ޒޯޔާ އަހްތަރު
ޒޯޔާ އަށް ޑައިރެކްޓަރަކަށް ނުވެވޭނެޔޭ ކަރީނާ ބުނި
'ދިލްވާލޭ ދުލްހަނިޔާ ލޭޖާއޭނގޭ' ('ޑީޑީއެލްޖޭ')އާ ގުޅުވައިގެން ކަރީނާ ކަޕޫރު އޭނާއާ ޒުވާބުކޮށް، އޭނާއަށް ޑައިރެކްޓަރަކަށް ނުވެވޭނެ ކަމަށް ބުނެފައިވާ ކަމަށް ޒޯޔާ އަހްތަރް އެއް އިރަކު ބުނެފައިވެ އެވެ.
'ގަލީ ބޯއީ'، 'ޒިންދަގީ ނާ މިލޭނގީ ދޮބާރާ' އަދި 'ދިލް ދަޅަކް ނޭ ދޯ' ފަދަ ފިލްމުތައް ޑައިރެކްޓުކޮށްފައިވާ ޒޯޔާ ބުނެފައިވާ ގޮތުގައި، ކަރީނާ އެހެން ބުނީ ޑީޑީއެލްޖޭގެ ތަރި ޝާހު ރުކް ހާންގެ ގޭގައި އޮތް ޕާޓީއެއްގެ ތެރެއިންނެވެ.
'ކޮފީ ވިތު ކަރަން'ގެ އެޕިސޯޑެއްގައި 2004 ވަނަ އަހަރު ޒޯޔާ ބުނީ، ޑީޑީއެލްޖޭ ބަލާފައި ރޭލެއްގެ ފަހަތުން ދުވެފައި ދާން ހިތަށް އަރާތޯ ކަރީނާ އޭނާއާ ސުވާލުކުރުމުން، ނޫނެކޭ ބުނި ކަމަށެވެ. އަދި، އެއީ އޭނާއަށް އެންމެ ކަމުދާ ފިލްމުތޯ ކަރީނާ އެހުމުން އެ ފިލްމު ކަމުދާ ކަމަށާއި ނަމަވެސް އެއީ އެންމެ ކަމުދާ ފިލްމު ނޫން ކަމަށް ކަރީނާ ގާތު ބުނި ކަމަށް ޒޯޔާ އެ އިންޓަވިއުގައި ބުންޏެވެ.
ޒޯޔާ ބުނީ ކަރީނާއަކީ އޭނާއަށް ކަމުދާ އަދި އޭނާއާ ގުޅޭ މީހެއް ނަމަވެސް، 'ދިލްވާލޭ ދުލްހަނިޔާ ލޭޖާއޭނގޭ' އަކީ އެހާތަނަށް އުފެއްދި އެންމެ މޮޅު ފިލްމު ކަމަށް ގަބޫލު ނުކުރާ ނަމަ ޒޯޔާ އަށް ޑައިރެކްޓަރަކަށް ނުވެވޭނެ ކަމަށް ކަރީނާ ބުނި ކަމަށެވެ.
އެ ދެ މީހުންގެ ޒުވާބު ހުއްޓުވަން އެ ދެމެދަށް ޝާހު ރުކް ހާން އަށް ވަންނަން ޖެހުނު ކަމަށް ވެސް ޒޯޔާ ބުންޏެވެ.
ޒޯޔާ އެންމެ ފުރަތަމަ ޑައިރެކްޓު ކުރި ފިލްމަކީ 2009 ވަނަ އަހަރުގެ 'ލަކް ބައި ޗާންސް' އެވެ. ބެލުންތެރިންގެ މަގުބޫލުކަން ލިބުނު ގިނަ ފިލްމުތަކެއް އޭގެ ފަހުން އޭނާ އުފެއްދި އެވެ.
ޒޯޔާގެ ކުރިއަށް އޮތް ޑައިރެކްޝަނަކީ އާޗީ ކޮމިކްސް އަށް ބިނާކޮށްގެން އުފައްދާ ނެޓްފްލިކްސް ސީރީޒް 'ދަ އާޗީސް' އެވެ.