މޯލްޑިވިއަން އިން މާލެ އާއި ސްރީ ލަންކާއާ ދެމެދު ދަތުރުތައް ފަށަން މިއަދު ވީއައިއޭގައި ބޭއްވި ރަސްމިއްޔާތު
މޯލްޑިވިއަނުން މާލެ-ލަންކާ ދަތުރުތައް ފަށައިފި
ގައުމީ އެއާލައިން މޯލްޑިވިއަންއިން މާލެ އާއި ސްރީ ލަންކާގެ ކޮލަމްބޯއާ ދެމެދު ސީދާ ދަތުރުތައް މިއަދު ފަށައިފި އެވެ.
ވީ ކިހިނެއް؟ - އައިލެންޑް އޭވިއޭޝަނުން ބުނީ ކޮންމެ ހަފްތާއެއްގެ ބުރާސްފަތި އަދި ހޮނިހިރު ދުވަހު މޯލްޑިވިއަން އިން ވެލާނާ އިންޓަނޭޝަނަލް އެއާޕޯޓާއި ލަންކާގެ ބަންޑާރަނައިކަ އިންޓަނޭޝަނަލް އެއާޕޯޓާ ދެމެދު ދަތުރުތައް ކުރާނެ ކަމަށެވެ.
އެނގުން މުހިއްމު - މީގެ ކުރިން ވެސް އެ އެއާލައިނުން ވަނީ ސްރީ ލަންކާ އާއި މާލެއާ ދެމެދު ސީދާ ދަތުރުތައް ބާއްވައިފަ އެވެ. މީގެ އިތުރުން އައްޑޫ ގަން އިންޓަނޭޝަނަލް އެއާޕޯޓުން ވެސް ލަންކާއަށް ދަތުރުތައް ބޭއްވި އެވެ.
ތަފްސީލް - މޯލްޑިވިއަންގެ އޮޕަރޭޝަންތައް ފުޅާކުރުމުގެ މަސައްކަތުގެ ދަށުން ފެށި މި ދަތުރުތަކާ އެކު ހަފްތާ ބަންދާ ދިމާކޮށް ލަންކާއަށް ދާ މީހުންނަށް ފަސޭހަ ވާނެ ކަމަށް އެ އެއާލައިނުން ބުންޏެވެ.
މި ދަތުރުތައް ފަށަން މޯލްޑިވިއަން އިން އަންނަނީ މާލެ-ލަންކާ ދެކޮޅު ޓިކެޓު 165 ޑޮލަރަށް ލިބޭ ހާއްސަ ފެއާއެއް ވެސް ކުރިއަށް ގެންދަމުންނެވެ.
މޯލްޑިވިއަންގެ މެނޭޖިން ޑިރެކްޓަރު އަބްދުﷲ ސައީދު ވިދާޅުވީ އެ އެއާލައިނުން ލަންކާ ދަތުރުތައް ފެށީ ވަރަށް ރަނގަޅަށް އެ ރޫޓް ދިރާސާކުރުމަށް ފަހު ކަމަށެވެ. އެގޮތުން:
-
ދަތުރުތައް ކުރާނީ މޯލްޑިވިއަންގެ އޭ320ގައި
-
މި ދަތުރުތައް ފެށީ ލަންކާގެ ނަވަލޯކާ ހޮސްޕިޓަލާ ވެސް ގުޅިގެން
-
މޯލްޑިވިއަންގައި ލަންކާއަށް ދާ ދަތުރުވެރިންނަށް އެ ހޮސްޕިޓަލުން %15 ޑިސްކައުންޓު ލިބޭނެ
ފާހަގަކުރެވޭ - މޯލްޑިވިއަން އިން އަންނަނީ އެ އެއާލައިނުން ރާއްޖެއިން ބޭރަށް ކުރާ ދަތުރުތައް އިތުރުކުރަމުންނެވެ. އެގޮތުން ދިގު ދަތުރުތައް ކުރަން ބޭނުންވާ ބޯޓުތައް ހޯދަން ވެސް ވަނީ އިއުލާންކޮށްފަ އެވެ.
ކޮމެންޓް (1)
ޑަތުރު