'އިންޑިއަން އައިޑަލް' އަށް އޮޑިޝަން ހެދިން: އަޔުޝްމަން

ބޮލީވުޑްގެ ކެރިއަރުގެ ކުރިން އަޔުޝްމަން ކުރާނާ އަކީ ރޭޑިޔޯ އާރްޖޭ އެކެވެ. އޭގެ ފަހުން ޓީވީ ހޯސްޓެއްގެ ގޮތުގައި ވެސް މަސައްކަތް ކުރި އެވެ. އޭނާ ވަނީ ލަވަކިޔުމުގެ ދާއިރާ އިން ކުރިއަށް ދެވޭތޯ ވެސް މަސައްކަތް ކޮށްފަ އެވެ.

މިހާރު ކުރިއަށްދާ 'އިންޑިއަން އައިޑަލް'ގެ ޝޯއެއްގެ ހާއްސަ މެހުމާނެއްގެ ގޮތުގައި ބައިވެރިވެ ވާހަކަ ދައްކަމުން އަޔުޝްމަން ބުނިގޮތުގައި އޭނާ ވަނީ 'އިންޑިއަން އައިޑަލް'ގައި ބައިވެރިވާން އޮޑިޝަން ހަދައިފަ އެވެ. އެކަމަކު އެކަން ކާމިޔާބެއް ނުވި އެވެ.

އޭނާ ބުނީ މުމްބާއީ އިން ދިއްލީ އަށް އޭނާ އާއެކު 50 މީހަކު ދިޔަ ކަމަށާއި އޭގެ ތެރޭ މިހާރު 'އިންޑިއަން އައިޑަލް'ގެ ޖަޖެއްގެ ގޮތުގައި ފެންނަ ލަވަކިޔުންތެރިޔާ ނޭހާ ކައްކަރު ވެސް ހިމެނޭ ކަމަށެވެ.

"ނޭހާ އާއި އަހަރެން އެކުގައި ދިޔައީ ރޭލުގައި. ކާމިޔާބު ނުވި މީހުންގެ ތެރޭ އަހަރެމެން ދެ މީހުން ވެސް ހިމެނުނު،" އަޔުޝްމަން ބުންޏެވެ.

އަޔުޝްމަން ބުނީ މިހާރު ނޭހާ އަކީ އެ ޝޯގެ ޖަޖެއް ކަމަށާއި އޭނާ ވެސް ކެރިއަރުގައި ހުރި ހިސާބެއްގެ ސަބަބުން އަލުން އެ ޕްލެޓްފޯމަށް އާދެވިއްޖެ ކަމަށެވެ. އަދި އެއީ އެ ދެ މީހުންނަށް ވެސް ކާމިޔާބީއެއް ކަމަށް ގަބޫލު ކުރާ ކަމަށް އަޔުޝްމަން ބުންޏެވެ.

ރިއަލިޓީ ޝޯއެއް ކަމަށްވާ 'ރޯޑީސް' ކާމިޔާބުކޮށް އަޔުޝްމަން ޝޯ ހޯސްޓެއްގެ ގޮތުގައި މަސައްކަތް ކުރަން ފެށީ 2000ގެ އަހަރުތަކުގެ ތެރޭގަ އެވެ. އޭގެ ފަހުން އޭނާ ބޮލީވުޑަށް ނުކުތީ 2012 ވަނަ އަހަރު އެވެ.

ނޭހާ ވަނީ 'އިންޑިއަން އައިޑަލް'ގެ ދެވަނަ ސީޒަންގެ 12 ފައިނަލިސްޓުންގެ ތެރޭ ހިމެނިފަ އެވެ.