އިމާރާތްކުރުމާ ބެހޭ ފޯރަމްގެ ސްޕޮންސަރަކަށް އުރީދޫ ބިޒްނަސް ހަމަޖައްސައިފި

ކޮންސްޓްރަކްޝަން އިންޑަސްޓްރީ ފޯރަމް 2026ގެ ޕްލެޓިނަމް ސްޕޮންސަރަކަށް އުރީދޫ ބިޒްނަސް ހަމަޖައްސައިފި އެވެ.

ވީ ކިހިނެއް؟ - އަންނަ މަހުގެ 18 ވަނަ ދުވަހު ހުޅުމާލޭގެ 'ގްރޭންޑް ޕާކްސައިޑް ބައި ވަން ސެންޓްރަލް ޕާކް'ގައި މި ފޯރަމް ބާއްވަނީ މީޑިއަމް އިވެންޓްސް އިން، މޯލްޑިވްސް ނޭޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ (މަސީ)ން އެންޑޯސްކޮށްގެންނެވެ.

ތަފްސީލް - މި ފޯރަމްގައި ސިޔާސަތު ކަނޑައަޅާ ފަރާތްތަކާއި މި ދާއިރާގެ އިސްވެރިންނާއި އިމާރާތްކުރުމުގެ ދާއިރާގެ ހިއްސާދާރުން އެއްތަނަކުން ބައްދަލުވެ، ރާއްޖޭގެ އުމްރާނީ ތަރައްގީއަށް ހުރި ގޮންޖެހުންތަކާއި ފުރުސަތުތަކުގެ އިތުރުން ކުރިއަށް އޮތް ތަނުގައި މި ދާއިރާ މިސްރާބުކުރާނެ ގޮތްތަކާ މެދު މަޝްވަރާ ކުރާނެ އެވެ.

ކޮންސްޓްރަކްޝަން އިންޑަސްޓްރީ ފޯރަމްގައި ވާހަކަދައްކަވާނެ ޕެނަލިސްޓުންނާއި މި ހަރަކާތާ ގުޅޭ އިތުރު ތަފްސީލުތައް އެ ފޯރަމްގެ ސޯޝަލް މީޑިއާ ޕްލެޓްފޯމްތައް މެދުވެރިކޮށް ހިއްސާކުރާނެ އެވެ. މި ފޯރަމްގެ ޓިކެޓް ލިބޭނީ ވަކި އަދަދެއްގެ މަދު ބަޔަކަށެވެ.

އުރީދޫ ބިޒްނަސްއާ އެކު ވީ ބައިވެރިވުމުގެ ބޭނުމަކީ، މީޑިއަމް އިވެންޓްސް އިން ބުނި ގޮތުގައި، އިމާރާތްކުރުމުގެ ދާއިރާގައި ސްމާޓް ޓެކްނޮލޮޖީ ނުވަތަ ޒަމާނީ ފަންނީ ވަސީލަތްތައް ފުޅާ ދާއިރާއެއްގައި ބޭނުންކުރުމަށް އެހީތެރިވުމެވެ.

އުރީދޫ ބިޒްނަސްއަކީ ވިޔަފާރިތަކަށް ބޭނުންވާ އެންޓަޕްރައިޒް ކަނެކްޓިވިޓީ، ސްމާޓް އިންފްރާސްޓްރަކްޗާ، އިންޓަނެޓް އޮފް ތިންގްސް އަދި މުވާސަލާތީ އެކި ހިދުމަތްތައް ފޯރުކޮށްދޭ ބައެކެވެ.