އިހަވަންދިއްޕޮޅުގައި އޮފްޝޯ ބަންކަރިންގެ ހިދުމަތް ފެށި ދުވަހު ބޯޓަކަށް އެ ހިދުމަތް ދޭ މަންޒަރު.
އިހަވަންދިއްޕޮޅު ބަނދަރުގެ ސަރަހައްދު ކަނޑައަޅައިފި
ސަރުކާރުން އޮފްޝޯ ބަންކަރިން ހިދުމަތް ފެށި އިހަވަންދިއްޕޮޅުގައި އެ ހިދުމަތަށް ބޭނުންވާ 'އޮފް ޕޯޓު ލިމިޓު' ކަނޑައަޅައިފި އެވެ.
ވީ ކިހިނެއް؟ - އޮފް ޕޯޓު ލިމިޓާއި އޮފްޝޯގައި ހިދުމަތް ދިނުމާ ބެހޭ ގަވާާއިދަށް ސަރުކާރުން ފުރަތަމަ އިސްލާހު ގެނައީ އިއްޔެ އެވެ.
ތަފްސީލު - އެ އިސްލާހުގައި އިހަވަންދިއްޕޮޅު ސަރަހައްދުގެ އޮފް ޕޯޓު ލިމިޓު ކަނޑައަޅައި އެ ސަރަހައްދުގެ މެޕް ކޯޑިނޭޓްސް ވަނީ ބަޔާންކޮށްފަ އެވެ.
މީގެ ކުރިން އެ ގަވާއިދުގައި އޮފް ޕޯޓު ލިމިޓު ކަނޑައަޅާފައިވަނީ ހަމައެކަނި ކުޅުދުއްފުށީގެ ސަރަހައްދީ ބަނދަރާ ގުޅުވައިގެންނެވެ.
އޮފް ޕޯޓު ލިމިޓުގެ ސަރަހައްދަކީ ރަސްމީ ވިޔަފާރި ބަނދަރަކާ ގުޅިގެން ކަނޑައަޅާފައި އޮންނަ ވަކި ސަރަހައްދެކެވެ.
އޮފް ޕޯޓު ލިމިޓް ކަނޑައެޅުމުން އުޅަނދުފަހަރަށް ޕޯޓް ކޯލް ނުދީ، ބަނދަރުނުކޮށް އެކި ހިދުމަތްތައް ލިބޭނެ އެވެ. މިއީ އުޅަނދުފަހަރު ހިންގާ ފަރާތްތަކަށް ވަގުތާއި ހަރަދު ސަލާމަތްކުރެވޭ ގޮތެކެވެ.
އަލަށް ގެނައި އިސްލާހުގައި އިތުރަށް ހިމެނޭ ބައެއް ކަންތައްތަކަކީ:
-
އޮފް ޕޯޓު ލިމިޓަށް ނުވަތަ އޮފްޝޯއަށް އަންނަ އުޅަނދު އަންނަކަން، އެ އުޅަނދެއް އައުމުގެ ލަސްވެގެން 12 ގަޑިއިރު ކުރިން ކަމާ ބެހޭ މުއައްސަސާތަކަށް އެންގުން؛ ކުރިން މިކަމަށް ދީފައި އޮންނަނީ 48 ގަޑއިރު
-
އޮފް ޕޯޓު ލިމިޓާއި އޮފްޝޯ ސަރަހައްދުގައި އުޅަނދުފަހަރު މަޑުކުރުމުގެ ކުރިން ކަމާބެހޭ މުއައްސަސާތަކުން ހުއްދަ ނަގަންޖެހޭ ގޮތަށް ކަނޑައެޅުން
-
އޮފް ޕޯޓު ލިމިޓާއި އޮފްޝޯގައި ބަނދަރުކުރާ އުޅަނދުފަހަރަށް ހިދުމަތް ދޭ ކުންފުންޏާއި އުޅަނދުފަހަރުން ޓްރާންސްޕޯޓް މިނިސްޓްރީން ލައިސަންސެއް ހޯދަން ޖެހޭ ގޮތަށް ކަނޑައެޅުން؛ މި ލައިސެންސް ދޫކުރާނީ އަހަރަކު އެއް ފަހަރު އަދި މުއްދަތު ހަމަވުމުގެ އެއް މަސް ކުރިން އާ ކުރަން ހުށަހަޅަން ޖެހޭނެ
-
އޮފް ޕޯޓު ލިމިޓާއި އޮފްޝޯގައި ދެވޭ ހިދުމަތްތަކަށް އުޅަނދުގެ މާސްޓަރު، ކުރޫ، ބޯޓުގެ ފަޅުވެރިން، ސްޕާނިއުމެރީން، ސީ މާޝަލުން (ހަތިޔާރާ ނުލައި) ބަދަލުކުރުމުގެ ހިދުމަތް އިތުރުކުރުން
މި އިސްލާހަށް އިއްޔެ ވަނީ އަމަލުކުރަން ފަށާފަ އެވެ.
އޮފްޝޯ ބަންކަރިން ހިދުމަތް
ސަރުކާރުން އިހަވަންދިއްޕޮޅުގައި އޮފްޝޯ ބަންކަރިން ހިދުމަތް ފެށީ މިދިޔަ މަހުގެ 20ގަ އެވެ. އެ ހިދުމަތް ރާވާފައިވާ ގޮތަކީ:
-
އޮފްޝޯ ބަންކަރިން ނުވަތަ ބޯޓުތަކަށް ތެޔޮ ފޯރުކޮށްދިނުމުގެ ހިދުމަތް ދޭނީ އެސްޓީއޯއިން
-
އެސްޓީއޯއިން ފުރަތަމަ ހިދުމަތް ދޭނީ ދެ ބާވަތެއްގެ އުޅަނދުތަކަކަށް؛ އެއީ ލަގްޒަރީ ޔޮޓާއި ބޯޓުތަކަށް ބޭނުންވާ މެރިން ގޭސް އޮއިލް (ޑީސަލް) އާއި ބޮޑެތި އާގުބޯޓުފަހަރަށް ބޭނުންވާ 'ވެރީ ލޯ ސަލްފާ ފިއުލް އޮއިލް'
-
ޕައިލަޓޭޖާއި މެރިޓައިމްގެ އެހެން ހިދުމަތްތައް ދޭނީ އެމްޕީއެލްއިން
-
ހިދުމަތް ފެށީ 3،258 ޓަނުގެ އެމްޓީ މެރިން އޭންޖަލް އާއި 3،929 ޓަނުގެ އެމްޓީ މެރިން ބެލާ ބޭނުންކޮށްގެން
-
ހިދުމަތް ފުޅާކުރަން އެ ސަރަހައްދުގައި ސްޓޯރޭޖު ވެސް ގާއިމްކުރަން ވަނީ ރާވާފައި
