ތިލަމާލެ ބްރިޖުގެ ތަނބެއްގެ ކޮންކްރީޓް އަޅައި އަމަލީ މަސައްކަތް ފަށައިފި

މާލެ، ވިލިމާލެ، ތިލަފުށި އަދި ގުޅީފަޅު ގުޅާލާ ގްރޭޓާ މާލެ ބްރިޖު ޕްރޮޖެކްޓްގެ ދަށުން މާލެ އާއި ވިލިމާލެއާ ދެމެދު އަޅާ ބްރިޖުގެ އަމަލީ މަސައްކަތް މިއަދު ފަށައިފި އެވެ.

ވީ ކިހިނެއް؟ - ތިލަމާލެ ބްރިޖުގެ އަމަލީ މަސައްކަތް ފަށާފައި ވަނީ ރައީސް އިބްރާހީމް މުހައްމަދު ސޯލިހު އިންޑިއާއަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު މެންދުރު ބޭއްވި ރަސްމިއްޔާތެއްގަ އެވެ.

ތަފްސީލް - ބްރިޖުގެ އަމަލީ މަސައްކަތް ފެށުމަށް ރައީސް ސޯލިހާއި އިންޑިއާގެ ބޮޑުވަޒީރު ނަރެންދުރަ މޯދީ ބައިވެރިވެވަޑައިގެންނެވި ރަސްމިއްޔާތު ބާވާފައިވަނީ ވީޑިއޯ ކޮންފަރެންސް މެދުވެރިކޮށް އިންޑިއާގަ އާއި މާލޭ އިންޑަސްޓްރިއަލް ވިލެޖު ސަރަހައްދުގަ އެވެ. މި ރަސްމިއްޔާތުގެ އިންޑަސްޓްރިއަލް ވިލެޖު ސަރަހައްދުގައި ބޭއްވި ހަފްލާގައި ނައިބު ރައީސް ފައިސަލް ނަސީމާއި ދައުލަތުގެ ވަޒީރުންނާއި ސަރުކާރުގެ އިސްވެރިން ބައިވެރިވެވަޑައިގެންނެވި އިރު، ރައީސާއި މޯދީ ބައިވެރިވެވަޑައިގެންނެވީ ވާޗުއަލްކޮށެވެ.

މި ރަސްމިއްޔާތުގައި، ބްރިޖުގެ އަމަލީ މަސައްކަތް ފެށުމުގެ ގޮތުން، މިއަދު ވަނީ ރާއްޖޭގައި ބްރިޖުގެ ތަނބެއްގެ ކޮންކްރީޓު އަޅާފަ އެވެ.

ނަމަވެސް، މިކަމާ ގުޅޭ އިތުރު ތަފްސީލެއް އަދި ނުލިބެ އެވެ.

އެނގުން މުހިއްމު - ގްރޭޓާ މާލެ ކަނެކްޓިވިޓީ މަޝްރޫއާ ބެހޭ ގޮތުން އެންމެ ފުރަތަމަ މަޝްވަރާ ކުރީ މިދިޔަ ސެޕްޓެމްބަރު މަހު އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. އެސް ޖަޔަޝަންކަރު ރާއްޖެއަށް ކުރެއްވި ދަތުރުގަ އެވެ. މި މަޝްރޫއުގެ އެއްބަސްވުމުގައި އިންޑިއާގެ އެފްކޮންސް އިންފްރާސްޓްރަކްޗާ ލިމިޓެޑާއި ދިވެހި ސަރުކާރާ ދެމެދު މިދިޔަ އަހަރު އެއްބަސްވުމުގައި ސޮއިކޮށްފައި ވާއިރު، އެ މަސައްކަތް ދެ އަހަރު ދުވަހުގެ ތެރޭގައި ނިންމާލެވޭނެ ކަމަށް ބެލެވެ އެވެ.

މިހާރު އެފްކޮންސް އިން އަންނަނީ ބްރިޖު އަޅާ ސަރަހައްދުގެ ބިމުގެ ހާލަތު ދެނެގަތުމަށްޓަކާ ޖިއޯޓެކްނިކަލް ސާވޭގެ މަސައްކަތް ކުރަމުންނެވެ. އެ ސާވޭ އަންނަ އޮކްޓޯބަރު މަހުގެ ނިޔަލަށް ނިންމާލެވޭނެ ކަމަށް ބެލެވޭއިރު، އެފްކޮންސް އިން ވަނީ ތާވަލާ އެއްގޮތަށް އެއްބަސްވެފައިވާ ތާރީހަށް ބްރިޖު ނިންމާނެ ކަމުގެ ޔަގީންކަން ދީފަ އެވެ.