އިގްތިސާދީ ތަސައްވަރު ބަނަޔަސް ފިޗުން ރާއްޖޭގެ ރޭޓިން ދަމަހައްޓައިފި

ރާއްޖޭގެ އިގްތިސާދީ ހާލަތު ވަޒަންކުރުމަށް ފަހު ރޭޓިން ދޭ ދުނިޔޭގެ ދެ ރޭޓިން އެޖެންސީގެ ތެރެއިން ފިޗުން ރާއްޖެއަށް ދީފައިވާ 'ބީ މައިނަސް' ރޭޓިން މިއަދު ދަމަހައްޓައިފި އެވެ. ނަމަވެސް، ދުނިޔޭގެ ބާޒާރުގައި ތަކެތީގެ އަގުތައް އުފުލެމުން ދިއުމާ ގުޅިގެން ރާއްޖޭގެ ރިޒާވްއަށް ކުރަމުންދާ ނޭދެވޭ އަސަރުތަކުގެ ސަބަބުން ރާއްޖޭގެ އިގްތިސާދީ ހާލަތު ކުރިއަށް ލަފާ ކުރާ ގޮތް ނުވަތަ އައުޓްލުކް އެ އެޖެންސީން ވަނީ ދަށްކޮށްފަ އެވެ.

ވީ ކިހިނެއް؟ - ރާއްޖެއަށް ރޭޓިން ދެނީ ދުނިޔޭގެ އެންމެ ބޮޑެތި ރޭޓިން އެޖެންސީތަކުގެ ތެރޭގައި ހިމެނޭ ފިޗުގެ އިތުރުން މޫޑީޒް އިންނެވެ. އެ ދެ އެޖެންސީން އަހަރަކު އެއް ފަހަރު ރޭޓިން މުރާޖައާކުރާއިރު، ފިޗުން ވަނީ ކުރިއަށް އޮތް އަހަރަށް ރާއްޖެއަށް ދޭ ރޭޓިން މިއަދު އާންމުކޮށްފަ އެވެ.

ފިޗުން މިދިޔަ އަހަރު ރާއްޖެއަށް ދިން 'ބީ މައިނަސް' ރޭޓިން ދަމަހައްޓާފައި ވިޔަސް، ރާއްޖޭގެ އިގްތިސާދީ ތަސައްވަރު 'ސްޓޭބަލް' ނުވަތަ ރަނގަޅު ފައްތަރަކުން 'ނެގެޓިވް' ނުވަތަ ބޮޑެތި ގޮންޖެހުންތަކެއް ހުރި މިންގަނޑަށް ވަނީ ދަށްކޮށްފަ އެވެ.

ތަފްސީލް - ރާއްޖޭގެ ރޭޓިން ދެމެހެއްޓި މައިގަނޑު ސަބަބަކީ، ރާއްޖޭގެ ޓޫރިޒަމް ވަރަށް ބާރު މިނުގައި ކުރިއަރަމުން ދިއުމާ ގުޅިގެން މި އަހަރު ރާއްޖޭގެ އިގްތިސާދީ ކުރިއެރުން %9.5ގައި އަދި އަންނަ އަހަރު %7.5ގައި ހުންނާނެ ކަމަށް ލަފާކުރެވޭތީ އެވެ.

"ދެމެހެއްޓެނިވި ގޮތެއްގައި އިގްތިސާދު ކުރިއެރުމަށް ހުރި ބޮޑެތި ގޮންޖެހުންތަކުގެ ތެރޭގައި ދުނިޔޭގެ ދުވެލި މަޑުޖެހި، އިންފްލޭޝަން މަތިވެ އަދި ހަކަތައިގެ އަގުތައް އުފުލުން ހިމެނޭއިރު، ދަތުރުފަތުރުކުރުމުގައި ޗައިނާ އިން އަޅާފައިވާ ފިޔަވަޅުތަކަށް ލުއިތައް ލިބުމަކީ ހެޔޮ ފާލެއް ކަމަށް ދެކެން،" ފިޗުން ބުނެފައިވެ އެވެ.

"ވެލާނާ އިންޓަނޭޝަނަލް އެއާޕޯޓުގެ އާ ރަންވޭ ހުޅުވުމާއި 2024 ވަނަ އަހަރުގެ ނިޔަލަށް ބޭނުންކުރަން ފެށުމަށް ހަމަޖެހިފައިވާ އާ ޓާމިނަލްގެ މަސައްކަތާއި ރިސޯޓް އަދި ހޮޓާތައް ތަރައްގީކުރުން ފަދަ ފަތުރުވެރިކަމުގެ ވަސީލަތްތައް ތަރައްގީކުރުމަކީ ރާއްޖެއަށް އަންނަ ފަތުރުވެރިންނަށް ހިދުމަތް ދިނުމުގެ ގާބިލުކަން އިތުރުކުރުމަށް ކޮންމެހެން މުހިންމު ކަންކަން."

ނަމަވެސް، ރާއްޖޭގެ އިގްތިސާދަށް ހުރި ބޮޑެތި ގޮންޖެހުންތައް ފިޗުން ވަނީ ފާހަގަކޮށްފަ އެވެ.

އެންމެ ބޮޑު ކަންބޮޑުވުމެއްގެ ގޮތުގައި ފިޗުން ފާހަގަކުރީ ރާއްޖޭގެ ބޭރު ފައިސާގެ ރިޒާވް ވަރަށް ބޮޑަށް ދަށަށް ދިއުމެވެ. އެގޮތުން، މިދިޔަ މަހުގެ ނިޔަލަށް ހޭދަވި އަހަރެއްހާ ދުވަހުގެ ތެރޭގައި ރާއްޖޭގެ ރަސްމީ ރިޒާވް ވަނީ، ފިޗުން ބުނި ގޮތުގައި، 1 ބިލިއަން ޑޮލަރުން 540 މިލިއަން ޑޮލަރަށް ވެއްޓިފަ އެވެ. 

ރިޒާވް ދަށަށް ދިއުމުގެ ސަބަބުތަކުގެ ތެރޭގައި ފިޗުން ފާހަގަކުރި ކަންކަމަކީ:

ފިޗުން ބުނި ގޮތުގައި، ރާއްޖޭގެ ރިޒާވް ކުރިއަށް އޮތް ތަނުގައި ވެސް ދަށް މިންވަރެއްގައި ހުންނާނެ ކަމަށް އަންދާޒާކުރެވޭ އިރު، ދަރަނި ބޮޑުވުމުގެ ކަންބޮޑުވުން އެބައޮތެވެ. އެގޮތުން، ފިޗުން ބުނި ގޮތުގައި:

ގުޅުން ހުރި ކަމެއް - ކޮވިޑްގެ ބަލިމަޑުކަމަށް ފަހު، ރާއްޖޭގެ ފަތުރުވެރިކަމުގެ ސިނާއަތް ވަރަށް ބާރަށް އިއާދަވަމުންދާ ކަމަށާއި އިގްތިސާދީ ކުރިއެރުން ހަލުވި ނަމަވެސް، ދަރަންޏާއި މާލީ ގޮންޖެހުންތައް ބޮޑު ކަމަށް ވޯލްޑް ބޭންކުން ވެސް މިދިޔަ ހަފްތާގައި ވަނީ ބުނެފަ އެވެ.