ސީއެސްއާރުގައި މުވައްޒަފުންގެ ބައިވެރިވުން އިތުރުކުރަން ދިރާގުން ޕްލެޓްފޯމެއް ތައާރަފްކޮށްފި

ދިރާގުން އެ ކުންފުނީގެ މުވައްޒަފުންނަށް ހާއްސަކޮށްގެން، މުޖުތަމައުއަށް އެހީތެރިކަން ފޯރުކޮށްދިނުމުގައި މުވައްޒަފުންގެ ފުރިހަމަ ބައިވެރިވުމާއި އިސްނެގުން އިތުރުކުރުމުގެ މަގުސަދުގައި، 'ޕިޗު ފޯ ޕާޕަސް' ޕްލެޓްފޯމް މިއަދު ތައާރަފުކޮށްފި އެވެ.

ވީ ކިހިނެއް؟ - 'ޕިޗު ފޯ ޕާޕަސް'އަކީ އިޖުތިމާއީ ޒިންމާ އަދާކުރުމުގައި މުވައްޒަފުންގެ ބައިވެރިވުން އިސްކޮށް، އެ މުވައްޒަފުންގެ ހިތްތަކާ އެންމެ ބޮޑަށް ގުޅިފައިވާ އިޖުތިމާއީ ކަންކަން ދެނެގަނެ، އެ ކަންކަމުގައި ބައިވެރިވުމުގެ ފުރުސަތު ފަހިކޮށްދިނުމަށް ދިރާގުގައި ފަރުމާކޮށްފައިވާ މިފަދަ ފުރަތަމަ ޕްރޮގްރާމެވެ.

ތަފްސީލް - 'ޕިޗު ފޯ ޕާޕަސް' މެދުވެރިކޮށް:

ފާހަގަކޮށްލެވޭ - ތިމާވެށި ރައްކާތެރިކުރުމާއި މެންޓަރިން ޕްރޮގްރާމާއި ހުނަރު ތަރައްގީކުރުމުގެ ވޯކްޝޮޕްތަކުގެ އިރުތުން މުޖުތަމައުގެ ކުރިއެރުމަށް ހިންގާ އެކި ހަރަކާތްތަކުގައި ވޮލަންޓިއަރުން ގޮތުގައި ދިރާގުގެ މުވައްޒަފުން ދަނީ އަބަދު ވެސް ހީވާގިކަމާ އެކު ބައިވެރިވެ ނަމޫނާ ދައްކަމުންނެވެ.

'ޕިޗު ފޯ ޕާޕަސް' ޕްލެޓްފޯމް ތައާރަފްކުރުމާ އެކު ދިރާގުގެ މުވައްޒަފުންނަށް މުޖުތަމައަށް ބޭނުންވެފައިވާ ކަންކަން ދެނެގަތުމުން ފެށިގެން، އެކަންކަމަށް ހައްލު ހޯދައިދިނުމަށް ހިޔާލު ހުށަހަޅައި، ޕްރޮގްރާމް ރާވައި އަމަލީ ގޮތުން އިޖުތިމާއީ ކަންކަމުގައި އެންމެ ފުރިހަމައަށް ބައިވެރިވުމުގެ ފުރުސަތު ލިބޭނެ އެވެ.

'ގްރޭޓް ޕްލޭސް ޓު ވޯކް' ސެޓްފިކެޓް ހާސިލުކޮށްފައިވާ ކުންފުންޏެއްގެ ހައިސިއްޔަތުން، ދިރާގުން އަބަދު ވެސް މަސައްކަތްކުރަނީ މުވައްޒަފުންގެ ކުރިއެރުމަށާއި މުވައްޒަފުންގެ ހިޔާލާއި ބައިވެރިވުން އިތުރުކުރުމަށެވެ.