'ކަހާނީ ގަރް ގަރް ކީ' އަލުން ޓީވީ ސްކްރީނަށް

ދެހާސް ވަނަ އަހަރުން ފެށިގެން އަށް އަހަރު ވަންދެން ސްޓާ ޕްލަސްއިން ދެއްކި މަގުބޫލު ސީރީޒް 'ކަހާނީ ގަރް ގަރް ކީ' އަލުން ޓީވީ އިން ދައްކަން ނިންމައިފި އެވެ.

ދެހާހުގެ އަހަރުތަކުގައި ދެއްކި ޓީވީ ސީރީޒްތަކުގެ ތެރެއިން އެންމެ މަގުބޫލު އެއް ސީރީޒް އަލުން ސްކްރީނަށް ގެންނަން ނިންމާފައިވާކަން ޕްރޮޑިއުސަރު އެކްތާ ކަޕޫރު ވަނީ ޔަގީންކޮށްދީފަ އެވެ.

އެކްތާގެ މި ސީރީޒް އަލުން ސްޓާ ޕްލަސް އިން ދައްކަން ނިންމާފައިވަނީ އަންނަ މަހު 2 އިން ފެށިގެންނެވެ. ސްޓާ އިން ވަނީ އެ ސީރީޒްގެ ޕްރޮމޯ ވެސް ދައްކަން ފަށައިފަ އެވެ. ސާކްޝީ ތަންވާރު ލީޑުން ފެންނަ މި ސީރީޒް ދައްކާނީ ހޯމަ އިން އާދިއްތަ އަށް ކޮންމެ ދުވަހެއްގެ މެންދުރު 3 ޖަހާއިރެވެ.

ސާދަ އަހަރަށް ފަހު އަލުން މި ސީރީޒް ދައްކަން ފަށާއިރު، އޭރާ އަޅާބަލާއިރު ގިނަ ކަންތައްތަކެއް ވަނީ ބަދަލުވެފަ އެވެ. ހާއްސަކޮށް އޭރާއި މިހާރު ދިރިއުޅުމުގެ ކަންތައްތަކުގައި ހުންނަ ތަފާތު ފާހަގަ ކުރެވޭނެ ކަމަކަށް އަލުން މި ސީރީޒް ޓީވީ އިން ބަލާލުން ވާނެ އެވެ.

އޭރު ވެސް ގަޔާވެގެން ކޮންމެ ރެއަކު 10 ޖަހާއިރު ޓީވީ އިން 'ކަހާނީ ގަރް ގަރް ކީ' ބެލި މީހުން އަނެއްކާވެސް މި ސީރީޒް އަށް އެހާ ބޮޑު ޝައުގުވެރިކަމެއް ދީގެން ބެލުމަކީ ހަމަ އެކަށީގެންވާ ކަމެކެވެ.