ބަންގްލަދޭޝްގެ ޔޫއެސް-ބަންގްލާ އެއާލައިނުން ރާއްޖެ އާއި ބަންގްލަދޭޝްއާ ދެމެދު ސީދާ ދަތުރުތައް ފެށުމުގެ ގޮތުން އިއްޔެ ކުރި ފުރަތަމަ ދަތުރުގައި ބޯޓު ވީއައިއޭގައި ޖައްސަނީ. (ފޮޓޯ/ވީއައިއޭ)
ބަންގްލަދޭޝްގެ އެއާލައިނަކުން ފުރަތަމަ ފަހަރަށް ރާއްޖެއަށް ސީދާ ދަތުރުތައް ފަށަައިފި
ބަންގްލަދޭޝްގެ ޔޫއެސް-ބަންގްލާ އެއާލައިނުން ބަންގްލަދޭޝް އާއި ރާއްޖެއާ ދެމެދު ސީދާ ދަތުރުތައް ފަށައިފި އެވެ. މިއީ އެ ގައުމުގެ އެއާލައިނަކުން ރާއްޖެއަށް ޝެޑިއުލް ދަތުރުތައް ފެށި ފުރަތަމަ ފަހަރެވެ.
ވީ ކިހިނެއް؟ - މި ދަތުރުތައް އިއްޔެ ފެށިއިރު އެންމެ ފުރަތަމަ ނިންމާފައިވަނީ ހަފްތާއަކު ތިން ދަތުރު ބާއްވާށެވެ. އޭގެ ފަހުން ޑިމާންޑަށް ބަލައި ދުވާލަކު ދަތުރަކަށް ބަދަލުކުރާނެ އެވެ.
ބުނީ ކީކޭ؟ - ބަންގްލަދޭޝްގެ ޝާހްޖަލާލް އިންޓަނޭޝަނަލް އެއާޕޯޓުން ވީއައިއޭ އަށް ކުރާ އެ ދަތުރުތަކުގެ އަގު ހެޔޮވާނެ ކަމަށް ޔޫއެސް ބަންގްލާގެ މެނޭޖިން ޑިރެކްޓަރު އަބްދުﷲ އަލް-މާމަން ވިދާޅުވި އެވެ. އެގޮތުން، އެއްކޮޅު ޓިކެޓެއްގެ އަގަކީ 25،000 ޓާކާ ނުވަތަ 292 ޑޮލަރު ( ކަމަށް އޭނާ ވިދާޅުވި އެވެ.
"ބަންގްލަދޭޝްގެ ގިނަ އަދަދެއްގެ ރައްޔިތުން ރާއްޖޭގައި މަސައްކަތް ކުރަން އުޅޭ އިރު މި ދަތުރުތަކާ އެކު ގައުމަށް އެނބުރި ގޮސް އައުމުގައި ބޮޑެތި ލުއިފަސޭހަތަކެއް ލިބޭނެ،" އަބްދުﷲ އަލް-މާމަން ކުރިން މީޑިއާތަކަށް ވިދާޅުވެފައިވެ އެވެ.
މީގެ އިތުރުން ލިބޭނެ ފަސޭހަތަކުގެ ގޮތުގައި ޔޫއެސް-ބަންގްލާ އެއާލައިނުން ފާހަގަކޮށްފައިވަނީ:
-
ރާއްޖެއަށް ބޭސް ފޮނުވުމުގައި ބޮޑެތި ފަސޭހަތައް ލިބޭނެ
-
ބަންގްލަދޭޝްގެ ފާމަސޫޓިކަލް ކުންފުނިތަކުގެ ބޮޑު މާކެޓެއް ރާއްޖޭގައި އޮންނައިރު ޔޫއެސް-ބަންގްލާ މެދުވެރިކޮށް ރާއްޖެއަށް ބޭސް ފޮނުވުމާ ގުޅޭ ގޮތުން އެ ކުންފުނިތަކުން އަންނަނީ މަޝްވަރާ ކުރަމުން
-
އަމާޒަކީ މަހެއްގެ މައްޗަށް 1 މިލިއަން ޑޮލަރުގެ ކާގޯ ސްލޮޓާއި ފަސިންޖަރުންގެ ޓިކެޓް ވިއްކުން
ޔޫއެސް-ބަންގްލާ:
-
ބަންގްލަދޭޝްގެ އެންމެ ބޮޑު އަމިއްލަ އެއާލައިން
-
ފްލީޓުގައި 14 ބޯޓު
-
ބޮއިން 800-737 މަރުކާގެ ހަތަރު ބޯޓާއި އޭޓީއާރު 600-72 މަރުކާގެ މުޅިން އާ ހަތް ބޯޓު ހިމެނޭ