އަޔުޝްމަން އާއި ރަކުލްގެ 'ޑޮކްޓާ ޖީ' ރިލީޒްކުރުން އަންނަ މަހު

އަޔުޝްމަން ކުރާނާ އާއި ރަކުލް ޕްރީތު ސިންގުގެ ފިލްމު 'ޑޮކްޓާ ޖީ' އަންނަ މަހުގެ 14 ވަނަ ދުވަހު ރިލީޒް ކުރަން ނިންމައިފި އެވެ.

ރިޕޯޓުތައް ބުނާގޮތުން، އަންނަ މަހު ތެރޭގައި ރަކުލްގެ އިތުރު ފިލްމެއް ވެސް ރިލީޒް ކުރާނެ އެވެ. އެއީ އަޖޭ ދޭވްގަންގެ 'ތޭންކް ގޯޑް' އެވެ. މީގެ އިތުރުން 'ޑޮކްޓާ ޖީ' ރިލީޒްކުރާތާ 11 ވަރަކަށް ދުވަސް ފަހުން އަކްޝޭ ކުމާރުގެ 'ރާމް ސެޓޫ' ވެސް ރިލީޒް ކުރަން ވަނީ ނިންމައިފަ އެވެ.

'ޑޮކްޓާ ޖީ' އިން ރަކުލް އާއި އަޔުޝްމަންގެ އިތުރުން ޝިފާލީ ޝާހު ވެސް ފެންނާނެ އެވެ. މިއީ ޖަންގްލީ ޕިކްޗާސް އާއެކު އަޔުޝްމަންގެ ތިންވަނަ ފިލްމެވެ. އޭނާ ވަނީ އެ ޕްރޮޑަކްޝަން ހައުސްގެ ކާމިޔާބު ދެ ފިލްމު ކަމަށްވާ 'ބަރޭލީ ކީ ބަރުފީ' އަދި 'ބަދާއީ ހޯ'ގައި ވެސް މަސައްކަތް ކޮށްފަ އެވެ.

މި ފިލްމުގައި އަޔުޝްމަން އާއި ރަކުލް އަދި ޝިފާލީ ވެސް ފެންނާނީ ޑޮކްޓަރުންގެ ރޯލުންނެވެ. މި ފިލްމު ރިލީޒް ކުރަން މީގެ ކުރިން ނިންމާފައި އޮތީ މިދިޔަ ޖޫން މަހު އެވެ. އެކަމަކު ކޮވިޑާ ހުރެ ބައެއް މަސައްކަތްތައް ލަސްވުމުން ފިލްމު ރިލީޒް ކުރުން ފަސް ކުރީ އެވެ.