މުހައްމަދު އިބްރާހިމް (ކުޑޫ) އެމްޑީޕީގެ ފަރާތުން ގަލޮޅު އުތުރު ދާއިރާއަށް ވާދަކުރައްވާއިރު މިއީ އޭނާ ދަންނަ ވަރަށް ގިނަ ބަޔަކަށް ހައިރާން ކަމެއް ވެސް މެ

މިދިއަ އަހަރުގެ ޖުލައި މަހުގެ ދުވަހެއްގައި އޭނާގެ ފޭސްބުކްގައި ލިއުއްވި ޕޯސްޓަށް އެކަނި ބަލައިލިޔަސް އެކަހަލަ ފިޔަވަޅެއް އަޅުއްވާފާނެތޯ ސުވާލު އުފެދެ އެވެ. އޭނާ ލިއުއްވި އެވެ؛

"ރައްޔިތުންގެ މަޖިލީހުގެ ޖަލްސާއެއް ލައިވްކޮށް ފެނުމުގެ 'ބަދުނަސީބު' މިއަދު ލިބުނެވެ. 'ސޮލަވާތް ފާތިހާ'އާ އެކު ރިޔާސަތުގައި އިންނެވި ބޭފުޅާ ވިދާޅުވީ ދެތިން ޖުމްލައެކެވެ. މަޖިލިސް ނިމުނީ އެވެ. ހަމަގައިމު ވެސް ތިން މިނިޓަށް ވުރެ ދިގެއް ނުވާނެ އެވެ. އެންމެ [ބޮޑު] މުސާރަ އާއި އިނާޔަތްތައް އާއިލާއަށް ދެމިގެންދާ 'ބޮޑެތި' ބޭފުޅުންނެވެ. މެންބަރުކަން އެއް ފަހަރު ކުރެއްވިޔަސް ދުނިޔެ އުމުރަށް ފައިސާ ލިބޭނެ ގޮތް ހަމަޖެހިފައިވާ ފަރާތްތަކެވެ. ކުރާނެ ކަމެއް ނެތެވެ. މަ ވެސް ވޯޓު ލީމެވެ. މި ބޭފުޅުން ހޮވީ ހަމަ އަހަރެމެންނެވެ. ކޮންމެ ފަސް އަހަރަކުން މި ހިނގާ ހުރިހާ ކަމެއްގެ ޒިންމާ ނަގަން ޖެހޭނީ ވެސް ހަމަ އަހަރެމެންނެވެ. މަ ވެސް އޭގައި ނުހިމެނޭނެ ހަމަ އެއްގޮތެއް ވެސް ނެތެވެ."

މި ދައްކަނީ މުހައްމަދު އިބްރާހިމްގެ ވާހަކަ އެވެ. ކޮން މުހައްމަދު އިބްރާހިމެއް ހެއްޔެވެ؟ މަޝްހޫރު ކުޑޫ އެވެ. ވަރަށް ގިނަ މީހުންނަށް އޭނާ އެނގޭނެ އެވެ. ދަންނާނެ އެވެ. ރައްޓެހިވާނެ އެވެ. ހިނިތުންވުން ނޫން ސިފައެއް، ގިނަ ފަހަރަށް، މޫނުމަތިން ނުދައްކާނެ އެވެ. ހިތްހެޔޮކަމާ އެކު ކޮންމެ މީހަކާ މުހާތަބުކުރައްވާނެ އެވެ. ބައެއް ފަހަރަށް ހުސްވުމެއް ވެސް ނެތް ވާހަކަތަކެވެ.