ބީއެމްއެލްއިން ގާފަރަށް ބޭންކިން ހިދުމަތް ފުޅާކޮށްފި

ބޭންކް އޮފް މޯލްޑިވްސް (ބީއެމްއެލް)އިން ރާއްޖޭގެ މީހުން ދިރިއުޅޭ ހުރިހާ ރަށަކަށް ބޭންކިން ފުޅާކުރުމަށް ކުރާ މަސައްކަތުގެ ދަށުން ކ. ގާފަރުގައި ސެލްފް ސާވިސް އޭޓީއެމް ސެންޓަރެއް ގާއިމްކޮށް ހިދުމަތް ފަށައިފި އެވެ. 

އެނގުން މުހިންމު - ބީއެމްއެލްގެ ސެލްފް ސާވިސް އޭޓީއެމް ސެންޓަރުތައް ފަރުމާކޮށްފައި ވަނީ  24 ގަޑިއިރު ފައިސާ ނެގުމުގެ އިތުރުން ފައިސާ ޖަމާކުރުމާއި، ބިލަށް ފައިސާ ދެއްކުމާއި ޓްރާންސްފަރ ކުރުމުގެ ހިދުމަތް ލިބޭ ގޮތަށެވެ. 

ބުނީ ކީކޭ؟ - ބީއެމްއެލް ހިންގުމާ ހަވާލުވެ ހުންނެވި ޑެޕިއުޓީ ސީއީއޯ އާއިޝަތު ނޫރައްދީން ވިދާޅުވީ ގާފަރުގައި އަލަށް ހުޅުވި ސެލްފް ސާވިސް ބޭންކިން ސެންޓަރަކީ ކަސްޓަމަރުން ބޭނުންވާފަދަ ބޭންކިން ހިދުމަތެއް ފޯރުކޮށްދިނުމަށް ބީއެމްއެލްއިން މަސައްކަތް ކުރާ ކަމުގެ ހެއްކެއް ކަމަށެވެ.

"ގާފަރުގައި ފެށި އޭޓީއެމް ހިދުމަތާއެކު ކ. އަތޮޅުގައި ކާށިދޫ އަދި މާފުށީގައި ގާއިމްކޮށްފައިވާ ދެ ބްރާންޗުގެ އިތުރުން މީހުން ދިރިއުޅޭ އިތުރު ހަ ރަށެއްގައި މިވަނީ ސެލްފް ސާވިސް އޭޓީއެމް ސެންޓަރުތައް ގާއިމްކޮށްފައި،" އާއިޝަތު ނޫރައްދީން ވިދާޅުވި އެވެ. 

ފާހަގަކޮށްލެވޭ - މުޅި ރާއްޖެއަށް ފަތުރާލާފައިވާ ބީއެމްއެލްގެ ބޭންކިން ވިއުގައިގައި 20 އަތޮޅުގައި 39 ބްރާންޗް، 89 ސެލްފްސާވިސް ބޭންކިން ސެންޓަރު، 144 އޭޓީއެމް ހިމެނެ އެވެ. މީގެ އިތުރަށް ކޭޝް އޭޖެންޓުގެ ހިދުމަތުގެ އިތުރުން އެންމެ ޒަމާނީ އޮންލައިން ބޭންކިން ހިދުމަތް ވެސް ބީއެމްއެލްއިން އަންނަނީ ފޯރުކޮށްދެމުންނެވެ.