ރާނީ އެލިޒަބަތުގެ ޖަނާޒާގައި ބައިވެރިވަނީ ކޮން ލީޑަރުންނެއް؟

މިދިޔަ ބުރާސްފަތި ދުވަހުގެ ރޭ އަވަހާރަވި އިނގިރޭސި ރާނީ އެލިޒަބަތު ދެވަނައިގެ ޖަނާޒާ އަންނަ ހޯމަ ދުވަހު ބޭއްވުމަށް ހަމަޖެހިފައި ވާއިރު، މިއީ އެތައް ޒަމާނެއް ވަންދެން އިނގިރޭސިވިލާތުގައި ބާއްވާ ޝާހީ އަދި ސިޔާސީ ފަރާތްތަކުގެ އެންމެ ބޮޑު އެއް އެއްވުމެވެ.

ޖަނާޒާގެ ދައުވަތު މިދިޔަ ހަފްތާބަންދުގައި ވަނީ ފޮނުވާފަ އެވެ. ގައުމުތަކުގެ އެންމެ އިސްވެރިންނާއި އެކި ފެންވަރުގެ ބޭފުޅުން ހިމެނިވަޑައިގަންނަވާ ގޮތަށް 500 އެއްހާ ބޭރުގެ އިއްޒަތްތެރިން ބައިވެރިވެވަޑައިގަންނަވާނެ ކަމަށް ބެލެވެ އެވެ.

ލަންޑަންގެ އެއާޕޯޓުތަކަށް ބާރުބޮޑު ވެދާނެތީ، އިނގިރޭސި ސަރުކާރުން ގިނަ ގައުމުތަކުގެ ލީޑަރުންގެ ކިބައިން އެދިފައި ވަނީ ކޮމާޝަލް ފްލައިޓްތަކުގައި ވަޑައިގަތުމަށެވެ. ޖަނާޒާ އޮންނަ ތަނަށް އެ ބޭފުޅުން ގެންދާނީ، އިނގިރޭސި މީޑީއާތަކުން ރިޕޯޓުކޮށްފައިވާ ގޮތުގައި، ހުޅަނގު ލަންޑަންގެ ތަނަކުން ބަހުގަ އެވެ.

ވެސްޓްމިންސްޓާ އެބީގައި މި ޖަނާޖާ ބާއްވާ އިރު، އެ ތަނަށް ގާތްގަނޑަކަށް 2،200 މީހުންނަށް ވަދެވޭނެ އެވެ.

ޔޫރަޕްގެ އެކި ކަންކޮޅުތަކުން ޝާހީ އާއިލާތަކުގެ މެމްބަރުން ރާނީ އެލިޒަބަތުގެ ޖަނާޒާގައި ބައިވެރިވެވަޑައިގަންނަވާނެ ކަމަށް ބެލެވޭ އިރު، އޭގެ ތެރޭގައި ގިނައީ ރާނީއާ ލޭގެ ގޮތުން ގުޅުން އޮންނަ ބޭފުޅުންނެވެ.

ޔޫރަޕްގެ ޝާހީ އާއިލާތަކުގެ ތެރެއިން، ރާނީ އެލިޒަބަތުގެ ޖަނާޒާގެ ދައުވަތު ގަބޫލުކުރައްވާފައި ވާކަން މިހާތަނަށް ހާމަކުރައްވާފައި ވަނީ:

އެމެރިކާގެ ރިޔާސީ ގަނޑުވަރު ވައިޓް ހައުސް އިން ވަނީ، ރައީސް ޖޯ ބައިޑަންނާއި އަނބިކަނބަލުން ޖިލް ބައިޑަން ރާނީގެ ޖަނާޒާގެ ބައިވެރިވެވަޑައިގަންނަވާނެކަން ކަށަވަރުކޮށްދީފަ އެވެ.

އެމެރިކާގެ ވަފުދުގައި ހިމެނިވަޑައިގަތުމަށް ބައިޑަން، އޭނާގެ ކުރިން ރައީސްކަން ކުރެއްވި ޑޮނަލްޑް ޓްރަމްޕަށް ދައުވަތު ދެއްވާނެތޯ ނުވަތަ ނޫންތޯ އޮތީ ސުވާލެއްގެ ތެރޭގަ އެވެ. އެ ސުވާލަށް ސީދާ ޖަވާބެއް އަދި ލިބިފައި ނުވާ އިރު، ބޭރުގެ އިއްޒަތްތެރިންނާ އެކު ގެންދަވާ ވަފުދު ވީހާ ވެސް ކުޑަކުރުމަށް އިނގިރޭސި ސަރުކާރުން އެދިފައި ވާތީ، ބައިޑަންގެ ވަފުދުގައި ކުރީގެ ރައީސުން ނުހިމެނުމަކީ އެކަށީގެންވާ ކަމެކެވެ.

ކުރީގެ ބައެއް ރައީސުންނާއި ފަސްޓް ލޭޑީންނަށް، ހާއްސަކޮށް ބަރަކް އޮބާމާއަށް ވަކިން ދައުވަތު ލިބިވަޑައިގެންފައި ވެދާނެ ކަމަށް، މަސްރަހު ދިރާސާ ކުރައްވާ ބައެއް ބޭފުޅުން ވިދާޅުވެ އެވެ. ނަމަވެސް، އެމެރިކާގެ ރައީސްކަން 1977 އިން 1981އަށް ކުރެއްވި ޖިމީ ކާޓާއަށް ދައުވަތު ލިބިވަޑައިގެންފައި ނުވާ ކަމަށް އޭނާގެ އޮފީހުން ވަނީ ބުނެފަ އެވެ.

ކޮމަންވެލްތުގެ ގައުމުތަކުގެ ތެރެއިން، އިނގިރޭސިވިލާތާ ދައުލަތުގެ އެންމެ އިސް ވެރިޔާ ހިއްސާކުރާ ގައުމުތަކުގެ އެންމެ އިސް ވެރިން ރާނީގެ ޖަނާޒާގައި ބައިވެރިވެވަޑައިގަންނަވާނެކަން ވަނީ އިއުލާނުކުރައްވާފަ އެވެ. އޭގެ ތެރޭގައި ހިމެނިވަޑައިގަންނަވަނީ:

އެ ގައުމުތަކުގައި، ރަސްކަމުގެ މަންދޫބެއްގެ ގޮތުގައި މަސައްކަތް ކުރައްވާ ގިނަ ގަވަރުނަރު ޖެނެރަލުން ވެސް އެ ގައުމުތަކުގެ ވެރިންނާ އެކު ލަންޑަނަށް ވަޑައިގަންނަވާނެ ކަމަށް ބެލެވެ އެވެ.

ކޮމަންވެލްތު ޖަމާއަތުގެ ގައުމުތަކުގެ ތެރެއިން، ރާއްޖޭގެ ރައީސް އިބްރާހިމް މުހައްމަދު ސޯލިހާއި ބަންގްލަދޭޝްގެ ބޮޑުވަޒީރު ޝެއިހް ހަސީނާ އާއި ސްރީ ލަންކާގެ ރައީސް ރަނިލް ވިކްރަމަސިންހަ ވެސް ވަނީ ދައުވަތު ގަބޫލުކުރައްވާފަ އެވެ. އިންޑިއާ ތަމްސީލު ކުރައްވާނީ އެ ގައުމުގެ ރައީސް ޑްރޫޕާޑީ މުރުމޫ އެވެ.

ދައުވަތު ގަބޫލުކުރެއްވި ދުނިޔޭގެ އެހެން ލީޑަރުންގެ ތެރޭގައި ހިމެނިވަޑައިގަންނަވަނީ:

ޗައިނާގެ ރައީސް ޝީ ޖިންޕިންގްް ރާނީގެ ޖަނާޒާގައި ބައިވެރިވެވަޑައިގަންނަވާނެ ކަމެއް އަދި ނޭނގެ އެވެ. ނަމަވެސް، އުޒްބެކިސްތާނުގައި އޮންނަ ސަމިޓެއްގައި ބައިވެރިވެވަޑައިގަތުމަށް ތިން ދުވަހުގެ ދަތުރުފުޅެއް ޝީ ވަނީ އިއްޔެ ފައްޓަވާފަ އެވެ. މިއީ ކޮވިޑުގެ ބަލިމަޑުކަމަށް ފަހު ޗައިނާގެ ރައީސް ގައުމުން ބޭރަށް ވަޑައިގަންނަވާ ފުރަތަމަ ފަހަރެވެ.

އިނގިރޭސި މީޑިއާ އިން ރިޕޯޓު ކުރާ ގޮތުގައި، ހުޅަނގުގެ ދަތިކުރުމުގެ ފިޔަވަޅުތަކުގެ ތެރޭގައި ތާށިވެފައި އޮތް އީރާނުގެ މަންދޫބަކު ވެސް ރާނީގެ ޖަނާޒާގައި ބައިވެރިވާނެ އެވެ. ނަމަވެސް، އެއީ އެ ގައުމުން އިނގިރޭސިވިލާތަށް ކަނޑައަޅާފައި ހުންނަވާ ސަފީރު ނުވަތަ އެ ފެންވަރުގެ ބޭފުޅެއް ކަމަށްވެ އެވެ.

ރަޝިއާ، ބެލަރޫސް އަދި މިޔަންމާގެ އެއްވެސް މަންދޫބަކަށް ދައުވަތު ދީފައެއް ނުވެ އެވެ.

ރަޝިޔާ އިން މިދިޔަ ފެބްރުއަރީގައި ޔޫކްރެއިނަށް އަރައިގަތް ފަހުން، އިނގިރޭސިވިލާތާއި ރަޝިޔާއާ ދެމެދު އޮތް ސިޔާސީ އަދި ހާރިޖީ ގުޅުން ވަނީ ވަރަށް ބޮޑަށް ހީނަރު ވެފަ އެވެ. ރަޝިޔާގެ ރައީސް ވްލަޑިމިއަ ޕޫޓިންގެ ތަރުޖަމާނަކު މިދިޔަ ހަފްތާގައި ވިދާޅުވެފައި ވަނީ، ރާނީގެ ޖަނާޒާގައި ބައިވެރިވުމާ މެދު ޕޫޓިން "ވިސްނަވަމުން ވެސް ނުގެންދަވާ" ކަމަށެވެ.

ރަޝިޔާ އިން ޔޫކްރެއިނަށް ހަމަލާ ދިނުމަށް ބެލަރޫސްގެ ސަރަހައްދުތައް ވެސް ބޭނުން ކުރަމުން ދާއިރު، އެ ގައުމުގެ ރައީސް އެލެގްޒެންޑާ ލުކަޝެންކޯ އަކީ ޕޫޓިންގެ ވަރަށް ގާތް އެކުވެރިއެކެވެ.

ފެބްރުއަރީ 2021ގައި މިޔަންމާގައި އަސްކަރީ ބަގާވާތެއް ގެނެސް، އެ ގައުމުގެ އިންތިހާބީ ސަރުކާރު ވައްޓާލި ފަހުން އިނގިރޭސިވިލާތުން ވަނީ މިޔަންމާގައި ހަރަކާތްތެރިވާ އިނގިރޭސި ހާރިޖީ ބޭފުޅުންގެ އަދަދު ވެސް ވަރަށް ބޮޑަށް މަދުކޮށްފަ އެވެ.