އަޔުޝްމަންގެ 'ޑްރީމް ގާލް 2' އަވަސްކޮށްފި

އަޔުޝްމަން ކުރާނާ އާއި އަނަންޔާ ޕާންޑޭ ލީޑުން ފެންނަ 'ޑްރީމް ގާލް 2' ރިލީޒް ކުރާ ތާރީހު އަވަސްކޮށްފި އެވެ.

ބޮޑު ތަރުހީބެއް ލިބުނު 'ޑްރީމް ގާލް'ގެ ފުރަތަމަ ފިލްމުގެ ލީޑުން 2019 ވަނަ އަހަރު ފެނުނީ އަޔުޝްމަން އާއި ނުސްރަތު ބަރޫޗާ އެވެ. 

މީގެ ކުރިން އެ ފިލްމު ރިލީޒް ކުރަން އޮތީ އަންނަ ޖޫން މަހުގެ 29ގަ އެވެ. އެކަމަކު ކާރްތިކް އާރިޔަން އާއި ކިއާރާ އަދަވާނީގެ 'ސަތިޔަޕްރޭމް ކީ ކާތާ' ރިލީޒް ކުރާ ތާރީހާ ފުށުއަރާތީ، ދެ ފިލްމުގެ ޕްރޮޑިއުސަރުން ވާހަކަ ދައްކައިގެން، 'ޑްރީމް ގާލް 2'ގެ ތާރީހު ކުރިއަށް ޖައްސާލީ އެވެ.

އެގޮތުން، 'ސަތިޔަޕްރޭމް ކީ ކާތާ'ގެ ޕްރޮޑިއުސަރު ސާޖިދު ނަދިއާވާލާ، 'ޑްރީމް ގާލް 2'ގެ ޕްރޮޑިއުސަރު އެކްތާ ކަޕޫރަށް ގުޅައި ފިލްމުގެ ތާރީހު ބަދަލު ކޮށްދޭން އެދުނު ކަމަށްވެ އެވެ. 

ކުޑަ ސްނީކް ޕީކްއެއް މީގެ ކުރިން އާންމުކޮށްފައިވާ 'ޑްރީމް ގާލް 2' އިން ފެންނާނީ ފިރިހެންކުއްޖާގެ ލޯބި ސީރިއަސްކޮށް އަންހެންކުއްޖާ ނުނަގާތީ ދެން ދިމާވާ ކަންތައްތަކެކެވެ.

އެކްތާ ކަޕޫރު އަދި ޝޯބާ ކަޕޫރު ޕްރޮޑިއުސްކޮށް ރާމް ޝާންޑިލްޔާ ޑައިރެކްޓު ކުރާ އެ ފިލްމުން ބެލުންތެރިން ހެއްވާލާނެ މަޖާ ކަންތައްތަކެއް ފެންނާނެ ކަމުގެ ޔަގީންކަން ޕްރޮޑަކްޝަން ޓީމުން ދެ އެވެ.

'ޑްރީމް ގާލް'ގެ ފުރަތަމަ ފިލްމަށް 200 ކްރޯޑު ރުޕީސްގެ އާމްދަނީއެއް ލިބުނެވެ.