ހުޅުމާލޭ ކޮންޓެއިނަރު ޕާކްގެ ފުރަތަމަ ދައްކާލުމާ އެކު ތަރުހީބު

ހުޅުމާލޭ ފުރަތަމަ ފިޔަވަހީގައި އެޗްޑީސީއިން މި އަހަރުގެ ކުރީކޮޅު ތަރައްގީ ކުރަން ފެށި ކޮންޓެއިނަރު ޕާކްގެ މަސައްކަތް ނިމުމަކާ ހަމައަށް އައިސްފި އެވެ. ކޮންޓެއިނަރު ބޭނުންކޮށްގެން ރާއްޖޭގައި ހަދާ ފުރަތަމަ ޕާކްގެ މަސައްކަތް މިހާރު ގޮސްފައިވާ ހިސާބުގެ ފޮޓޯތައް އެޗްޑީސީ އިން ޓްވިޓާގައި ރޭ ވަނީ އާންމުކޮށްފަ އެވެ.

ބުނީ ކީކޭ؟ - އެ ފޮޓޯތައް އާންމުކުރަމުން އެޗްޑީސީއިން ބުނީ ޕާކްގެ މަސައްކަތުގެ %89 މިހާރު ނިމިފައިވާ ކަމަށެވެ. އަދި މިހާރު ކުރަމުން އަންނަނީ ޕާކަށް ބޭނުންވާ ޔުޓިލިޓީގެ ހިދުމަތްތައް ގާއިމްކުރުމާއި ބިންގަނޑު އެއްވަރުކޮށް ޑިޒައިންކުރުމާއި ލަކުޑި ބޭނުންކޮށްގެން ކޮންޓެއިނަރުތަކުގެ އެތެރޭގައި އެކި މަސައްކަތްތައް ކުރުން ކަމަށް އެޗްޑީސީއިން ބުންޏެވެ.

ތަފްސީލް - އެޗްޑީސީއިން އާންމުކުރި ފޮޓޯތަކުން ފެންނަ ގޮތުގައި މީގެ ކުރިން އާންމުކުރި ޑިޒައިންގައިވާ ގޮތަށް ކޮންޓެއިނަރުތައް މިހާރު ވަނީ އެކި ދިމަދިމާލުގައި އަތުރައިފަ އެވެ. އެގޮތުން ހަތަރު ވަރަކަށް ކޮންޓެއިނަރު އެކި ޑިޒައިންތަކަށް އަތުރައި ބޭރުގައި ވިލު ނޫކުލަ، ރަތް ކުލަ އަދި ރީނދޫ ކުލަ ވަނީ ލައިފަ އެވެ.

އެޗްޑީސީއިން ބުނީ މިއީ ރާއްޖެއަށް އަންނަ ވަރަށް ތަފާތު ކޮންސެޕްޓަކަށް ވާނެ ކަމަށެވެ. އަދި ހުޅުމާލޭގެ އިޖުތިމާއީ ގުޅުން ރަނގަޅުކޮށް ތަފާތު ހަރަކާތްތައް ބޭއްވުމަށް ވަރަށް އެކަށޭނަ ސިޓީ ޕާކަކަށް ކޮންޓެއިނަރު ޕާކް ވާނެ ކަމަށް އެޗްޑީސީއިން ބުންޏެވެ. އެޗްޑީސީގެ އާކިޓެކްޓުން ޑިޒައިންކޮށްފައިވާ އެ ޕާކް ހާއްސަކުރާނީ:

"މި ޕާކަކީ ސިޓީއެއްގެ އިހުސާސް ކުރެވޭ ގޮތަށް ތަރައްގީ ކުރާ ހިތްފަސޭހަ އަދި ދިވެހިންނަށް އާ ތަޖުރިބާއަކަށް ވާނެ،" އެޗްޑީސީއިން ބުންޏެވެ.

މި ޕާކާ އެކު ކުދި އަދި މެދުފަންތީގެ ވިޔަފާރިތަކަށް ވެސް އާ ފުރުސަތުތަކެއް ހުޅުވޭނެ ކަމަށް އެޗްޑީސީއިން ބުންޏެވެ. އެގޮތުން އެ ޕާކްގައި ދޭން ރާވާފައިވާ ހިދުމަތްތައް ދިނުމަށް އަމިއްލަ ފަރާތްތަކަށް ދޫކޮށްލުމަށް އެޗްޑީސީއިން ވަނީ ނިންމައިފަ އެވެ. 

ޕާކްގެ ފޮޓޯތައް އާންމު ކުރުމާ އެކު ސޯޝަލް މީޑިއާގައި ހިޔާލުފާޅުކުރި އާންމުން ބުނީ އެ ޕާކް ނިންމައި ހުޅުވާނެ ވަގުތެއްގެ އިންތިޒާރުގައި ތިބި ކަމަށެވެ. އަދި އިންތިޒާރު އެހާ ދިގުލައިގެން ނުދާނެ ކަމަށް އުންމީދު ކުރާ ކަމަށް ބައެއް މީހުން ބުންޏެވެ.

އަނެއް ބަޔަކު ބުނީ އެ ޕާކްގެ ތަފާތުކަން މިހާރު ވެސް އިހުސާސް ކުރެވޭ ކަމަށެވެ. އަދި ނިމުމުން އެއަށް ވުރެ ހިތްގައިމު ވާނެ ކަމަށް އުންމީދުކުރާ ކަމަށް ވެސް ބުންޏެވެ. ހިޔާލުފާޅުކުރި ބައެއް މީހުން ބުނި ގޮތުގައި ދުޅަހެޔޮ ސިޓީއެއް ތަރައްގީ ކުރުމުގައި މި ޒާތުގެ ތަންތަން ހުޅުމާލޭގައި ހުރުން ވަރަށް މުހިންމެވެ.

"މިތަން ފެނިފައި އެކްސައިޓްވެއްޖެ. އުންމީދަކީ އަވަހަށް މިތަން ހުޅުވުން. އެކަމަށް ކެތްމަދުވެފައި މި ހުރީ،" ހިޔާލުފާޅުކުރި ޒުވާނަކު ބުންޏެވެ.

އެނގުން މުހިންމު - އެޗްޑީސީއިން އެންމެ ފުރަތަމަ މަސައްކަތް ކުރީ މި އަހަރުގެ ރޯދައިގެ ކުރިން ޕާކް ހުޅުވާށެވެ. އެކަމަކު އެކި ކަހަލަ ދަތިތައް ކުރިމަތިވެގެން މަސައްކަތް ނިންމާލެވޭ ގޮތް ނުވީ އެވެ.

އެޗްޑީސީއިން ވަނީ ރާއްޖޭގެ އެންމެ ބޮޑު އަދި ފުރަތަމަ މިޔުޒިކަލް ފައްވާރު ވެސް މިދިޔަ އަހަރުގެ ތެރޭގައި ހުޅުވައިފަ އެވެ. އެ ތަނަށް ވެސް ގިނަ ބައެއްގެ ސަމާލުކަން ލިބުނެވެ.