ހަމަލާގެ ތަހުގީގަށް ނަޝީދު ބަޔާން ދެއްވައިފި

މިދިޔަ މޭ 6ގައި ރައްޔިތުންގެ މަޖިލީހުގެ ރައީސް، މުހައްމަދު ނަޝީދަށް އަމާޒުކޮށް ދިން ބޮމުގެ ހަމަލާގެ ތަހުގީގަށް އެމަނިކުފާނު ބަޔާން ދެއްވައިފި އެވެ.

ފުލުހުންގެ ތަހުގީގަށް ނަޝީދުގެ ފަރާތުން ބަޔާނުގެ ޑްރާފްޓެއް ދިނީ މިއަދު އެވެ.

ވީ ކިހިނެއް؟ - ހަމަލާއާ ގުޅިގެން އެމަނިކުފާނުގެ ބަޔާން ނަގަން ފުލުހުން އެންމެ ފުރަތަމަ މަސައްކަތްކުރަން ފެށުމުން، ނަޝީދު ވިދާޅުވީ އެމަނިކުފާނުގެ "ބަހަކަށް ވެސް ބަޔާނަކަށް ވެސް ދައްކަން އޮތީ ޖާނާއި ހިތާއި މޭ" ކަމަށެވެ. ނަމަވެސް ފަހުން ވަނީ ފުލުހުންނަށް ބަޔާން ދެއްވަން ނިންމަވައިފަ އެވެ.

އޮކްޓޫބަރު 13 ގައި ރައްޔިތުންގެ މަޖިލީހުގެ އިދާރާގައި ނޫސްވެރިންނާ ބައްދަލުކުރައްވައި ނަޝީދު ވަނީ ވަރަށް އަވަހަށް ފުލުހުންނަށް ބަޔާން ދެއްވާނެ ކަމަށް ވިދާޅުވެފަ އެވެ.

ތަފްސީލް - މޫސުމަށް އަންނަ ބަދަލުތަކާ ގުޅޭ ބައިނަލްއަގުވާމީ ސަމިޓު، ކޮޕް26ގެ ތެރެއިން، 'ޑިމޮކްރެސީ ނައު'ގެ ނަމުގައި އެމެރިކާ އާއި ކެނެޑާގައި ގެނެސްދޭ ޓީވީ ޝޯއެއްގައި ބައިވެރިވެވަޑައިގެން މި މަހުގެ ފަސް ވަނަ ދުވަހު ނަޝީދު ވިދާޅުވީ އެމަނިކުފާނަށް އަމާޒުކޮށް ދިން ޓެރަރިސްޓް ހަމަލާގެ ފަހަތުގައި ތިބި މީހުން ހޯދުމަށް އަދިވެސް އެންމެ އެކަށީގެންވާ ގޮތެއްގައި ތަހުގީގެއް ނުހިންގޭ ކަމަށާއި އެހެންވެ އާންމު ދިރިއުޅުމެއް އުޅުއްވުމަށް ވަރަށް ދަތިވާ ކަމަށެވެ.

ބޮމުގެ ހަމަލާއާ ގުޅިގެން އަށް މީހެއްގެ މައްޗަށް ވަނީ ދައުވާ އުފުލައިފަ އެވެ. ބޮން ގޮއްވާލަން ރިމޯޓަށް ފިތާލި އަދުހަމް އަހުމަދު ރަޝީދު، ދައުލަތާ އެކު ހެދި އިއުތިރާފު އެއްބަސްވުމެއްގެ ދަށުން، ކުރިމިނަލް ކޯޓުގައި ދައުވާތަކަށް ވަނީ އިއުތިރާފުވެފަ އެވެ. ނަމަވެސް އޭނާގެ ޝަރީއަތުގެ އަޑުއެހުންތައް ވަނީ ސިއްރު ކޮށްފަ އެވެ.

އެނގުން މުހިންމު - މިދިޔަ މޭ މަހުގެ 6ގައި ދިން ޓެރަރިސްޓު ހަމަލާއަށް ފަހު، ބޭސްފަރުވާއަށް ރާއްޖޭން ބޭރުގައި ގާތްގަނޑަކަށް ފަސް މަސްދުވަހުގެ މުއްދަތަކަށް އުޅުއްވުމަށް ނަޝީދު ރާއްޖެ ވަޑައިގެންނެވީ މިދިޔަ މަހުގެ 11ގަ އެވެ. ނަމަވެސް، އެ މަނިކުފާނު އޭރު ވިދާޅުވެފައި ވަނީ، އަބަދަށް ރާއްޖޭގައި ހުރެވެން އަދި ނެތް ކަމަށެވެ.  

އިތުރަށް ކިޔާލަން -