ލޯންޗަކާއި ޑިންގީއެއް ޖެހި 4 މީހަކަށް އަނިޔާވެއްޖެ؛ ލޯންޗު ދިޔައީ އެކަކުގެ ގައިމަތިން

ހުޅުމާލެއަށް ވަންނަ ނެރާ ދިމާލުން މިރޭ ލޯންޗަކާއި ޑިންގީއެއް އެކްސިޑެންޓުވެ ހަތަރު މީހަކަށް އަނިޔާވެއްޖެ އެވެ. އޭގެ ތެރެއިން އެކަކު ކަނޑަށް ވެއްޓުނު ވަގުތު އޭނާގެ ގައިގެ މަތިން ލޯންޗު ގޮސްފައިވާ ކަމަށް އެމްއެންޑީއެފުން ބުންޏެވެ.

ވީ ކިހިނެއް؟ - ފުލުހުންނަށް އެ އެކްސިޑެންޓު ހިނގިކަމުގެ މައުލޫމާތު ލިބުނީ މިރޭ 7:55 ހާއިރު އެވެ.

ތަފުސީލު - ފުލުހުން މީޑިއާތަކަށް ފޮނުވި މެސެޖެއްގައި ބުނީ އެ އެކްސިޑެންޓުގައި ހަތަރު މީހަކަށް އަނިޔާވެ، ފަރުވާ ދިނުމަށް ހޮސްޕިޓަލަށް ގެންގޮސްފައިވާ ކަމަށެވެ. އެގޮތުން:

އެ މީހުންނަށް ލިބުނު އަނިޔާގެ ތަފުސީލު ފުލުހުން ހާމައެއް ނުކުރެ އެވެ.

އެމްއެންޑީއެފްގެ ބަސް - އެމްއެންޑީއެފުން މީޑިއާތަކަށް ފޮނުވި މެސެޖެއްގައި ބުނީ ޑިންގީ އާއި ލޯންޗު ޖެހި، ޑިންގީގައި ހުރި މީހަކު މޫދަށް ވެއްޓި އެ މީހާގެ ގައިގެ މަތިން ލޯންޗު ގޮސްފައިވާ ކަމަށެވެ. އެ މީހާ ނުނެގިގެން އުޅޭ ކަމުގެ މައުލޫމާތު ލިބުމާ އެކު، ކޯސްޓްގާޑު ހާބަކްރާފްޓްގެ ޑައިވަރަކު އެ ސަރަހައްދަށް ވަގުތުން ފުންމާލަައި މޫދަށް ވެއްޓުނު މީހާ ސަލާމަތްކޮށްފައިވާ ކަމަށް އެ ތަނުން ބުންޏެވެ.

"ހާބަކްރާފްޓް 113ގައި ތިބި ސިފައިންގެ އެހީގައި އެ އުޅަނދަށް އެ މީހާ ނެގުމަށް ފަހު ވަނީ އެމްއެންޑީއެފް ކަލާސީނުކޮށްޓަށް ގެންގޮސްދީފައި. އަދި ޒަހަމްވެފައި އޮތް މީހާ، އެމްއެންޑީއެފްގެ ވެހިކަލެއްގައި މިރޭ 7 ހާއިރު ވަނީ ހުޅުމާލެ ހޮސްޕިޓަލަށް ގެންގޮސްދީފައި،" އެމްއެންޑީއެފުގެ މެސެޖުގައިވެ އެވެ.

އެ އެކްސިޑެންޓާ ގުޅިގެން ބަލަން ޖެހޭ ކަންކަން ފުލުހުން އަންނަނީ ބަލަމުންނެވެ.