ގދ. ނަޑެއްލާ: އެ ބޯޓުގައި ތިބި މީހުން ވަނީ ނަޑެއްލާއަށް ގެންގޮސްފައި. (ފޮޓޯ/ގޫގުލް މެޕްސް)
ނަޑެއްލާ ކައިރިން ދަތުރުކުރި ބޯޓެއް ފަރަށް އަރައިފި
ގދ. ނަޑެއްލާ ކައިރިން ދަތުރުކުރި ބޯޓެއް، 10 މީހުންނާ އެކު އިއްޔެ ފަރަށް އަރައިފި އެވެ.
ވީ ކިހިނެއް؟ - ނަޑެއްލާ ކައިރިން ބޯޓެއް ފަރަށް އަރައިގެން އުޅޭކަމުގެ މައުލޫމާތު ފުލުހުންނަށް ލިބުނީ، ފުލުހުން ބުނި ގޮތުގައި، ރޭ 6:21 ހާއިރެވެ.
ތަފްސީލް - ފުލުހުން މިއަދު މީޑިއާތަކަށް ފޮނުވި މެސެއްގައި ބުނީ:
-
އެ ބޯޓުގައި ތިބީ ޕާކިސްތާނަށް ނިސްބަތްވާ 10 މީހުން
-
އެ މީހުންގެ ހާލު ރަނގަޅު
-
އެ ބޯޓުގައި ތިބި މީހުން ވަނީ ނަޑެއްލާއަށް ގެންގޮސްފައި
"ބޯޓު ފަރަށް އަރާފައި އޮތް ސަރަހައްދުގައި ފުލުހުންނާއި އެމްއެންޑީއެފުން ދަނީ ހަރަކާތްތެރިވަމުން،" ފުލުހުން ބުންޏެވެ.
ބޯޓު ފަރަށް އެރީ ކީއްވެގެން ކަމެއް އަދި ނޭނގެ އެވެ. އަދި އެކަމުގެ އިތުރު ތަފްސީލެއް އެމްއެންޑީއެފުން ވެސް އަދި ފުލުހުން ވެސް ހާމަކޮށްފައެއް ނުވެ އެވެ.
އެނގުން މުހިންމު - ކަނޑު އުޅަނދުތައް ރާއްޖޭގެ ފަރުތަކަށް އަރައި ބޮޑެތި ގެއްލުންތަކެއް މީގެ ކުރިން ވެސް ލިބިފައި އެބަ ހުއްޓެވެ. އޭގެ ތެރެއިން ބައެއް ހާދިސާތައް ސާވޭ ކުރުމަށް ފަހު ހިސާބުކޮށް، އީޕީއޭ އިން އެ އުޅަނދުތަކުގެ ވެރިފަރާތްތައް ޖޫރިމަނާކޮށްފައިވެ އެވެ. އޭގެ ތެރޭގައި، ޖޫރިމަނާ ކުރެވެން އޮންނަ އެންމެ ބޮޑު އަދަދު ކަމަށްވާ 100 މިލިއަން ރުފިޔާގެ ޖޫރިމަނާ ވެސް ހިމެނެ އެވެ.