ޓޫރިޒަމްގައި ރާއްޖެ ކުރި ދަތުރު ދައްކުވައިދޭ ސްޓޭމްޕް ސެޓެއް ނެރެފި

ރާއްޖޭގެ ފަތުރުވެރިކަމަށް 50 އަހަރު ފުރުން ފާހަގަ ކުރުމަށް ހާއްސަ ސްޓޭމްޕް ސެޓެއް ތައާރަފުކޮށް ނެރެފި އެވެ.

ވީ ކިހިނެއް؟ - މިއަދު ބޭއްވި ރަސްމިއްޔާތެއްގައި އެ ސްޓޭމްޕް ސެޓު ނެރެދެއްވީ ރާއްޖޭގެ ފަތުރުވެރިކަމުގެ ބާނީން ކަމަށްވާ، މަޓީގެ ޗެއާމަން މުހައްމަދު އުމަރު (އެމްޔޫ) މަނިިކު، މަޓީގެ ވައިސް ޗެއާމަން ހުސައިން އަފީފް، ހެލްތު މިނިސްޓަރު އަހްމަދު ނަސީމް، ޖޯޖް ކޯބިން އަދި ރާއްޖޭގެ ފުރަތަމަ ޓޫރިޒަމް މިނިސްޓަރު އަހްމަދު މުޖުތަބާ އެވެ.

ތަފްސީލު - އަލަށް ނެރުނު ސްޓޭމްޕް ސެޓުން ދައްކުވައިދެނީ މިވީ 50 އަހަރުގެ ތެރޭގައި ފަތުރުވެރިކަމުގެ ސިނާއަތުގައި ރާއްޖެ ކުރި ދަތުރާއި އެ މުއްދަތުގައިި ރާއްޖޭގެ ފަތުރުވެރިކަން ކުރިއަރައިގެން އައި ގޮތެވެ. އެކަން ދައްކުވައިދޭ ގޮތަށް، ތަފާތު ހަ ސްޓޭމްޕެއް، އެ ސެޓުގައި ހިމެނެ އެވެ.

ރާއްޖެ އާއި ރާއްޖެއިން ބޭރުގެ ފަރާތްތަކަށް ވެސް މޯލްޑިވްސް ޕޯސްޓުގެ އޮންލައިން ޕްލެޓްފޯމު 'އީ-ޓުކުރި' މެދުވެރިކޮށް އެ ސްޓޭމްޕް ސެޓު ގަތުމުގެ ފުރުސަތު ވަނީ ހުޅުވާލާފަ އެވެ.

އެ ރަސްމިއްޔާތުގައި ރާއްޖޭގައި ފަތުރުވެރިކަން ފުޅާވެގެން އައި ގޮތުގެ ޓައިމްލަނެއް ވަނީ ދައްކާލާފަ އެވެ.

ރާއްޖޭގެ ފަތުރުވެރިކަމުގެ ޓައިމްލައިން؛

އެނގުން މުހިންމު - ރާއްޖޭގެ ފަތުރުވެރިކަމަށް 50 އަހަރުން ފުރުން ފާހަގަކުރުމަށް ޓަކައި މުޅި އަހަރަށް ބަހާލައިގެން އެކިއެކި ހަރަކާތްތައް ކުރިއަށް ގެންދިއުމަށް ވަނީ ރާވައިފަ އެވެ.

އޭގެ ތެރޭގައި މާދަމާ (17 ފެބްރުއަރީ)ގައި ފަށާ އަދި ސިލްސިލާއެއް ގޮތުގައި ކުރިއަށްގެންދާ ޓޫރިޒަމް އަޕްބީޓް ޓޯކްޝޯއަކާއި ޖުލައި މަހު ބާއްވާ ބައިނަލްއަގްވާމީ ޓޫރިޒަމް ކޮންފަރެންސް ހިމެނެ އެވެ.

އޭގެ އިތުރުން، ރާއްޖޭގައި ފުރަތަމަ ފަހަރަށް ގައުމީ ފަތުރުވެރިކަމުގެ ދުވަސް ވެސް ފާހަގަކުރާނީ މި އަހަރު އެވެ. ގައުމީ ފަތުރުވެރިކަމުގެ ދުވަހުގެ ގޮތުގައި ކަނޑައަޅާފައިވަނީ ރާއްޖޭގެ ފުރަތަމަ ރިސޯޓު، ކުރުނބާ ވިލެޖު ހުޅުވި ތާރީހު، 3 އޮކްޓޫބަރެވެ.