ކްރިތީ ބުނީ އޭނާ އާއި އަދިތިޔާ ވަރަށް ގުޅޭނެ ކަމަށް

އޭނާ އާއި އަދިތިޔާ ރޯއީ ކަޕޫރުގެ ޖޯޑު ވަރަށް ގުޅޭނެ ކަމަށް ކްރިތީ ސަނޯން ބުނެފި އެވެ.

'ކޮފީ ވިތު ކަރަން'ގެ އެޕިސޯޑެއްގައި ކްރިތީ ބުނީ އަދިތިޔާ އަކީ ވަރަށް މަޖާ މީހެއް ކަމަށެވެ. އެކަމަކު އެ ދެ މީހުން ދެމެދުގައި ހާއްސަ ގުޅުމެއް ނެތް ކަމަށް ކްރިތީ ބުންޏެވެ.

އަދިތިޔާ އަކީ ރަނގަޅު މީހެއް ކަމަށް ބުނުމަށް ފަހު ދެން ކްރިތީ ބުނީ އޭނާ އާއި އަދިތިޔާ ވަރަށް ގުޅޭނެ ކަމަށް ގަބޫލު ކުރާ ކަމަށެވެ.

ކަރަންގެ ޕާޓީއެއްގައި ކްރިތީ އާއި އަދިތިޔާ ގައިގޯޅިކޮށް އުޅުނުތަން ފެނުނު ކަމަށް ކަރަން ބުނުމުން ކްރިތީ ވަނީ އެކަން ދޮގުކޮށްފަ އެވެ.

އަދިތިޔާ އަކީ ބޮލީވުޑުގެ ޒުވާން އަންހެނުންގެ މެދުގައި މަގުބޫލު ތަރިއެކެވެ. ކްރިތީ އާއި އަދިތިޔާ އެކުގައި ސަންޖޭ ލީލާ ބަންސާލީގެ ފިލްމަކުން ފެންނާނެ ކަމަށް ވެ އެވެ. އެ ފިލްމާ ގުޅޭގޮތުން އެއްވެސް ފަރާތަކުން މިހާތަނަށް ރަސްމީކޮށް އެއްޗެއް ނުބުނި ނަމަވެސް އެއީ ލޯބީގެ ފިލްމެއް ކަމަށް ރިޕޯޓުކޮށްފައިވެ އެވެ.