ރިސޯޓުތަކުގެ މުއްދަތު އިތުރުކުރަން ކުޑަ އަގު ދައްކަން އިތުރު ފުރުސަތެއް ދޭން ގާނޫނު އިސްލާހު ކުރަނީ

ރިސޯޓުތައް ކުއްޔަށް ދޫކޮށްފައިވާ މުއްދަތު އިތުރުކުރަން ކުޑަ އަގެއް ދައްކައިގެން މުއްދަތު އިތުރުކުރެވޭ ގޮތް ހަދަން ޓޫރިޒަމާ ބެހޭ ގާނޫނަށް އިސްލާހު ގެނައުމަށް ސަރުކާރުގެ ފަރާތުން ރައްޔިތުންގެ މަޖިލީހަށް ބިލެއް ހުށަހަޅައިފި އެވެ.

ވީ ކިހިނެއް؟ - ސަރުކާރުގެ ފަރާތުން އިއްޔެ މަޖިލީހަށް އެ ބިލު ހުށަހެޅުއްވީ ދަނގެތި ދާއިރާގެ މެމްބަރު އަބްދުﷲ ރަޝީދު އެވެ.

ތަފްސީލު - ޓޫރިޒަމާ ބެހޭ ގާނޫނުގެ ނުވަ ވަނަ މާއްދާގެ (ކ)ގައި މިހާރު ބަޔާންކޮށްފައިވާ ގޮތުގައި، ރިސޯޓު ނުވަތަ އިންޓަގްރޭޓަޑް ރިސޯޓު ހަދަން ރަށް ނުވަތަ ބިން ކުއްޔަށް ދޫކޮށްފައިވާ ފަރާތުގެ ވަކި ޝަރުތުތަކެއް ފުރިހަމަވާ ނަމަ، އެ ތަނެއް ކުއްޔަށް ދީފައިވާ މުއްދަތު އިތުރު 49 އަހަރަށް އިތުރުކޮށްދެވެ އެވެ.

އެ މާއްދާގެ (ކ)ގެ އެއް ނަންބަރުގައި ބަޔާންކޮށްފައިވާ ޝަރުތަކީ ރަށް ނުވަތަ ބިން ކުއްޔަށް ހިފާފައިވާ ފަރާތުން ސަރުކާރަށް ދައްކަން ޖެހޭ އެއްވެސް ކުއްޔެއް ނުވަތަ ޖޫރިމަނާއެއް ނުވަތަ ޓެކުހެއް ނުވަތަ ފީއެއްވާ ނަމަ، އެ ފައިސާ ދައްކައި ހަލާސްކޮށްފައިވުމެވެ. އޭގެ ތެރޭގައި އެއްބަސްވުމެއްގެ ދަށުން ޓޫރިޒަމާ ބެހޭ މިނިސްޓްރީން ފަސްކޮށްދީފައިވާ ކުއްޔާއި ޖޫރިމަނާއެއް ނުހިމެނެ އެވެ.

އޭގެ އިތުރުން، އެ ގާނޫނަށް ގެނައި 10 ވަނަ އިސްލާހަށް އަމަލުކުރަން ފެށި ތާރީހު ކަމަށްވާ 27 ޑިސެމްބަރު 2020 އިން ފެށިގެން ފުރަތަމަ ދެ އަހަރުގެ ތެރޭގައި މުއްދަތު އިތުރުކުރުމުގެ ފީއެއްގެ ގޮތުގައި 5 މިލިއަން ޑޮލަރު އެކީ އެއްފަހަރާ ދެއްކުން ލާޒިމުވާނެ އެވެ. އެ މުއްދަތަށް ފަހު، 99 އަހަރަށް މުއްދަތު އިތުރުކުރަން މިހާރު ހުށަހަޅާއިރު ފީއެއްގެ ގޮތުގައި 10 މިލިއަން ޑޮލަރު ދައްކަން ޖެހޭނެ ކަމަށް (ކ)ގެ ދެ ވަނަ ނަންބަރުގައި ބަޔާންކޮށްފައިވެ އެވެ.

ސަރުކާރުގެ ފަރާތުން މަޖިލީހަށް ހުށަހެޅި ބިލުގައި ޓޫރިޒަމާ ބެހޭ ގާނޫނުގެ ނުވަ ވަނަ މާއްދާގެ (ކ)ގެ ދެ ވަނަ ނަންބަރަށް އިސްލާހު ގެނައުމަށް ހުށަހަޅާފައިވާ ގޮތަކީ:

އެނގުން މުހިންމު - މިހާރު އަމަލުކުރަމުންދާ ގާނޫނުގައި 5 މިލިއަން ޑޮލަރުގެ ފީ ދައްކައިގެން ރިސޯޓު ކުއްޔަށް ދީފައިވާ މުއްދަތު އިތުރުކުރަން ލިބޭ ފުރުސަތު އަންނަ ޑިސެމްބަރުގެ ނިޔަލަށް ހަމަވާނެ އެވެ.

އެހެންކަމުން، މި އިސްލާހު ފާސްވެއްޖެ ނަމަ، 10 މިލިއަން ޑޮލަރުގެ ބަދަލުގައި 5 މިލިއަން ޑޮލަރުގެ ކުޑަ ފީއެއް ދައްކައިގެން ރިސޯޓު ކުއްޔަށް ދީފައިވާ މުއްދަތު އިތުރުކުރަން އިތުރު ފުރުސަތެއް ލިބޭނެ އެވެ.