ރާއްޖޭގެ ފަތުރުވެރިކަމުގެ އެއް ބާނީ ޖޯޖު ކޯބިންއަށް ބޯޑާ މައިލްސްގެ އެންމެ ފުރަތަމަ 'އަބާރަނަ ޓިއާ' މިއަދު ހަވާލުކުރަނީ. (ފޮޓޯ/އިމިގްރޭޝަންސް)
ބޯޑާ މައިލްސްގެ ފުރަތަމަ 'އަބާރަނަ ޓިއާ' ކޯބިން އާއި ދަރިކަނބަލުންނަށް
ރާއްޖޭގެ ފަތުރުވެރިކަމުގެ އެއް ބާނީ ޖޯޖު ކޯބިން އާއި އޭނާގެ ދަރިކަނބަލުން ޖޯޖިއާ ކޯބިންއަށް، މޯލްޑިވްސް ބޯޑާ މައިލްސް ޕްރޮގްރާމުގެ އެންމެ ޝަރަފުވެރި ގިންތި ކަމަށްވާ 'އަބާރަނަ ޓިއާ' މިއަދު އަރުވައިފި އެވެ.
އެނގުން މުހިންމު - މިއީ 'އަބާރަނަ ޓިއާ' ފަތުރުވެރިއަކަށް ދިން ފުރަތަމަ ފަހަރެވެ. ޖޯޖިއާ ކޯބިން ވަނީ 1972ގައި ރާއްޖޭގައި ޓޫރިޒަމް ފެށުމުގެ މަސައްކަތް ކޯބިން ކުރެއްވި އިރު، އޭނާއާ އެކު ރާއްޖެ އައިސްފަ އެވެ.
އަބާރަނަ ޓިއާ:
-
އެންމެ ޝަރަފުވެރި ޓިއާ
-
މި ޓިއާގެ މެމްބަރުންނަށް ވެލާނާ އިންޓަނޭޝަނަލް އެއާޕޯޓް (ވީއައިއޭ)ގެ ވީއައިޕީ ހިދުމަތް ހިލޭ ލިބޭނެ
-
ޕާޓްނާ ރިސޯޓުތަކާއި ގެސްޓްހައުސްތަކުން ވެސް ހާއްސަ އިނާޔަތްތަކެއް ލިބޭނެ
ވީ ކިހިނެއް؟ - ކޯބިން އާއި އޭނާގެ ދަރިކަނބަލުންނަށް އަބާރަނަ ޓީއާ އެރުވީ އެ ބޭފުޅުން ރާއްޖެއަށް ކުރެއްވި ރަސްމީ ދަތުރު ނިންމާލެއްވުމަށް ފަހު މިއަދު ހަވީރު ރާއްޖެއިން ފުރާވަޑައިގަތުމުގެ ކުރިން ވީއައިއޭގެ ވީއައިޕީ ލައުންޖުގައި ބޭއްވި ހަފްލާއެއްގައި، ހެލްތު މިނިސްޓަރު އަހްމަދު ނަސީމް އެވެ. ނަސީމަކީ ރާއްޖެއަށް ޓޫރިޒަމް ތައާރަފްކުރުމުގައި ކޯބިންއާ އެކު މަސައްކަތްކުރެއްވި ބޭފުޅެކެވެ.
ތަފްސީލު - މި ދަތުރުގައި ކޯބިން އާއި އޭނާގެ ދަރިކަނބަލުން ރާއްޖެ ވަޑައިގަތީ މި މަހުގެ 15ގަ އެވެ. އެއީ ރާއްޖޭގެ ފަތުރުވެރިކަމަށް 50 އަހަރު ފުރުމުގެ ރަންޔޫބިލް ފާހަގަކުރުމުގެ ގޮތުން ބާއްވަމުން އަންނަ ހާއްސަ ހަރަކާތްތަކުގައި ބައިވެރިވެވަޑައިގަތުމަށެވެ.
ކޯބިން ގެނައި ފަތުރުވެރިންގެ އެންމެ ފުރަތަމަ ގްރޫޕް ރާއްޖެ އައީ 16 ފެބުރުވަރީ 1972ގަ އެވެ. ނޫސްވެރިންނާއި ޑައިވަރުން ހިމެނޭ ފަތުރުވެރިންގެ އެ ގްރޫޕަށް ރާއްޖޭގެ ގުދުރަތީ ރީތިކަން ފެނި، ރާއްޖެއަކީ "ދުނިޔެމަތީގެ ސުވަރުގެ"ގެ ގޮތުގައި ސިފަކޮށްފައިވެ އެވެ.
ބޯޑާ މައިލްސް ޕްރޮގްރާމް
މިއީ ރާއްޖެ އަންނަ ފަތުރުވެރިން، ރާއްޖެއަށް ޒިޔާރަތްކުރާ އަދަދާއި ހޭދަކުރާ މުއްދަތަށް ބަލައިގެން ޕޮއިންޓު ދޭ ލޯޔަލްޓީ ޕްރޮގްރާމެކެވެ. މި ޕްރޮގްރާމު ފެށީ 1 ޖެނުއަރީ 2021ގަ އެވެ.
މި ޕްރޮގްރާމުގައި ހިމެނެނީ ތިން ގިންތިއެކެވެ. އެއީ:
-
އައިދަ (ބްރޯންޒް ޓިއާ)
-
އަންތަރަ (ސިލްވާ ޓިއާ)
-
އަބާރަނަ (ގޯލްޑް ޓިއާ)
މި ޕްރޮގްރާމުގައި ބައިވެރިވާ ފަތުރުވެރިންނަށް ޕޮއިންޓު ލިބޭނެ އެކިއެކި ކަންކަން ވަނީ ހިމަނާފަ އެވެ. އޭގެ ތެރޭގައި ހިމެނެނީ:
-
ރާއްޖޭގެ ބޯޑަރު ހުރަސް ކުރުން
-
ހަނީމޫން، ވެޑިން އެނިވާސަރީ ނުވަތަ އުފަންދުވަސް ފާހަގަކުރަން އައުން
-
ހޭދަކުރާ ކޮންމެ ރެއަކަށް
-
ބޯޑާ މައިލްސްގެ ޕާޓްނަރުންގެ ފަރާތުން ހިދުމަތް ހޯދައިގެން
-
ސީޒަނަލް ބޯނަސް
-
ދިވެހިންގެ ހާއްސަ މުނާސަބާތަކުގައި އައުމުން