބުންޏެވެ.

ޝިއާއުއާ އެކު ލަވަ ޕްރެކްޓިސް އިރުގެ ވީޑިއޯ އާއި އޯޑިއޯ ހުރުމުން، އަލްބަމްގެ ޕްރޮޑިއުސަރު އަދި ވޯކަލިސްޓް ކޭޖޭ ވަނީ އާޓިފިޝަލް އިންޓެލިޖެންސްގެ އެހީގައި ޝިއާއުގެ އަޑު ވަކިކޮށްގެން އަލްބަމްގެ ތިން ލަވައެއްގައި ހިމަނާފަ އެވެ.

އަލްބަމްގައި ހިމެނެނީ މަޑުމައިތިރި ރާގުތަކެކެވެ. ހަމަޖެހިލައިގެން މި ލަވަތައް އަޑުއަހާލައިފި ނަމަ ޅެންތަކުން ފުން އަސަރުތަކެއް ކުރެ އެވެ. އާއްމުކޮށް އަޑުއިވޭ ދިވެހި ލަވަތަކާ ތަފާތުކޮށް، އަލްބަމްގެ ނަމާ އެއްގޮތަށް، ލަވަތަކުގައި ޑާކް ވައިބެއް ވެސް ހުރެ އެވެ. މި ލަވަތަކުން ނަފްސާނީ މައްސަލަތައް، ދިރިއުޅުން، އަނިޔާ އަދި މަރު ސިފަކޮށްދެ އެވެ.

ބައިސްކޯފުގެ އެޕުން މިހާރު ލަވަތައް ސްޓްރީމް ކުރެވޭނެ އެވެ.