ސިޔާމްގެ ރިސޯޓެއް ހަދަން ސަރުކާރުގެ ސޮވެރިން ގެރެންޓީ އަށް އެދެފި

ވިޔަފާރިވެރިޔާ އަހުމަދު ސިޔާމް މުހައްމަދު މާލެ އަތޮޅުގައި ތަރައްގީ ކުރާ ރިސޯޓެއްގެ މަސައްކަތް ކުރުމަށް ބޭނުންވާ ލޯނު ހޯދަން ސަރުކާރުގެ ސޮވެރިން ގެރެންޓީއަކަށް އެދިއްޖެ އެވެ.

ވީ ކިހިނެއް؟ - ޓޫރިޒަމަށް ތަރައްގީ ކުރުމަށް ކ. އަތޮޅު އެމެރަލްޑް ލެގޫން އިން އެމެރަލްޑް ރިސޯޓްސް ޕްރައިވެޓް ލިމިޓެޑް ކިޔާ ކުންފުންޏަކަށް ދޫކޮށްފައިވާ ސަރަހައްދުގައި ރިސޯޓު ތަރައްގީ ކުރުމަށް ބޭނުންވާ ފައިނޭންސިން ހޯދުމަށް ސަރުކާރުގެ ސޮވެރިން ގެރެންޓީއަށް އެ ކުންފުނީގެ ޗެއާމަން އަދި މެނޭޖިން ޑިރެކްޓަރު ސިޔާމް ސޮޮއިކުރައްވާ ރައީސް މުހައްމަދު މުއިއްޒަށް މި މަހުގެ 7 ވަނަ ދުވަހު ވަނީ ސިޓީއެއް ފޮނުވައިފަ އެވެ.

އެ ސިޓީގެ ކޮޕީއެއް ދައުރުއަށް ވަނީ ލިބިފަ އެވެ.

ތަފްސީލް - ސިޔާމްގެ އެ ސިޓީގައި ވިދާޅުވެފައި ވަނީ އެމަރަލްޑް ލެގޫންގައި ރިސޯޓު ތަރައްގީ ކުރުމުގެ މަސައްކަތަށް ފައިނޭންސް ހޯދުމުގެ މަސައްކަތް ކުރާތާ އަހަރުތަކެއް ވެއްޖެ ކަމަށާއި 1500 އަށް ވުރެ ގިނަ ކޮޓަރި ހިމެނޭ އެ ޕްރޮޖެކްޓަށް 165 މިލިއަން ޑޮލަރު (ދެ ބިލިއަން ރުފިޔާ) ބޭނުންވާ ކަމަށެވެ.

ސަރުކާރުގެ ސޮވެރިން ގެރެންޓީ އަމިއްލަ ފަރާތްތަކަށް ދެވޭ އުސޫލެއް އާންމުކޮށްފައިވާއިރު އެ އުސޫލުގެ ދަށުން %4 އަށް ވުރެ ދަށް އިންޓްރެސްޓުގައި ނަގާ ލޯނުތަކަށް ސަރުުކާރުގެ ސޮވެރިން ގެރެންޓީ ދެވޭ ގޮތް އޮންނަކަން ފާހަގަކޮށް ސިޔާމްގެ ސިޓީގައި ވިދާޅުވެފައިވަނީ:

އެ ސިޓީގައި ފާހަގަކޮށްފައިވާ ގޮތުން 2018 ވަނަ އަހަރު އެ މަޝްރޫއު ހިންގަން ބޭނުންވާ ފައިސާ ހޯދުމަށް ސޮވެރިން ގެރެންޓީ ދިނުމަށް އޭރުގެ ސަރުކާރުން ވަނީ ވިސްނައިފަ އެވެ. އަދި އެކަން ބަޔާންކޮށް ޖެނުއަރީ 2018ގައި އޭރުގެ ސަރުކާރުން އެ ކުންފުންޏަށް ފޮނުވި ސިޓީއެއް ވެސް ވަނީ އެއްކަރުދާސް ކޮށްފަ އެވެ.

ފިނޭންސްގެ ބަސް - މި ސިޓީއާ ގުޅޭ ގޮތުން ސުވާލު ކުރުމުން ފިނޭންސް މިނިސްޓަރު ޑރ. މުހައްމަދު ޝަފީގު މިއަދު 'ދައުރު' އަށް ވިދާޅުވީ ސޮވެރިން ގެރެންޓީ ދޫކުރުމަށް މިހާރު އެކުލަވާލާފައިވާ އުސޫލުގެ ދަށުން އަމިއްލަ މީހުންނަށް އެ ކަމަށް އެދެވޭނެ ކަމަށާއި ނަމަވެސް ސަރުކާރުން ގެރެންޓީ ދޭނީ ފުރިހަމަވާން ޖެހޭ ޝަރުތުތައް ފުރިހަމަވާ ފަރާތްތަކަށް ކަމަށެވެ.

"އަދި ޕްރޮޕޯސަލްއެއް ނުލިބޭ މި އުސޫލުގެ ދަށުން ސޮވެރިން ގެރެންޓީ ހޯދުމަށް އެދި،" އޭނާ ވިދާޅުވި އެވެ.

ފާހަގަ ކުރެވޭ - ސިޔާމްގެ ސަން ސިޔާމު ކުންފުނިން ނ. ދިގުރަށުގައި 'ސިޔާމް ވޯލްޑު' ގެ ނަމުގައި ތަރައްގީކޮށް ހިންގާ ރިސޯޓު ހެދުމަށް ޗައިނާގެ އެގްޒިމް ބޭންކުން ނެގި 127 މިލިއަން ޑޮލަރުގެ ލޯނަށް 2017 ވަނަ އަހަރު ސަރުކާރުން ސޮވެރިން ގެރެންޓީ ދިނެވެ.

އެ ލޯނަށް ފައިސާ ދެއްކުމަށް ކޮވިޑް-19ގެ ދުވަސްވަރު ދަތިތައް ކުރިމަތިވި ނަމަވެސް މިހާރު އެ ލޯނަށް ސިޔާމް ވަނީ ފައިސާ ދައްކަވައިފަ އެވެ.