ތަރައްގީކުރަން ނުފަށާ އޮތް ހަންކެޑެ ހިންގަން ޔޫއޭއީ ކުންފުންޏަކާ އެކު ސޮއިކޮށްފި

އިންޓަގްރޭޓެޑް ޓޫރިޒަމް މަޝްރޫއެއްގެ ގޮތުގައި ތަރައްގީކުރާ އައްޑޫ ހަންކެޑެ ހިންގަން ޔޫއޭޭއީގެ ހޮސްޕިޓާލީ ކުންފުންޏަކާ އެކު އެ މަޝްރޫއު ހިންގާ، މޯލްޑިވްސް ފަންޑް މެނޭޖްމަންޓް ކޯޕަރޭޝަން (އެމްއެފްއެމްސީ)ން ސޮއިކޮށްފި އެވެ. 

ވީ ކިހިނެއް؟ - އެމްއެފްއެމްސީގެ ރަސްމީ އެކްސް އެކައުންޓުން މިއަދު ކުރި ޓްވީޓެއްގައި ބުނީ ހަންކެޑެ ހިންގަން ސޮއިކުރީ ޔޫއޭއީގެ ކުންފުންޏެއް ކަމަށްވާ ޓައިމް ހޮޓަލްސްއާ އެކު ކަމަށެވެ. އެގޮތުން:

ތަފްސީލް - ޓައިމް ހޮޓަލްސްއިން ޔޫއޭއީގެ އިތުރަށް މިސްރާއި ގަތަރު ސައުދީ އަރަބިއްޔާ އަދި ލައިބީރިއާގައި ވެސް ހޮޓާ ހިންގަ އެވެ. އެ ކުންފުންޏާ އެކު ސޮއިކުރި އެއްބަސްވުމުގެ ތަފްސީލްތަކެއް އަދި ހާމައެއް ނުކުރެ އެވެ. 

އެތަން ހިންގަން ބަޔަކާ އެކު ސޮއިކުރިއިރު ހަންކެޑެ ތަރައްގީ ކުރުމުގެ ގޮތުން މާ ބޮޑެތި މަސައްކަތްތަކެއް އަދި ނުކުރެ އެވެ. ހަމައެކަނި ކުރި ކަމަކީ އެ ސަރަހައްދުގައި ހުރި ރުއްތަކެއް ނަގައި އެހެން ސަރަހައްދަކަށް ގެންދިޔުމެވެ. 

އެނގުން މުހިންމު - ގިނަ އަހަރުތަކެއް ވަންދެން ނުހެދި އޮތް އައްޑޫ ހަންކެޑެ ތަރައްގީކުރަން އާ ޕްލޭންތަކެއް އިއުލާންކޮށް އެއްބަސްވުންތަކުގައި ސޮއިކުރީ މިދިޔަ އަހަރުގެ މާޗް މަހުގެ ތެރޭގަ އެވެ. އެގޮތުން:

އޭރުގެ ސަރުކާރުން ބުނެފައި ވަނީ އެ މަޝްރޫއު ނިންމަން ސީއެންއީއީސީއަށް ދީފައިވަނީ ދެ އަހަރުގެ މުއްދަތެއް ކަމަށެވެ.