މާރާމާރީތަކާއި ކެފޭ ސުންނާފަތިކޮށްލުން ގޭންގުތަކާ ގުޅިފައި؛ 16 މީހަކު ހައްޔަރުކޮށްފި

މާލޭގައި މި ފަހުން ހިންގި މާރާމާރީތަކާއި ހުޅުމާލޭގައި ހުންނަ 'ޖޫސް ޓައިމް' ކެފޭއަށް ބުރާސްފަތި ދުވަހުގެ ރޭ ގެއްލުން ދިން މައްސަލަ ގުޅެނީ މާލޭގައި ހަރަކާތްތެރިވާ ހަތަރު ގޭންގެއްގެ މެދުގައި ހިންގާ ހަމަނުޖެހުންތަކާ ކަމަށާއި އެ މައްސަލަތަކާ ގުޅިގެން މިހާތަނަށް 16 މީހަކު ހައްޔަރުކޮށްފައިވާ ކަމަށް ޕޮލިސް ކޮމިޝަނަރު މުހައްމަދު ހަމީދު މިއަދު ވިދާޅުވެއްޖެ އެވެ.

ވީ ކިހިނެއް؟ - މި މައްސަލަތަކާ ގުޅޭ ފަހުގެ މައުލޫމާތު ފުލުހުންގެ ފަރާތުން ރަސްމީކޮށް އަދި ހާމައެއް ނުކުރެ އެވެ. އެކަމަކު މިކަމާ ގުޅޭ ގޮތުން ކޮމިޝަނަރު މުހައްމަދު ހަމީދު މިއަދު ވަނީ 'އަދަދު' ނޫހަށް އިންޓަވިއުއެއް ދެއްވާފަ އެވެ. 'ދައުރު'ން ގުޅުމުން ހަމީދު ފޯނަށް ޖަވާބެއް ނުދެއްވަ އެވެ.

ތަފްސީލް - ހަމީދު 'އަދަދު' ނޫހަށް ވިދާޅުވީ:

ބުނީ ކީކޭ؟ - މި މައްސަލަތަކާ ގުޅިގެން މިދިޔަ ދެ މަސްދުވަހުގެ ތެރޭގައި 16 މީހަކު ހައްޔަރުކޮށް، ތަހުގީގު ފަށާފައިވާ ކަމަށް ހަމީދު އެ އިންޓަވިއުގައި ވިދާޅުވި އެވެ.

ހަމީދު ފާހަގަކުރެއްވި ގޮތުގައި، މި މާރާމާރީތަކުގައި ހަރަކާތްތެރިވާ މީހުން ކުށްކުރަނީ ހެލްމެޓު އަޅައިގެން ތިބުމުގެ އިތުރުން ސައިކަލުތަކުގެ ނަންބަރު ޕްލޭޓްތައް ވެސް ބަދަލުކޮށްގެންނެވެ. އެ ގޭންގުތަކަށް ނިސްބަތްވާ މީހުން ފިލަން އެކި 'ސޭފް ހައުސް' ބޭނުންކުރާ ކަމަށް ވެސް އޭނާ ވިދާޅުވި އެވެ.

ހަމީދު ވިދާޅުވި ގޮތުގައި، އެފަދަ ހަތަރު 'ސޭފް ހައުސް'އެއް ބަލައި ފާސްކޮށް، އެ ތަންތަނުން އެކި ބާވަތުގެ ހަތިޔާރު ފުލުހުންގެ ތަހުގީގަށް ހޯދާފައިވެ އެވެ.

މި ހަމަނުޖެހުންތަކާ ގުޅިގެން ފުލުހުން އިތުރު ފިޔަވަޅުތައް އަޅާނެކަން ފާހަގަކުރައްވައި މިފަދަ ނުރައްކާތެރި މީހުންނާ މެދު ރައްޔިތުން ވެސް ސަމާލުވާން އޭނާ އިލްތިމާސްކުރެއްވި އެވެ. އެގޮތުން: 

އެނގުން މުހިއްމު - މާލޭގައި ހިންގަމުންދާ ސިލްސިލާ މާރާމާރީތަކުގައި އެންމެ ފަހުން ރޭ ވަޅިން ހަމަލާދީ ޒަހަމްކޮށްލި 30 އަހަރުގެ ދިވެހި ފިރިހެން މީހާ އޮތީ ވެންޓިލޭޓަރުގަ އެވެ. މާފަންނު މުރަނގަމަގުގައި ހުންނަ، ކޮސްމެޓިކްސް ވިއްކާ 'ކްރާސާ' ފިހާރައިގެ ތެރޭގައި ރޭ 10 ޖަހާކަށް ހާއިރު އޭނާއަށް ހަމަލާދީ ޒަހަމްކޮށްލާފައިވަނީ ހެލްމެޓް އަޅައިގެން ތިބެ އެ ފިހާރަ ތެރެއަށް ވަން ދެ މީހަކު ކަމަށް މަންޒަރު ދުށް މީހުން 'ދައުރު'އަށް ބުންޏެވެ.

މިދިޔަ މަހު ލޮނުޒިޔާރަތް މަގުގައި ހުންނަ ޗާކޯލް ކެފޭ ކައިރިން ދަންވަރު މީހެއްގެ ގަޔަށް ވަޅި ހަރައި ޒަހަމްކޮށްލާފައިވާ އިރު، މި މަހުގެ މެދުތެރޭގައި ވިލިމާލެ ފެރީ ޓާމިިނަލް ކައިރިން ތޫނު އެއްޗަކުން ހަމަލާދީގެން ވެސް މީހަކު ޒަހަމްކޮށްލި އެވެ.