އޭސީސީއަށް އަލަން އައްޔަންކުރި ފަސް މެމްބަރުން މަގާމުގެ ހުވާކުރައްވަނީ: އެމްއެމްޕީއާރުސީ ހިޔާނާތުގެ މައްސަލަ މިހާރު ބަލަނީ އޭސީސީން. (ފޮޓޯ/ ރައީސް އޮފީސް)
އެމްއެމްޕީއާރުސީ ހިޔާނާތުގެ 5 މައްސަލައެއްގައި ދައުވާ ކުރަން ޕީޖީ އޮފީހާ މަޝްވަރާ ކުރަނީ
އެމްއެމްޕީއާރުސީގެ ބޮޑު ހިޔާނާތާ ގުޅުން ހުރި ފަސް މައްސަލައެއްގައި ދައުވާ ކޮށްދިނުމަށް އެދި ޕްރޮސިކިއުޓަ ޖެނެރަލް (ޕީޖީ)ގެ އޮފީހަށް ހުށަހެޅުމަށް، އެ އޮފީހާ އެކު މަޝްވަރާތައް ފަށާފައިވާ ކަމަށް އެންޓި-ކޮރަޕްޝަން ކޮމިޝަން (އޭސީސީ) އިން މިއަދު ބުނެފި އެވެ.
ބުނީ ކީކޭ؟ - އޭސީސީން މިއަދު މީޑިއާތަކަށް ފޮނުވި މެސެޖެއްގައިވާ ގޮތުން، ދައުވާ ކޮށްދިނުމަށް އެދިފައިވާ ފަރާތްތަކުގެ ތެރޭގައި އަމިއްލަ ފަރުދުންނާއި ކުންފުނިތައް ވެސް ހިމެނެ އެވެ. ނަމަވެސް، އެ ފަރާތްތަކަކީ ކޮބައިކަން އޭސީސީން މިހާތަނަށް ހާމަކޮށްފައެއް ނުވެ އެވެ.
ޕީޖީ އޮފީހާ އެކު ކުރެވޭ މަޝްވަރާތަކަށް ފަހު މި މައްސަލަތަކާ ގުޅޭ އިތުރު ތަފްސީލު ހާމަކުރަމުން ގެންދާނެ ކަމަށް އޭސީސީން ބުންޏެވެ.
އެނގުން މުހިއްމު - ކުރީގެ ރައީސް އަބްދުﷲ ޔާމީންގެ ސަރުކާރުގައި ހިންގި މި ހިޔާނާތުގެ ތެރެއިން 30 ރަށަކާއި ފަޅެއް ދޫކުރި ކަމަށް ބެލެވޭ އިރު، އެ ތަންތަނުން ދައުލަތަށް ލިބެން ޖެހޭ 1.5 ބިލިއަން ރުފިޔާ ލިބިފައި ނުވާކަން ހާމަވެފައިވެ އެވެ.
މި ސަރުކާރު ވެރިކަމަށް އައީ އެމްއެމްޕީއާރުސީގެ ބޮޑު ވައްކަން ބަލައި ގެއްލުނު 3 ބިލިއަނަށް ވުރެ ގިނަ ރުފިޔާ ހޯދާނެ ކަމުގެ ވައުދާ އެކު އެވެ. އެ ވައުދު ފުއްދުމަށް މި ސަރުކާރުގެ ވެރިކަމުގެ ފުރަތަމަ ދުވަހު އެސެޓް ރިކަވަރީ ކޮމިޝަންގެ ނަމުގައި ވަކި ހާއްސަ ކޮމިޝަނެއް ވެސް އުފެއްދި އެވެ.
ނަމަވެސް، ތިން އަހަރެއްހާ ދުވަސް ފަހުން، އެތައް ހަރަދުތަކެއް ކުރުމަށް ފަހު، ނަތީޖާއެއް ނުނެރެވުނު އެ ކޮމިޝަން މިދިޔަ މާޗު މަހު ވަނީ އުވާލާފަ އެވެ. މި ސަރުކާރަށް ހަތަރު އަހަރު ވާން ކައިރި ވެފައި ވާއިރު، އެ ހިޔާނާތުން އެއްވެސް ފައިސާއެއް އަދި ނުހޯދެ އެވެ.
މި ހިޔާނާތުގެ މައްސަލަ މިހާރު ބަލަމުން އަންނަނީ، މިދިޔަ މާޗު މަހު އާ މެންބަރުން އައްޔަން ކުރި އޭސީސީންނެވެ.