ޝިފާލީ އަދިވެސް ހުރީ އެންމެ ބޭނުންވާ ކަހަލަ ރޯލެއްގެ އިންތިޒާރުގައި

ކްރިޓިކުންގެ ކޮމެންޓަށް ބެލިޔަސް، ބެލުންތެރިންގެ ތަރުހީބަށް ބެލި ނަމަވެސް ޝިފާލީ ޝާހު އަކީ ބޮކްސް އޮފީހުގައި ކާމިޔާބު ތަރި އެކެވެ. މި އަހަރު އެކަނި ވެސް އޭނާގެ މޮޅު ކިތަންމެ މަސައްކަތެއް ފެނިއްޖެ އެވެ.

އެކަމަކު ޝިފާލީ ގަބޫލު ކުރާގޮތުގައި އަދިވެސް އޭނާ ބޭނުންވާ ފަދަ މޮޅު ރޯލެއް ނުލިބެ އެވެ. އެފަދަ މަސައްކަތެއް ލިބޭނެ ކަމަށް އަދިވެސް ހުރީ އިންތިޒާރުގައި ކަމަށް އޭނާ ވަނީ ބުނެފަ އެވެ.

'ޖަލްސާ'، 'ޑާލިންގްސް' އަދި 'ދިއްލީ ކްރައިމްސް' ގައި އޭނާ ކުޅެފައިވާ ރޯލުތަކަށް ބެލުންތެރިންނާއި ކްރިޓިކުންގެ ތައުރީފު ވަނީ ލިބިފަ އެވެ. މި ފަހުން ރިލީޒްކުރި 'ޑޮކްޓާ ޖީ' ގައި ވެސް އޭނާގެ ރޯލުގެ މޮޅުކަން، ފިލްމު ބެލި މީހުން ފާހަގަކޮށްފައިވެ އެވެ.

މި ފަހުން ދިން އިންޓަވިއުއެއްގައި ޝިފާލީ ބުނީ އޭނާ އަށް ލިބޭ ރޯލުތަކާ މެދު ހިތްހަމަޖެހޭ ކަމަށާއި އަދިވެސް ބޭނުންވަނީ މިހާރަށް ވުރެ ވެސް މޮޅަށް އެކްޓިން ދެއްކޭނެ ރޯލުތައް ކަމަށެވެ.

"ސްކްރިޕްޓު ލިޔާ މީހުން އެބަ ބުނޭ އަހަންނަށް ހާއްސަ ރޯލުތައް ލިޔާ ކަމަށް. އެހެންވީމާ އެ ރޯލުތައް ލިބެންދެން ހުންނަން ޖެހޭނީ އިންތިޒާރުގައި،" ޝިފާލީ ބުންޏެވެ.

ކިތަންމެ ކުޑަ ނަމަވެސް ވަރުގަދަ ރޯލެއް ނަމަ މައްސަލައެއް ނެތް ކަމަށް އޭނާ ބުންޏެވެ.

މި އަހަރުގެ އިންޑިއަން ފިލްމު ފެސްޓިވަލް އޮފް މެލްބަންގައި ޝިފާލީ އަށް ވަނީ 'ޖަލްސާ' އިން ބެސްޓް އެކްޓްރެސްގެ އެވޯޑު ލިބިފަ އެވެ.