މާލޭގައި ފުލުހަކު ހަރަކާތްތެރިވަނީ: ގދ. އަތޮޅުގައި ފުލުހުންގެ ބެލުމުގެ ދަށުގައި ހުއްޓާ މަރުވެފައިވަނީ 43 އަހަރުގެ ފިރިހެނެއް (ދައުރު ފައިލް ފޮޓޯ/އަބްދުﷲ ޔަޝާއު)
ފުލުހުންގެ ބެލުމުގެ ދަށުގައި ހުރި މީހަކު މަރުވެއްޖެ
ގދ. އަތޮޅުގައި ފުލުހުންގެ ބެލުމުގެ ދަށަށް ގެންދިޔަ މީހަކު މަރުވެއްޖެ އެވެ.
ވީ ކިހިނެއް؟ - ފުލުހުން މީޑިއާތަކަށް ފޮނުވި މެސެއްގައި ބުނެފައިވަނީ ފުލުހުންގެ ބެލުމުގައި ދަށުގައި ހުރި 43 އަހަރުގެ ދިވެހި ފިރިހެނަކު މިއަދު މަރުވެފައިވާ ކަމަށެވެ. އޭނާގެ މެއަށް ތަދެއް އަރައި، ފިޓު ޖެހުމުގެ އަލާމާތްތަކެއް ފެނުމުން ގދ. މަޑަވެލީ ހެލްތު ސެންޓަރަށް ގެންދިޔަ ކަމަށް ފުލުހުން ބުންޏެވެ.
ބުނީ ކީކޭ؟ - "ފުލުހުންގެ ބެލުމުގެ ދަށުން އޭނާ ގެންގޮސްފައިވަނީ ކުއްޔަށް ހިފާފައިވާ ލޯންޗެއްގައި، އަދި އެ ލޯންޗުގައި އާއްމުން ވެސް ތިބިކަން ފާހަގަކޮށްކޮށްލަން،" ފުލުހުން ބުންޏެވެ.
އެކަމަކު، އޭނާ ހެލްތު ސެންޓަރަށް ގެންދިޔައިރު ވެސް މަރުވެފައިވާ ކަމަށް ޑޮކްޓަރުންނާ ހަވާލާދީ ފުލުހުން ބުނެފައިވެ އެވެ.
ފުލުހުން ބުނީ މަރުގެ ސަބަބުތައް ދެނެގަތުމަށްޓަކައި އޯޓޯޕްސީ ހެދުމަށް ނިންމާފައިވާ ކަމަށެވެ. އަދި އެ މައްސަލަ ނެޝަނަލް އިންޓަގްރިޓީ ކޮމިޝަނާއި ހިއުމަން ރައިޓްސް ކޮމިޝަނުގެ ސަމާކުކަމަށް ގެނެސް، ތަހުގީގުކުރަން އެދިފައިވާނެ ކަމަށް ވެސް ބުންޏެވެ.
މަސްތުވާތަކެތީގެ މައްސަލައެއްގައި އެ މީހާ ހައްޔަރުކުރީ، މަޑަވެއްޔާ ކޯޒްވޭއަކުން ގުޅާފައި އޮންނަ ހޯނޑެއްދޫއިން ކަމަށްވެ އެވެ. ނަމަވެސް ފުލުހުންގެ ފަރާތުން އަދި އެކަން ސާފެއް ނުވެ އެވެ.
"ފުލުހުން އޭނާ މަރާލީ ކަމަށް" ބުނެ ބަޔަކު ދަނީ މަޑަވެލީ ހެލްތު ސެންޓަރު ކައިރިއަށް އެއްވެ އަޑުގަދަކޮށް ނުރުހުން ފާޅުކުރަމުންނެވެ.