ހުޅުމާލޭގައި ދަމާސް ރިއަލް އެސްޓޭޓުން އިމާރާތްކުރާ ރާއްޖޭގެ ފުރަތަމަ ޕާކިންއަށް ހާއްސަ އިމާރާތް، 'ވަން ޕާކް' ހުންނާނެ ގޮތުގެ ކުރެހުމެއް.
ރާއްޖޭގެ ފުރަތަމަ ޕާކިން އިމާރާތުން ޖާގައަށް އެދެން ހުޅުވާލައިފި
ރާއްޖޭގެ ފުރަތަމަ ޕާކޭޑު (ޕާކިން އިމާރާތް) ކަމަށްވާ ދަމާސް ރިއަލް އެސްޓޭޓުގެ 'ވަން ޕާކް' ހުންނާނެ ގޮތް ދައްކާލައި ހާއްސަ އޮފާތަކާ އެކު އެ ތަނުން ޕާކިން ޖާގަ ބުކްކުރުމުގެ ފުރުސަތު އިއްޔެ ހުޅުވާލައިފި އެވެ.
ވީ ކިހިނެއް؟ - ޒަމާނީ ސެކިއުރިޓީ ފީޗާތަކާއި ވިޔަފާރިތަކަށް ހާއްސަ ޖާގަތަކާ އެކު ރާއްޖޭގެ ފުރަތަމަ ޕާކޭޑު މަޝްރޫއު އިފްތިތާހުކޮށްދެއްވީ، އިއްޔެ ހ. މީރުމާގައި ބޭއްވި ރަސްމިއްޔާތެއްގައި ޕްލޭނިންގެ ސްޓޭޓް މިނިސްޓަރު އަކުރަމް ކަމާލުއްދީން އެވެ.
މި މަޝްރޫއުގެ މަގްސަދަކީ ހުޅުމާލޭގައި އެއްގަމު އުޅަނދު ޕާކުކުރަން ހުރި ޖާގައިގެ ދަތިކަން ހައްލުކުރުމެވެ.
ތަފްސީލު - ދަމާސް އިން ބުނީ ވަން ޕާކުގެ ޕާކިން ޖާގަ ގަތުމުން އެއްގަމު އުޅަނދު ރަޖިސްޓްރީކުރުން ނުވަތަ ދިގު މުއްދަތަކަށް ކުއްޔަށް ނެގުމުގެ އިހުތިޔާރު ލިބޭނެ ކަމަށެވެ. އަދި ވިޔަފާރިވެރިންނަށް ޖާގަ އާއި ފުޑްކޯޓުން ޖާގަ ކުއްޔަށް ހިފުމުގެ ފުރުސަތު ހުޅުވާލާނެ ކަމަށް ވެސް އެ ތަނުން ބުންޏެވެ.
ވަން ޕާކްގެ ވެބްސައިޓުގައި މިވަގުތު ބުކްކުރުމުގެ ފުރުސަތު ހުޅުވާލާފައިވަނީ ޕާކިން ސްލޮޓުތަކަށެވެ. މިހާރު ހުޅުވާލާފައިވާ 'އާލީ ބާޑް އޮފާ'ގެ ދަށުން ޕާކިން ޖާގަ ގަންނަ ފަރާތްތަކަށް ޖުމްލަ އަގުން %5ގެ ޑިސްކައުންޓެއް ނުވަތަ އިމާރާތް އަޅައި ނިމެންދެން އެހެން ޕާކިން ޖާގައެއް ވަގުތުން ހޯދުމުގެ ފުރުސަތު ވަނީ ހުޅުވާލާފަ އެވެ.
ވަން ޕާކް
މި މަޝްރޫއު އިފްތިތާހުކުރަން ބޭއްވި ރަސްމިއްޔާތުގައި، ހަތް ފަންގިފިލާގެ ވަން ޕާކު ހުންނާނެ ގޮތް ވަނީ ދައްކާލާފަ އެވެ. އެގޮތުން، އެ އިމާރާތުގައި:
-
ވިޔަފާރީގެ ބޭނުންތަކަށް ދެ ފަންގިފިލާ
-
ޕާކިންއަށް ފަސް ފަންގިފިލާ
-
500އަށް ވުރެ ގިނަ ޕާކިން ޖާގަ
-
ދިގު މުއްދަތަށް (30 އަހަރާ ހަމައަށް) ޕާކިން ޖާގަ ކުއްޔަށް ނެގޭނެ
-
އިލެކްޓްރިކް ވެހިކަލް ޗާޖުކުރެވޭނެ ގޮތް ހުންނާނެ
-
ޕްރިމިއަމް ޕާކިންއަށް ހާއްސަ ގަރާޖުތަކެއް ހުންނާނެ
-
މުޅި އިމާރާތް ވެސް ފަރުމާކޮށްފައިވަނީ ހާއްސަ އެހީއަށް ބޭނުންވާ މީހުންނާ ރަހުމަތްތެރިކޮށް؛ ލިފްޓު، އެސްކަލޭޓަރު އަދި ރޭމްޕުތައް ހުންނާނެ
ހާއްސަ ހިދުމަތްތަކުގެ ގޮތުގައި ހިމެނެނީ:
-
24 ގަޑިއިރު ސެކިއުރިޓީ ބަލަހައްޓާނެ
-
ވެލޭ ޕާކިން
-
އެއްގަމު އުޅަނދު މަރާމާތުކޮށްދިނުމުގެ ހިދުމަތް
ދަމާސް އިން ބުނީ ޕާކިން މައްސަލައަށް ހައްލެއް ހޯދުމުގެ އިތުރަށް އެ ޕާކޭޑުން އެކްސްލޫސިވް ބްރޭންޑުތަކަށް ފުރުސަތު ދޭނެ ކަމަށެވެ. ޕާކޭޑުގެ ޓެރަހުގައި ހުންނާނީ އެކި ގައުމުތަކުގެ ރަހަތަކަށް އިންސާފުކޮށްލެވޭ ފަދަ ފުޑްކޯޓެކެވެ.
އެނގުން މުހިންމު - އެ މަޝްރޫއުގެ އެއްބަސްވުމުގައި އެޗުޑީސީ އާއި ދަމާސްއާ ދެމެދު ސޮއިކުރީ މިދިޔަ އޮކްޓޯބަރު 10ގަ އެވެ. މަޝްރޫއު ނިންމަން ދީފައިވަނީ ދެ އަހަރެވެ.
ކޮމެންޓް (2)
ހިތަޑު 2
ހަސަނު