ބަންގްލަދޭޝް އިން ރާއްޖެއަށް 3 ބިލިއަން ރުފިޔާގެ ލޯނެއް ދޭން ނިންމައިފި

ބަންގްލަދޭޝް އިން ރާއްޖެއަށް 200 މިލިއަން ޑޮލަރު (3.1 ބިލިއަން ރުފިޔާ)ގެ ލޯނެއް ދިނުމަށް ނިންމާފައިވާ ކަމަށް އެ ގައުމުގެ މަރުކަޒީ ބޭންކު، ބަންގުލަދޭޝް ބޭންކުން ބުނެފި އެވެ.

ވީ ކިހިނެއް؟ - ބަންގުލަދޭޝް ބޭންކުގެ އޮފިޝަލަކާ ހަވާލާދީ އެ ގައުމުގެ 'ދަ ބިޒްނަސް ސްޓޭންޑާޑް' ނޫހުން ބުނީ ރާއްޖެއަށް 200 މިލިއަން ޑޮލަރުގެ ލޯނެއް ދިނުމަށް އެއްބަސްވީ ފޮރިން މިނިސްޓްރީއާ އެކު މަޝްވަރާކުރުމަށް ފަހު ކަމަށެވެ. އެ ލޯނުގެ ޝަރުތުތަކަށް އަދި އެއްބަސް ނުވެވުނު ނަމަވެސް ރާއްޖެ އިން އެދިފައި ވަނީ ފަސް އަހަރުދުވަހުގެ ތެރޭގައި އަނބުރާ ދައްކާ ގޮތަށް ލޯނު ނެގުމަށް ކަމަށް ވެސް އެ ނޫހުގައިވެ އެވެ.

އެ ނޫހުން ބުނީ ބަންގްލަދޭޝް ބޭންކުން ރާއްޖެއަށް ލޯނެއް ދޭން ނިންމި ނަމަވެސް ރާއްޖެ އިން އެކަމާ ގުޅޭ ގޮތުން އަދި ވަކި އެއްޗެއް ބުނެފައި ނުވާ ކަމަށެވެ.

ބުނީ ކީކޭ؟ - އެ ނޫހުގައިވާ ގޮތުން، ބަންގުލަދޭޝް ބޭންކުގެ ގަވަރުނަރު ފަޒްލޭ ކަބީރު ވިދާޅުވެފައި ވަނީ ރާއްޖެއަށް 200 މިލިއަން ޑޮލަރުގެ ލޯނެއް ދިނުމުގެ ގާބިލްކަން މަރުކަޒީ ބޭންކުގައި އެބަހުރި ކަމަށެވެ. އަދި އެ ލޯނު ދޭނެކަމުގެ ޔަގީންކަން މިހާރު ދީފައިވާނެ ކަމަށް ވެސް އޭނާ ވިދާޅުވި ކަމަށް އެ ނޫހުން ބުންޏެވެ.

"އަވަށްޓެރި ގައުމުތަކަށް ލޯނު ދިނުމަކީ ފަހުރުވެރިވާ ކަމެއް،" ގަވަރުނަރު ވިދާޅުވި އެވެ.

އެނގުން މުހިންމު - މިއީ ބަންގުލަދޭޝްގެ ތާރީހުގައި ވެސް އެ ގައުމުގެ މަރުކަޒީ ބޭންކުން ބޭރުގެ ގައުމަކަށް މި ގޮތަށް ދޫކުރާ ދެވަނަ ލޯނެވެ. މީގެ ކުރިން ހެދި ކަރަންސީ ސުވޮޕް އެއްބަސްވުމެއްގެ ދަށުން އެ ބޭންކުން ވަނީ ލަންކާއަށް 200 މިލިއަން ޑޮލަރު ދީފަ އެވެ.

ބަންގްލަދޭޝް އިން ލޯނެއް ނަގަން އުޅޭ ވާހަކަ މީޑިއާއަށް ތިލަވުމާ އެކު މީގެ ކުރިން ފިނޭންސުން ބުނެފައި ވަނީ ރާއްޖެއަށް ލޯނެއް ދިނުމަށް އެދި ފުރަތަމަ ހުށަހެޅީ ބަންގްލަދޭޝް އިން ކަމަށެވެ. ނަމަވެސް ބިޒްނަސް ސްޓޭންޑަޑް ނޫހުން ބުނެފައި ވަނީ ރާއްޖެއަށް ލޯނެއް ދިނުމަށް އެދުނީ ރައީސް ސޯލިހު މިދިޔަ މާޗް މަހު ބަންގުލަދޭޝްއަށް ކުރެއްވި ރަސްމީ ދަތުރުފުޅުގެ ތެރޭގައި ކަމަށެވެ.

ބިޒްނަސް ސްޓޭންޑާޑް ނޫހުން ބުނި ގޮތުގައި، ރާއްޖެއަށް ލޯނެއް ދޭއިރު މުދާ އިމްޕޯޓު ކުރަން ބަންގްލަދޭޝް އިން ކުރަން ޖެހޭ ހަރަދު ބޮޑުވެ އަދި ބޭރު ފައިސާގެ އެކްސްޗޭންޖު މާކެޓަށް ހުރި ޕްރެޝަރުތަކާ ގުޅިގެން އެ ގައުމުގެ  ބޭރު ފައިސާގެ ރިޒާވަށް ވަނީ ނޭދެވޭ އަސަރުތަކެއް ކޮށްފަ އެވެ. އެގޮތުން، އެ ގައުމުގެ މަރުކަޒީ ބޭންކުގެ ރިޒާވް 48 ބިލިއަން ޑޮލަރުން 45 ބިލިއަން ޑޮލަރަށް ދަށްވެފައިވާ ކަމަށް ވެސް އެ ނޫހުގައިވެ އެވެ.

އެކްސްޗޭންޖު ރޭޓް ހަމަޖެއްސުުމުގެ ގޮތުން މިދިޔަ އޮގަސްޓު މަހުން ފެށިގެން ބަންގުލަދޭޝް ބޭންކުން ވަނީ އެ ގައުމުގެ ބޭންކުތަކަށް 2.1 ބިލިއަން ޑޮލަރު ވިއްކައިފަ އެވެ.

އެ ގައުމުގެ ރިޒާވަށް ވެސް ބާރު ބޮޑުވެފައި ވާއިރު ރާއްޖެއަށް ބަންގްލަދޭޝް އިން ލޯނެއް ދޭން ނިންމި ނިންމުމަކީ ސިޔާސީ ނިންމުމެއް ކަމަށް ސެންޓްރަލް ބޭންކިންގެ މާހިރުން ވިދާޅުވެފައިވާ ކަމަށް ބިޒްނަސް ސްޓޭންޑާޑް ނޫހުން ބުންޏެވެ. ނަމަވެސް، 200 މިލިއަން ޑޮލަރަކީ ބަންގްލަދޭޝް ބޭންކަށް ބުރަ ބޮޑު އަދަދަކަށް ނުވާނެ ކަމަށް ވެސް އެ ބޭފުޅުން ވަނީ ވިދާޅުވެފަ އެވެ.

ފިނޭންސް މިނިސްޓްރީގެ ތަފާސްހިސާބުތައް ދައްކާ ގޮތުގައި2020 ވަނަ އަހަރު ނިމުނު އިރު ރާއްޖޭގެ ދަރަނީގެ ހާލަތަކީ: