އިންޑޮނޭޝިޔާގެ ރިޔާސީ އިންތިހާބު ޑިފެންސް މިނިސްޓަރު ޕްރަބޯވޯ ކާމިޔާބު ކުރައްވައިފި

އިންޑޮނޭޝިއާގެ ރިޔާސީ އިންތިހާބު އެ ގައުމުގެ ޑިފެންސް މިނިސްޓަރު ޕްރަބޯވޯ ސުބިއަންޓޯ މިއަދު ކާމިޔާބު ކުރައްވާފައިވާ ކަމަށް އޭނާ ދައުވާ ކުރައްވައިފި އެވެ.

ނަމަވެސް އިންތިހާބީ އޮފިޝަލުން އަދި އެކަން އިއުލާނެއް ނުކުރެ އެވެ. އަދި އޭނާގެ ވާދަވެރިން ވެސް އެކަން ގަބޫލެއް ނުކުރެ އެވެ.

ދުނިޔޭގެ ތިންވަނައަށް އެންމެ ބޮޑު ޑިމޮކްރަސީގައި އިސްކޮށް ހަރަކާތްތެރިވި ތިން ފަރާތުގެ ރޭހުގައި ސުބިއަންޓޯ ވަނީ ކުރި ހޯއްދަވައިފަ އެވެ.

އިންޑޮނީޝިއާގެ ޕޯލިން އެޖެންސީތަކުން ކުރިއަށް ގެންދިޔަ ނުރަސްމީ "ކުއިކް ކައުންޓް" ޓެލީތަކުން ދައްކާ ގޮތުގައި ސުބިއަންޓޯ ވަނީ %57 އާއި %59 އާ ދެމެދުގެ އަދަދަކަށް ވޯޓު ހޯއްދަވައިފަ އެވެ. ވޯޓުލާ ތަންތަނުގައި ގުނާފައިވާ ވޯޓުގެ %80 އަށް ވުރެ ގިނަ މީހުންގެ ސާމްޕަލް ނަގާފައިވެ އެވެ.

"އަވަސް ކައުންޓް ނަތީޖާއަށް ޝުކުރު އަދާކުރަން،" ސަޕޯޓަރުންނާ މުހާތަބު ކުރައްވައި އޭނާ ވިދާޅުވި އެވެ. 

"ބޮޑާވެގެން ނުވާނެ، ފަހުރުވެރިވެގެން ނުވާނެ، އުފަލުން ތިބެގެން ނުވާނެ، އަދި ވެސް މަޑުމައިތިރިވާން ޖެހޭ. މި ކާމިޔާބީއަކީ އިންޑޮނޭޝިއާގެ ހުރިހާ ރައްޔިތުންނަށް ލިބުނު ކާމިޔާބީއެއް،" ސުބިއަންޓޯ ވިދާޅުވި އެވެ.

އުމުރުން 72 އަހަރުގެ ކެންޑިޑޭޓަކީ މީގެ 25 އަހަރު ކުރިން ނިމުނު ޑިކްޓޭޓަރޝިޕްގެ އަނިޔާވެރި ޒަމާނާ ގުޅިފައިވާ ކެންޑިޑޭޓެކެވެ. އަދި އެ ދުވަސްވަރުގެ އަނިޔާ އާއި ގެއްލުވާލާފައިވާ މީހުންނާ ގުޅުން ހުރި ޔުނިޓެއްގައި ސްޕެޝަލް ފޯސަސް ކޮމާންޑަރެއްގެ ގޮތުގައި އޭނާ މަސައްކަތް ކުރެއްވި އިރު، އެ ތުހުމަތުތަކަށް ސުބިއަންޓޯ އިންކާރު ކުރައްވަ އެވެ.

އޭނާ ވަނީ މިހާރުގެ މަޝްހޫރު ރައީސް ޖޯކޯ ވިޑޯޑޯގެ ކާމިޔާބީ ދެމެހެއްޓުމަށް ނުކުމެވަޑައިގެންފަ އެވެ. އަދި އޭނާގެ ރަނިންމޭޓަކަށް ހަމަޖެއްސީ ވެސް ވިޑޯޑޯގެ ދަރިކަލުންނެވެ.