ސަރުކާރު ހިއްސާވާ ސްޕޯޓްސް ކޯޕަރޭޝަނަށް 2،000 ރުފިޔާގެ އާމްދަނީއެއް

މޯލްޑިވްސް ސްޕޯޓްސް ކޯޕަރޭޝަނަށް މިދިޔަ އަހަރުގެ ފަހު ކުއާޓަރުގައި އާމްދަނީއަށް 2،000 ރުފިޔާ ލިބި، ބޮޑު ގެއްލުމަކާ އެކު އެ ކުއާޓަރު ނިންމާލައިފި އެވެ.

ވީ ކިހިނެއް؟ - ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)އިން ނެރުނު ސަރުކާރު ހިއްސާވާ ކުންފުނިތަކުގެ މާލީ ރިޕޯޓުގައި ފާހަގަކޮށްފައިވާ ގޮތުގައި ސްޕޯޓްސް ކޯޕަރޭޝަނަށް މިދިޔަ އަހަރުގެ ފަހު ކުއާޓަރުގައި އާމްދަނީގެ ގޮތުގައި ލިބުނީ 2،156ރ. އެވެ.

އޭގެ ކުރިން، 2020ގެ ފަހު ކުއާޓަރުގައި 1.27 މިލިއަން ރުފިޔާގެ އާމްދަނީއެއް އެ ކުންފުނިން ހޯދާފައިވެ އެވެ.

ތަފްސީލު - އެ ރިޕޯޓުން ލިބެން ހުރި މައުލޫމާތަށް ބަލާ އިރު، 2021ގެ ފަހު ކުއާޓަރުގައި އެއްވެސް އާމްދަނީއެއް ނުލިބޭ ކުންފުނިތައް (ފަހި ދިރިއުޅުން ކޯޕަރޭޝަނާއި މޯލްޑިވްސް ފަންޑް މެނޭޖްމަންޓް ކޯޕަރޭޝަން) ފިޔަވައި އާމްދަނީ ލިބުނު ކުންފުނިތަކުގެ ލިސްޓުގެ އެންމެ ފުލުގައި އޮތީ ސްޕޯޓްސް ކޯޕަރޭޝަނެވެ.

ސްޕޯޓްސް ކޯޕަރޭޝަނަށް އެ މުއްދަތުގައި އާމްދަނީ ލިބުނީ، ގާފަރު ސްކޫލަށް ބޭނުންވާ އެކްޓިވިޓީ ޔުނީފޯމު ވިއްކައިގެންނެވެ.

ފުރަތަމަ ތިން ކުއާޓަރުގައި ސްޕޯޓްސް ކޯޕަރޭޝަނުން އާމްދަނީ ހޯދަން ނުވަތަ އާމްދަނީ ލިބޭ އެއްވެސް މަސައްކަތެއް ކޮށްފައި ނުވާ ކަމަށް ޕީސީބީގެ ރިޕޯޓުތަކުގައި ފާހަގަކޮށްފައިވެ އެވެ. ފަހު ކުއާޓަރުގައި ރަނގަޅު އާމްދަނީއެއް ނުލިބުމާއި ފުރަތަމަ ތިން ކުއާޓަރުގައި އާމްދަނީ ލިބޭ މަސައްކަތެއް ކޮށްފައި ނުވާތީ، އެ ކުންފުނިން ހުރިހާ ކުއާޓަރެއް ވެސް ނިންމައިލީ ގެއްލުމުގަ އެވެ.

ސްޕޯޓްސް ކޯޕަރޭޝަނަށް ހަތަރު ކުއާޓަރުގައި ލިބުނު ގެއްލުން:

ސްޕޯޓްސް ކޯޕަރޭޝަންގެ ހަރަދުތައް ކުޑަކުރުމަށް ޓަކައި 2021ގެ ފަހު ކުއާޓަރުގައި މުވައްޒަފުންގެ އަދަދު މަދުކޮށް، މުސާރައަށް ކުރާ ހޭދަ ވަނީ ކުޑަކޮށްފަ އެވެ. އަދި ބޯޑު ބައްދަލުވުންތައް މަދުވުމާ އެކު ބޯޑު ރެމިއުނަރޭޝަނަށް ހިނގާ ހަރަދު ވެސް ފަހު ކުއާޓަރުގައި ވަނީ ކުޑަވެފަ އެވެ.